କରାଚି,୨୪।୯: ଏସିଆନ ଗେମ୍ସ ୨୦୨୬ରେ ପାକିସ୍ତାନ କ୍ରିକେଟ ଟିମ ଆସନ୍ତା ସେପ୍ଟେମ୍ବର ୨୮ ରୁ ନିଜ ଅଭିଯାନ ଆରମ୍ଭ କରିବ। ତେବେ କ୍ୱାର୍ଟର ଫାଇନାଲରେ ପାକିସ୍ତାନ କେଉଁ ଦଳକୁ ଭେଟିବ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହା ମଧ୍ୟରେ ଭାରତ ବିପକ୍ଷ ସମ୍ଭାବ୍ୟ ମ୍ୟାଚ୍କୁ ନେଇ ପାକିସ୍ତାନର ମୁଖ୍ୟ କୋଚ ମାଇକ ହେସନ ବଡ଼ ବୟାନ ଦେଇଛନ୍ତି।
ହେସନ କହିଛନ୍ତି, ଯଦି ଏସିଆନ ଗେମ୍ସରେ ଭାରତ ବିପକ୍ଷରେ ମ୍ୟାଚ ହୁଏ, ତେବେ ତାଙ୍କ ଦଳ ଭାରତ ଉପରେ ଚାପ ପକାଇବାକୁ ଚେଷ୍ଟା କରିବ। ତେବେ ଏହା ପୂର୍ବରୁ ପାକିସ୍ତାନର ଧ୍ୟାନ କ୍ୱାର୍ଟର ଫାଇନାଲ ଜିତିବା ଉପରେ ରହିଛି ବୋଲି ସେ ସ୍ପଷ୍ଟ କରିଛନ୍ତି।
ଏସିଆନ ଗେମ୍ସରେ ଭାରତ ଓ ପାକିସ୍ତାନର ପୁରୁଷ କ୍ରିକେଟ ଦଳ ପୂର୍ବରୁ ପରସ୍ପର ବିପକ୍ଷରେ ଖେଳିନାହାନ୍ତି। ତେବେ ଏଥର ଉଭୟ ଦଳ ସେମିଫାଇନାଲରେ ମୁହାଁମୁହିଁ ହେବାର ସମ୍ଭାବନା ରହିଛି। ଭାରତ ମଧ୍ୟ ୨୮ ସେପ୍ଟେମ୍ବରରେ କ୍ୱାର୍ଟର ଫାଇନାଲ ଖେଳିବ। ଯଦି ଉଭୟ ଦଳ ନିଜ ନିଜ କ୍ୱାର୍ଟର ଫାଇନାଲ ଜିତନ୍ତି, ତେବେ ଅକ୍ଟୋବର ୧ରେ ଭାରତ-ପାକିସ୍ତାନ ମୁକାବିଲା ହୋଇପାରେ।
ହେସନ ଏସିଆ କପ୍ର ଉଦାହରଣ ଦେଇ କହିଛନ୍ତି ଯେ, ଭାରତ ବିପକ୍ଷରେ ମ୍ୟାଚ ହେଲେ ତାଙ୍କ ଦଳ ପ୍ରତିପକ୍ଷ ଉପରେ ଚାପ ସୃଷ୍ଟି କରିବାକୁ ଚେଷ୍ଟା କରିବ। ପାକିସ୍ତାନର କ୍ୱାର୍ଟର ଫାଇନାଲ ମୁକାବିଲା ପୁଲ-ବିର ବିଜେତା ଦଳ ବିପକ୍ଷରେ ହେବ। ଏହି ପୁଲ୍ରେ ମାଲେସିଆ, ଓମାନ ଏବଂ ହଂକଂ ରହିଛନ୍ତି।
ହେସନ କହିଛନ୍ତି ଯେ, ସେ ଏବେଠାରୁ ଅଧିକ ଦୂରର କଥା ଚିନ୍ତା କରୁନାହାନ୍ତି। ପ୍ରଥମେ କ୍ୱାର୍ଟର ଫାଇନାଲ ଜିତିବା ତାଙ୍କ ଦଳର ଲକ୍ଷ୍ୟ। ଭିନ୍ନ ଭିନ୍ନ ପିଚ ଓ ପରିସ୍ଥିତି ଅନୁଯାୟୀ ଗତ ତିନି ଦିନ ଧରି ଖେଳାଳିମାନଙ୍କୁ ଅଭ୍ୟାସ କରାଯାଇଛି। ଏସିଆନ ଗେମ୍ସ ୨୦୨୬ରେ ପାକିସ୍ତାନ ଦଳର ଅଧିନାୟକ ଅଛନ୍ତି ସାହିବଜାଦା ଫରହାନ। ଏହି ପ୍ରତିଯୋଗିତା ଫରହାନଙ୍କ ପାଇଁ ଅଧିନାୟକତ୍ୱର ଅନୁଭବ ହାସଲ କରିବାର ଏକ ଭଲ ସୁଯୋଗ।
ତେବେ ଏସିଆନ ଗେମ୍ସରେ ଫରହାନଙ୍କ ଭୂମିକାକୁ ଆଧାର କରି ପାକିସ୍ତାନର ଭବିଷ୍ୟତ ଅଧିନାୟକତ୍ୱ ସମ୍ପର୍କରେ କୌଣସି ନିଷ୍ପତ୍ତି ନିଆଯିବ ନାହିଁ ବୋଲି ହେସନ ସ୍ପଷ୍ଟ କରିଛନ୍ତି। ଭବିଷ୍ୟତରେ ଅଧିନାୟକ କିଏ ହେବେ, ସେନେଇ ପାକିସ୍ତାନ କ୍ରିକେଟ ବୋର୍ଡର ଚେୟାରମ୍ୟାନ ଓ ଚୟନ କମିଟି ନିଷ୍ପତ୍ତି ନେବେ ବୋଲି ସେ କହିଛନ୍ତି।