ଲଣ୍ଡନ୍, ୨୭।୮: ପାକିସ୍ତାନ କ୍ରିକେଟ୍ରେ ସବୁକିଛି ସମ୍ଭବ। ନିଜର ଖେଳ ପ୍ରଦର୍ଶନ ତୁଳନାରେ ଅଜବ ନିଷ୍ପତ୍ତି ପାଇଁ ଚର୍ଚ୍ଚାରେ ରହୁଥିବା ପାକିସ୍ତାନ ଟିମ୍ ପୁଣି ଏକ ଚମକାଇବା ଭଳି କାମ କରିଛି। ଇଂଲଣ୍ଡ ବିପକ୍ଷରେ ଲଣ୍ଡନ୍ର ଲର୍ଡସଠାରେ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟ ମ୍ୟାଚ୍ରେ ପାକିସ୍ତାନ ତା’ର ପ୍ଲେଇଂ-୧୧ରୁ ସଲମାନ ଅଲ୍ଲୀ ଆଗାଙ୍କୁ ବାଦ୍ ଦେଇଛି, ଯିଏ କି ଏହି ସିରିଜ୍ର ପ୍ରଥମ ମ୍ୟାଚ୍ରେ ଦଳର ନେତୃତ୍ୱ ନେଉଥିଲେ।
ଗୁରୁବାର ଅଗଷ୍ଟ ୨୭ରୁ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟରେ ତାରକା ବ୍ୟାଟର ତଥା ନିୟମିତ ଅଧିନାୟକ ବାବର ଆଜମ ଦଳକୁ ଫେରିଛନ୍ତି। ଆଘାତ ସମସ୍ୟା ଯୋଗୁ ବାବର ପ୍ରଥମ ଲିଡ୍ସ ଟେଷ୍ଟ ଖେଳିପାରି ନ ଥିଲେ, ଯେଉଁଥିରେ ପାକିସ୍ତାନ ପରାଜିତ ହୋଇଥିଲା। ସେହି ମ୍ୟାଚ୍ରେ ବାବରଙ୍କ ଅନୁପସ୍ଥିତିରେ ସଲମାନ ଅଲ୍ଲୀ ଆଗା ଦଳର କମାଣ ସମ୍ଭାଳିଥିଲେ। ତେବେ ବାବର ଫେରିବା କ୍ଷଣି ଟିମ୍ ମ୍ୟାନେଜମେଣ୍ଟ ସଲମାନଙ୍କୁ ସିଧାସଳଖ ପ୍ଲେଇଂ-୧୧ରୁ ବାହାରର ରାସ୍ତା ଦେଖାଇଛି।
ଏହି ନିଷ୍ପତ୍ତିକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରଥମ ଟେଷ୍ଟରେ ସଲମାନ ବ୍ୟାଟର ଭାବେ ୨୧ ଓ ୪ ରନ୍ କରି ନିରାଶ କରିଥିଲେ ସତ, ମାତ୍ର ଦଳର ଅନ୍ୟତମ ବ୍ୟାଟର ସୌଦ ଶକିଲ ମଧ୍ୟ ସେହି ମ୍ୟାଚ୍ରେ ମାତ୍ର ୫ ଓ ୧୪ ରନ୍ କରିଥିଲେ। ୨୦୨୫ ଜାନୁଆରୀରୁ ଏପର୍ଯ୍ୟନ୍ତ ସଲମାନ ୯ଟି ଟେଷ୍ଟରୁ ୩ଟି ଅର୍ଦ୍ଧଶତକ ହାସଲ କରିଥିବା ବେଳେ ଶକିଲ ୮ଟି ଟେଷ୍ଟରୁ ୨ଟି ଅର୍ଦ୍ଧଶତକ ହାସଲ କରିଛନ୍ତି।
ସମାନ ପ୍ରଦର୍ଶନ ସତ୍ତ୍ୱେ ଯେଉଁ ଖେଳାଳିଙ୍କୁ ପ୍ରଥମ ମ୍ୟାଚ୍ରେ କାପ୍ଟେନ୍ସି ପାଇଁ ଯୋଗ୍ୟ ମନେକରାଯାଇଥିଲା, ତାଙ୍କୁ ପରବର୍ତ୍ତୀ ମ୍ୟାଚ୍ରେ ବାଦ୍ ଦେବା ପାକିସ୍ତାନ କ୍ରିକେଟ୍ର ଅସ୍ଥିର କାର୍ଯ୍ୟଶୈଳୀକୁ ପୁଣି ପଏଣ୍ଟ ଆଉଟ୍ କରିଛି।