ବେଙ୍ଗାଲୁରୁ,୧।୩: କର୍ନାଟକରେ ରାଜ୍ୟ ସଭା ଏମ୍ପି ନାସିର ହୁସେନଙ୍କ ବିଜୟ ପରେ ବିଧାନସଭା ବାହାରେ ପାକିସ୍ତାନ ଜିନ୍ଦାବାଦର ସ୍ଲୋଗାନ ଦିଆଯାଇଥିଲା। ବର୍ତ୍ତମାନ ଏହି ମାମଲାରେ ଫୋରେନସିକ ରିପୋର୍ଟ ସାମ୍ନାକୁ ଆସିଛି। ଏହି ରିପୋର୍ଟରେ ଦାବି କରାଯାଇଛି, କର୍ନାଟକ ବିଧାନସଭା ବାହାରେ ‘ପାକିସ୍ତାନ ଜିନ୍ଦାବାଦ’ର ସ୍ଲୋଗାନ ଦିଆଯାଇଛି।
କଂଗ୍ରେସ ପ୍ରାର୍ଥୀ ରାଜ୍ୟ ସଭା ବିଜୟ ଉତ୍ସବରେ ପାକିସ୍ତାନ ସମର୍ଥକ ସ୍ଲୋଗାନ ଦିଆଯାଇଛି ବୋଲି ଫୋରେନସିକ ବିଶେଷଜ୍ଞମାନେ ଏହା ପ୍ରମାଣ କରିଛନ୍ତି। ରାଜ୍ୟ ସରକାରଙ୍କ ନିକଟରେ ଦାଖଲ ହୋଇଥିବା ରିପୋର୍ଟରେ ଉଭୟ ଭିଡିଓ ଏବଂ ଅଡିଓରେ ପାକିସ୍ତାନ ସମର୍ଥକ ସ୍ଲୋଗାନଗୁଡ଼ିକର ଫୁଟେଜ୍ ମଧ୍ୟ ନିଶ୍ଚିତ ହୋଇଛି ଏବଂ ଏହି ଫୁଟେଜକୁ ହେରଫେର କରାଯାଇ ନାହିଁ ବୋଲି କୁହାଯାଇଛି।
ଏହି ମାମଲାରେ ପଚରାଉଚରା ପାଇଁ ମହମ୍ମଦ ଶାଫିକ ନାସିପୁଡିଙ୍କୁ ଗିରଫ କରାଯାଇଛି ବୋଲି ହାଭେରୀ ପୋଲିସ ଅଧୀକ୍ଷକ ଅଂଶୁକୁମାର କହିଛନ୍ତି। ହାଭେରୀ ଅଧୀକ୍ଷକ କହିଛନ୍ତି, ଫେବୃଆରୀ ୨୭ରେ କର୍ନାଟକ ବିଧାନସଭାରେ ପାକିସ୍ତାନ ସମର୍ଥକ ସ୍ଲୋଗାନ ଦେବା ନେଇ ବିଧାନ ସୌଧ ପୋଲିସ ଷ୍ଟେଶନରେ ଏକ ମାମଲା ରୁଜୁ ହୋଇଥିଲା। ଏହି ମାମଲାରେ ଜଣେ ସନ୍ଦିଗ୍ଧ ମହମ୍ମଦ ଶଫିକ ନାସିପୁଡିଙ୍କୁ ବେଙ୍ଗାଲୁରୁ ପୋଲିସ ଅଟକ ରଖିଛି।
