ନୂଆଦିଲ୍ଲୀ,୨୫।୧: ଆନ୍ତର୍ଜାତୀୟ କ୍ରିକେଟ ପରିଷଦ (ICC) ର କଠୋର ଆଭିମୁଖ୍ୟ ପରେ ନରମିଲା ପାକିସ୍ତାନ କ୍ରିକେଟ ବୋର୍ଡ (PCB)। ଶେଷରେ ଆଗାମୀ ୨୦୨୬ ଟି-୨୦ ବିଶ୍ୱକପ୍ ପାଇଁ ନିଜର ୧୫ ଜଣିଆ ଦଳ ଘୋଷଣା କରିଛି। ବାଂଲାଦେଶକୁ ସମର୍ଥନ ଜଣାଇ ପାକିସ୍ତାନ ଏହି ଟୁର୍ଣ୍ଣାମେଣ୍ଟ ବୟକଟ୍ କରିବ ବୋଲି ଚର୍ଚ୍ଚା ହେଉଥିଲା। ତେବେ ରବିବାର ଦଳ ଘୋଷଣା କରି PCB ସମସ୍ତ ଅନିଶ୍ଚିତତାର ଅନ୍ତ ଘଟାଇଛି।
ଏହି ମେଗା ଇଭେଣ୍ଟ ପାଇଁ ସଲମାନ ଅଲି ଅଘାଙ୍କୁ ପାକିସ୍ତାନ ଦଳର ଅଧିନାୟକ ଭାବେ ନିଯୁକ୍ତ କରିଛି। ଆକିବ ଜାଭେଦ ଓ ମୁଖ୍ୟ କୋଚ୍ ମାଇକ୍ ହେସନଙ୍କ ନେତୃତ୍ୱରେ ଚୟନ କମିଟି ଏକ ସନ୍ତୁଳିତ ଏବଂ ଆକ୍ରମଣାତ୍ମକ ଦଳ ଗଠନ ଉପରେ ଗୁରୁତ୍ୱ ଦେଇଛି।
ଦଳର ଦୁଇ ଅଭିଜ୍ଞ ଖେଳାଳି ବାବର ଆଜମ ଏବଂ ଶାହିନ ଶାହା ଆଫ୍ରିଦି ପୁଣି ଥରେ ଦଳକୁ ଫେରିଛନ୍ତି। ବାବର ବ୍ୟାଟିଂ ବିଭାଗକୁ ମଜବୁତ କରୁଥିବା ବେଳେ ଶାହିନ ଓ ନସିମ ଶାହା ପେସ୍ ବୋଲିଂର ନେତୃତ୍ୱ ନେବେ।
ତେବେ ଖରାପ ଫର୍ମ ଓ ଫିଟନେସ୍ ପାଇଁ ଦ୍ରୁତ ବୋଲର ହାରିସ ରଉଫଙ୍କୁ ଦଳରୁ ବାଦ ଦିଆଯାଇଛି। ସେହିପରି ଅଭିଜ୍ଞ ୱିକେଟକିପର ବ୍ୟାଟର ମହମ୍ମଦ ରିଜୱାନ ମଧ୍ୟ ଦଳରେ ସ୍ଥାନ ପାଇବାରେ ବିଫଳ ହୋଇଛନ୍ତି।
ପାକିସ୍ତାନର ୧୫ ଜଣିଆ ଦଳ: ସଲମାନ ଅଲି ଅଘା (ଅଧିନାୟକ), ଅବରାର ଅହମ୍ମଦ, ବାବର ଆଜମ, ଫହିମ ଅଶ୍ରଫ, ଫଖର ଜମାନ, ଖ୍ୱାଜା ମହମ୍ମଦ ନାଫେ (ଉଇକେଟ ରକ୍ଷକ), ମହମ୍ମଦ ନୱାଜ, ମହମ୍ମଦ ସଲମାନ ମିର୍ଜା, ନସିମ ଶାହା, ସାହିବଜାଦା ଫରହାନ (ଉଇକେଟ ରକ୍ଷକ), ସାଇମ ଆୟୁବ, ଶାହିନ ଶାହା ଆଫ୍ରିଦି, ଶାଦାବ ଖାନ, ଉସମାନ ଖାନ (ଉଇକେଟ ରକ୍ଷକ) ଏବଂ ଉସମାନ ତାରିକ।
ପାକିସ୍ତାନର ମ୍ୟାଚ୍ ସୂଚୀ:
ଫେବୃଆରୀ ୭: ପାକିସ୍ତାନ ବନାମ ନେଦରଲ୍ୟାଣ୍ଡ (କଲୋମ୍ବୋ)
ଫେବୃଆରୀ ୧୦: ପାକିସ୍ତାନ ବନାମ ଆମେରିକା (କଲୋମ୍ବୋ)
ଫେବୃଆରୀ ୧୫: ଭାରତ ବନାମ ପାକିସ୍ତାନ (କଲୋମ୍ବୋ)
ଫେବୃଆରୀ ୧୮: ପାକିସ୍ତାନ ବନାମ ନାମିବିଆ (କଲୋମ୍ବୋ)
