ବେଜିଂ,୨୮।୬: ପାକିସ୍ତାନର ହାଇପରସୋନିକ ମିଶାଇଲ୍ ଏବଂ ଏହାର ଉତ୍ପାଦନ ପ୍ରଯୁକ୍ତିବିଦ୍ୟା (ToT) ପାଇଁ କରିଥିବା ଦାବିକୁ ଚାଇନା ପ୍ରତ୍ୟାଖ୍ୟାନ କରିଛି। ରିପୋର୍ଟ ଅନୁଯାୟୀ, ଚାଇନା ସ୍ପଷ୍ଟ ଭାବରେ କହିଛି ଯେ, ଏହି ମିଶାଇଲ୍ଗୁଡ଼ିକ ଏପର୍ଯ୍ୟନ୍ତ ରପ୍ତାନି ପାଇଁ ଉପଲବ୍ଧ ନାହିଁ ଏବଂ ଏପରି କୌଣସି ସଂସ୍କରଣ ଏପର୍ଯ୍ୟନ୍ତ ତିଆରି ହୋଇନାହିଁ ଯାହା ଅନ୍ୟ ଦେଶକୁ ଦିଆଯାଇପାରିବ।
ପାକିସ୍ତାନ ଏହି ମିଶାଇଲ୍ ଚାହୁଁଥିଲା, ଯାହା ଦ୍ୱାରା ଏହା ଭାରତର ଦ୍ରୁତ ଗତିରେ ବଢ଼ୁଥିବା ମିଶାଇଲ୍ ପ୍ରଯୁକ୍ତିବିଦ୍ୟା ଏବଂ ହାଇପରସୋନିକ ସିଷ୍ଟମ ସହିତ ପ୍ରତିଯୋଗିତା କରିପାରିବ। ଭାରତ ପୂର୍ବରୁ HSTDV ଭଳି ମିଶାଇଲ୍ ପରୀକ୍ଷଣ କରୁଛି, ଯାହା ବହୁତ ଦ୍ରୁତ ଏବଂ ଉନ୍ନତ। ଚାଇନା ମନା କରିବାର ଦୁଇଟି ମୁଖ୍ୟ କାରଣ ଦିଆଯାଉଛି। ପ୍ରଥମତଃ, ପାକିସ୍ତାନ ପାଖରେ ପୂର୍ବରୁ ଉପଲବ୍ଧ ଚାଇନା ଅସ୍ତ୍ରଶସ୍ତ୍ରର ପ୍ରଦର୍ଶନ ଆଶାଠାରୁ ଦୁର୍ବଳ ହୋଇଛି। ଦ୍ୱିତୀୟତଃ, ଚାଇନା ଭୟ କରୁଛି ଯେ, ପାକିସ୍ତାନ ପଶ୍ଚିମ ଦେଶମାନଙ୍କ ସହିତ ଏହି ପ୍ରଯୁକ୍ତିବିଦ୍ୟା ବାଣ୍ଟିପାରେ। ଯଦିଓ ପାକିସ୍ତାନ ପୂର୍ବରୁ ଚାଇନାଠାରୁ ଯୁଦ୍ଧ ବିମାନ ଏବଂ ମିଶାଇଲ୍ ପ୍ରଣାଳୀ ପାଇଛି, ଚାଇନା ହାଇପରସୋନିକ ମିଶାଇଲ୍ ଭଳି ସମ୍ବେଦନଶୀଳ ପ୍ରଯୁକ୍ତିବିଦ୍ୟା ଉପରେ ବିଶ୍ୱାସ ଦେଖାଇ ନ ଥିଲା।
ପ୍ରତିରକ୍ଷା ୱେବସାଇଟ ଅନୁଯାୟୀ, ଚାଇନା J-10CE ଲଢ଼ୁଆ ବିମାନ କିମ୍ବା HQ-9 ବାୟୁ ପ୍ରତିରକ୍ଷା ପ୍ରଣାଳୀ ଭଳି ଏହାର ଅନ୍ୟ ଅସ୍ତ୍ରଶସ୍ତ୍ର ପାଇଁ ସ୍ବତନ୍ତ୍ର ରପ୍ତାନି ସଂସ୍କରଣ ତିଆରି କରେ, କିନ୍ତୁ ହାଇପରସୋନିକ ମିଶାଲ୍ ଏତେ ଉନ୍ନତ ଏବଂ ସମ୍ବେଦନଶୀଳ ଯେ ସେଗୁଡ଼ିକୁ ବିଦେଶକୁ ପଠାଇବାକୁ ଚାହୁଁନାହିଁ। ଏହା ଚାଇନାର ନୀତି ଯେ ଅତ୍ୟନ୍ତ ଆଧୁନିକ ଏବଂ ଶକ୍ତିଶାଳୀ ଅସ୍ତ୍ରଶସ୍ତ୍ର, ଯାହା ବିଶ୍ୱରେ ସନ୍ତୁଳନକୁ ବିଗାଡ଼ିପାରେ, ଅନ୍ୟ ଦେଶକୁ ଦିଆଯିବା ଉଚିତ୍ ନୁହେଁ।
ପାକିସ୍ତାନ ଚାଇନା ସହାୟତାରେ ଏହି ମିଶାଇଲ୍ଗୁଡ଼ିକୁ କିଣିବାକୁ ଚାହୁଁଥିଲା ଏବଂ ସେଗୁଡ଼ିକୁ ନିଜେ ତିଆରି କରିବା ଶିଖିବାକୁ ମଧ୍ୟ ଚାହୁଁଥିଲା, କିନ୍ତୁ ଚାଇନା ମନା କରିବା ପାକିସ୍ତାନକୁ ମହଙ୍ଗା ପଡ଼ିଛି। ଏହା ଭାରତ ସହିତ ପ୍ରତିଯୋଗିତା କରିବା ପାଇଁ ପାକିସ୍ତାନର ପ୍ରୟାସକୁ ବାଧା ଦେଇପାରେ। ସୂତ୍ର ଅନୁଯାୟୀ, ଚାଇନା ହାଇପରସୋନିକ ପ୍ରଯୁକ୍ତିବିଦ୍ୟାକୁ ତା’ର ରଣନୈତିକ ସୁରକ୍ଷାର ଏକ ଗୁରୁତ୍ୱପୂର୍ଣ୍ଣ ଅଂଶ ବୋଲି ମନେ କରେ, ବିଶେଷକରି ଆମେରିକା ଏବଂ ତା’ର ସହଯୋଗୀ ଦେଶଗୁଡ଼ିକ ବିରୁଦ୍ଧରେ। ଏହି କାରଣରୁ ସେ ପାକିସ୍ତାନ ଭଳି ନିକଟତମ ଦେଶକୁ ମଧ୍ୟ ଏପରି ସମ୍ବେଦନଶୀଳ କ୍ଷେପଣାସ୍ତ୍ର ପ୍ରଯୁକ୍ତିବିଦ୍ୟା ଦେବାକୁ ଚାହୁଁନାହିଁ କାରଣ ଏହା ଅନ୍ତର୍ଜାତୀୟ ଚାପ ଏବଂ ରାଜନୈତିକ ଉତ୍ତେଜନା ବୃଦ୍ଧି କରିପାରେ।
ଅନ୍ୟ ଏକ କାରଣ ହେଉଛି ଯେ, ଚାଇନା ବର୍ତ୍ତମାନ ଏହି ମିଶାଇଲ୍ଗୁଡ଼ିକୁ ଆହୁରି ଉନ୍ନତ କରିବା ଏବଂ ବଡ଼ ପରିମାଣରେ ଉତ୍ପାଦନ କରିବା ପାଇଁ କାମ କରୁଛି। ଏହି ପ୍ରକ୍ରିୟା ସମାପ୍ତ ନ ହେବା ପର୍ଯ୍ୟନ୍ତ, ସେ ଏହାକୁ ଅନ୍ୟ କୌଣସି ଦେଶକୁ ସ୍ଥାନାନ୍ତର କରିବାକୁ ପ୍ରସ୍ତୁତ ନୁହଁନ୍ତି।
