ରାଓ୍ବଲପିଣ୍ଡି, ୯ା୨ (ଏପି)-ଫାଷ୍ଟ ବୋଲର ହସନ ଅଲୀଙ୍କ ପ୍ରଥମ ଟେଷ୍ଟ ୧୦ ଉଇକେଟ ସଫଳତା ସହାୟତାରେ ଏଠାରେ ଚାଲିଥିବା ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ପାକିସ୍ତାନ ୯୫ ରନରେ ବିଜୟ ହାସଲ କରିଛି। ଏଥିସହିତ ୧୮ ବର୍ଷରେ ଭ୍ରମଣକାରୀ ଦଳ ବିପକ୍ଷରେ ପ୍ରଥମ ସିରିଜ ବିଜୟ ହାସଲ କରିଛି। ପ୍ରଥମ ଇନିଂସରେ ୫ଉଇକେଟ ନେଇଥିବା ହସନ ପୁନଶ୍ଚ ୬୦ରନ ବିନିମୟରେ ୫ ଉଇକେଟ ଅକ୍ତିଆର କରିବାରୁ ୩୭୦ ରନର ବିଜୟ ଲକ୍ଷ୍ୟ ପିଛା କରୁଥିବା ଦକ୍ଷିଣଆଫ୍ରିକା ଅନ୍ତିମ ଦିବସ ଖେଳ ମଧ୍ୟାହ୍ନଭୋଜନ ପରେ ୨୭୪ ରନରେ ଅଲଆଉଟ ହୋଇଯାଇଥିଲା। ଏହାପୂର୍ବରୁ ୨୦୦୩ରେ ପାକିସ୍ତାନ ନିଜ ଦେଶରେ ଦକ୍ଷିଣ ଆଫ୍ରିକା ବିପକ୍ଷ ଏକ ଟେଷ୍ଟ ସିରିଜ ୧-୦ରେ ଜିତିଥିଲା। ଭ୍ରମଣକାରୀ ଦଳ ସୋମବାର ଏହାର ପୂର୍ବଦିନର ଅସମାପ୍ତ ସ୍କୋର ୧୨୯/୧ ସ୍କୋରରୁ ଖେଳ ଆରମ୍ଭ କରିଥିଲା। ହସନ ଦ୍ୱିତୀୟ ନୂଆ ବଲ୍ରେ ଲଗାତର ଦୁଇଟି ବଲ୍ରେ ୨ ଉଇକେଟ ପତନ ଘଟାଇ ଦକ୍ଷିଣ ଆଫ୍ରିକାର ବିପର୍ଯ୍ୟୟ ଆରମ୍ଭ କରିବା ବେଳକୁ ଏଡେନ ମାରକ୍ରାମ ୧୦୮ ରନ ଓ ଟେମ୍ବା ବାଭୁମା ୬୧ରନ କରିସାରିଥିଲେ। ଉଭୟେ ଚତୁର୍ଥ ଉଇକେଟ ପାର୍ଟନରଶିପ୍ରେ ୧୦୬ରନ ଯୋଗ କରିସାରିଥିଲେ। ହସନ ତାଙ୍କ ଲଗାତର ଦୁଇ ଡେଲିଭରିରେ ମାରକ୍ରାମ ଏବଂ ଅଧିନାୟକ କ୍ୱିଣ୍ଟନ ଡି’କକ୍ଙ୍କୁ ଦ୍ୱିତୀୟ ସ୍ଲିପ୍ରେ କ୍ୟାଚଆଉଟ କରିଦେଇଥିଲେ। ଓପନର ମାରକ୍ରାମଙ୍କର ୩ ବର୍ଷରେ ଏହାଥିଲା ପ୍ରଥମ ଶତକ। ମଧ୍ୟାହ୍ନ ଭୋଜନ ପରେ ଦକ୍ଷିଣ ଆଫ୍ରିକା ଏହାର ଶେଷ ୭ ଉଇକେଟ ମାତ୍ର ୩୩ରନରେ ହରାଇଥିଲା। ଘରୋଇ ଦଳର ଦ୍ୱିତୀୟ ସଫଳ ବୋଲର ସାହିନ ଆଫ୍ରିଦି ୫୧ରନ ବିନିମୟରେ ୪ ଉଇକେଟ ହାସଲ କରିଥିଲେ। ଲେଗ୍ ସ୍ପିନର ୟାସିର ଶାହ ଓ୍ବିଆନ ମଲ୍ଡର (୨୦)ଙ୍କୁ ଆଉଟ କରି ଦକ୍ଷିଣ ଆଫ୍ରିକା ଦ୍ୱିତୀୟ ଇନିଂସର ପରିସମାପ୍ତି ଘଟାଇଥିଲେ। ସୋମବାର ଏହି ବିଜୟ ଦ୍ୱାରା ପାକିସ୍ତାନ ଆଇସିସି ଟେଷ୍ଟ ର଼୍ୟାଙ୍କିଙ୍ଗରେ ୫ମ ସ୍ଥାନକୁ ଉନ୍ନୀତ ହୋଇଛି। ୨୦୧୭ ପରେ ଏହା ହେଉଛି ଦଳର ଶ୍ରେଷ୍ଠ ର଼୍ୟାଙ୍କିଙ୍ଗ। ଅନ୍ୟପକ୍ଷରେ ଦକ୍ଷିଣ ଆଫ୍ରିକା ୬ ନମ୍ବର ସ୍ଥାନକୁ ଖସି ଆସିଛି। ହସନ ଅଲୀ ପ୍ଲେୟର ଅଫ୍୍ ଦି ମ୍ୟାଚ ଏବଂ ମହମ୍ମଦ ରିଜଓ୍ବାନ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଛନ୍ତି। କରାଚୀରେ ଅନୁଷ୍ଠିତ ପ୍ରଥମ ଟେଷ୍ଟରେ ପାକିସ୍ତାନ ୭ ଉଇକେଟରେ ବିଜୟ ହାସଲ କରିଥିଲା।
ସଂକ୍ଷିପ୍ତ ସ୍କୋର
ପାକିସ୍ତାନ ପ୍ରଥମ ଇନିଂସ: ୨୭୨
ଦକ୍ଷିଣ ଆଫ୍ରିକା ପ୍ରଥମ ଇନିଂସ: ୨୦୧
ପାକିସ୍ତାନ ଦ୍ୱିତୀୟ ଇନିଂସ: ୨୯୮
ଦକ୍ଷିଣ ଆଫ୍ରିକା ଦ୍ୱିତୀୟ ଇନିଂସ: ୨୭୪ (ମାରକ୍ରାମ-୧୦୮, ବାଭୁମା-୬୧, ଡୁସେନ-୪୮; ହସନ ଅଲୀ-୫/୬୦, ସାହିନ ଆଫ୍ରିଦି-୪/୫୧)।
