ବରଗଡ଼,୩୦।୬(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ରବି ଧାନ ସଂଗ୍ରହ ପ୍ରକ୍ରିୟା ସୋମବାର ସରିଯିବ। ହେଲେ ଜିଲାରେ ଧାନ କିଣାବିକା ସମସ୍ୟା ଅସମାହିତ ରହିଛି। ବିକ୍ରି ପାଇଁ ଚାଷୀମାନେ ମଣ୍ଡିକୁ ଧାନ ଆଣିଛନ୍ତି। ମାତ୍ର ଅନେକ ଚାଷୀଙ୍କ ଧାନ ଏପର୍ଯ୍ୟନ୍ତ ଭଣ୍ଡାରେ ପଡ଼ି ରହିଛି। ଅନ୍ୟପକ୍ଷରେ ମଣ୍ଡିକୁ ଆସି ନଥିବା ଧାନ ବେପାରୀ ମାଧ୍ୟମରେ ସିଧାସଳଖ ଜିଲାର କେତେକ ରାଇସ ମିଲକୁ ଯାଉଥିବା ଏବଂ ମଣ୍ଡିରେ ଫଲ୍ସ ଏଣ୍ଟ୍ରି କରାଯାଇଥିବା ଅଭିଯୋଗ ହୋଇଛି। ଏପରିକି ବିଭିନ୍ନ ମଣ୍ଡିରେ ବିକ୍ରି ଅପେକ୍ଷାରେ ପଡ଼ି ରହିଥିବା ଧାନକୁ ଉଠାଇବା ପାଇଁ ଚାଷୀମାନେ ବାରମ୍ବାର ବିଭାଗୀୟ ଅଧିକାରୀମାନଙ୍କ ଦୃଷ୍ଟି ଆକର୍ଷଣ ସହ ଆନ୍ଦୋଳନକୁ ମଧ୍ୟ ଓହ୍ଲାଇଛନ୍ତି। ତଥାପି ସ୍ଥାନୀୟ ପ୍ରଶାସନ ଏବଂ ଜନ ପ୍ରତିନିଧି ନିର୍ବିକାର ରହିଥିବା ଅଭିଯୋଗ କରି ଚାଷୀ ଅସନ୍ତୋଷ ବଢି ଚାଲିଛି। ଏହି କ୍ରମରେ ରବିବାର ଜିଲାର ବରପାଲି ବ୍ଲକ ଅନ୍ତର୍ଗତ ରେମତା, ବରଗଡ଼ ବ୍ଲକ ଅନ୍ତର୍ଗତ କୁର୍ଲା ଆଦି ଗ୍ରାମର ଚାଷୀମାନେ ଜିଲା ମୁଖ୍ୟ ଯୋଗାଣ ଅଧିକାରୀଙ୍କ କାର୍ଯ୍ୟାଳୟକୁ ପହଞ୍ଚିଥିଲେ। ରବିବାର ଛୁଟି ଦିବସ ଥିବାବେଳେ କାର୍ଯ୍ୟାଳୟରେ ମଧ୍ୟ ତାଲା ଝୁଲୁଥିଲା। ତେବେ ଧାନ ସଂଗ୍ରହ ପ୍ରକ୍ରିୟାରେ ଏଭଳି ସ୍ଥିତି ଉପୁଜିଥିବା ସତ୍ତ୍ବେ ବିଭାଗୀୟ ଅଧିକାରୀମାନଙ୍କ ଅନୁପସ୍ଥିତି ନେଇ ଚାଷୀମାନେ ଉଦ୍ବେଗ ପ୍ରକାଶ କରିଥିଲେ। କାର୍ଯ୍ୟାଳୟକୁ ଆସି ଅଧିକାରୀମାନେ ମଣ୍ଡିରେ ପଡିଥିବା ସମସ୍ତ ଧାନକୁ ଉଠାଇବା ନେଇ ପ୍ରତିଶ୍ରୁତି ନ ଦେବା ପର୍ଯ୍ୟନ୍ତ ସେମାନେ କାର୍ଯ୍ୟାଳୟରୁ ଯିବେ ନାହିଁ ବୋଲି ଅଡି ବସିଥିଲେ। ତେବେ ପରେ ଫୋନରେ କିଛି ଚାଷୀ ପ୍ରତିନିଧି ବିଭାଗୀୟ ଅଧିକାରୀମାନଙ୍କ ସହିତ ସମସ୍ୟା ଉପରେ ଆଲୋଚନା କରିଥିଲେ ଏବଂ ସୋମବାର ସୁଦ୍ଧା ସମସ୍ତ ଧାନ ଉଠାଯିବା ନେଇ ପ୍ରତିଶ୍ରୁତି ପାଇଥିଲେ। ଏହାପରେ ଚାଷୀମାନେ ଜିଲା ଯୋଗାଣ ଅଧିକାରୀଙ୍କ କାର୍ଯ୍ୟାଳୟରୁ ଘରକୁ ଫେରିଥିଲେ। ଅନ୍ୟପକ୍ଷରେ ବିଭାଗୀୟ ଅଧିକାରୀମାନେ ବାରମ୍ବାର ପ୍ରତିଶ୍ରୁତି ଦେଇ ଚାଲିଛନ୍ତି, କିନ୍ତୁ ପ୍ରତିଶ୍ରୁତି ମୁତାବକ ମଣ୍ଡିରେ ପଡିଥିବା ଧାନ ଉଠାଣ ହେଉ ନଥିବାରୁ ଚାଷୀମାନେ ଏବେ ମଧ୍ୟ ଚିନ୍ତାରେ ରହିଛନ୍ତି। ରେମତା ଗ୍ରାମର ଚାଷୀ ଚୈତନ୍ୟ ପଟେଲ କହିଛନ୍ତି, ରେମତା ମଣ୍ଡିରେ ୩୪ଚାଷୀଙ୍କ ୨୮୭୦ କୁଇଣ୍ଟାଲ ଧାନ ପଡ଼ି ରହିଛି। ଏହି ଧାନ ଉଠାଇବା ପାଇଁ ଶନିବାର ଗ୍ରାମର ଚାଷୀମାନେ ଜିଲା ଯୋଗାଣ ଅଧିକାରୀଙ୍କ କାର୍ଯ୍ୟାଳୟକୁ ଆସିଥିଲେ। ସମସ୍ତ ଧାନ ଉଠାଣ ନେଇ ମିଲର୍ସମାନଙ୍କୁ ଟାର୍ଗେଟ ଦିଆଗଲା ବୋଲି ଯୋଗାଣ ଅଧିକାରୀ କହିଥିଲେ। କିନ୍ତୁ ମାତ୍ର ୧୮୦୦ କୁଇଣ୍ଟାଲର ଟାର୍ଗେଟ ଆସିଥିବାରୁ କେଉଁ ଚାଷୀଙ୍କ ଧାନ ଉଠିବ ଏବଂ କାହାର ଧାନ ମଣ୍ଡିରେ ପଡି ରହିବ, ତାକୁ ନେଇ ଚାଷୀଙ୍କ ମଧ୍ୟରେ ମତଭେଦ ସୃଷ୍ଟି କରାଯାଉଛି। ଫଳରେ ସମୁଦାୟ ଧାନ ଉଠାଇବା ପାଇଁ ଟାର୍ଗେଟ ଦିଆଯାଉ ଏବଂ ସମସ୍ତ ଧାନ ମଣ୍ଡିରୁ ଉଠାଯାଉ ବୋଲି ସେ ଦାବି କରିଛନ୍ତି। ସେହିପରି ଧାନ ବିକି ପାରି ନ ଥିବାରୁ ସ୍କୁଲ, କଲେଜରେ ଚାଷୀମାନେ ସେମାନଙ୍କ ପିଲାଛୁଆଙ୍କ ନାମ ଲେଖାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ଅନ୍ୟଜଣେ ଚାଷୀ ଲଲିତ ଦାଶ କହିଛନ୍ତି। କୁର୍ଲା ଗ୍ରାମର ଚାଷୀ ରବିନ୍ଦ୍ର ଖମାରୀ କହିଛନ୍ତି, ଖରିଫ ଚାଷ ସମୟ ଗଡ଼ି ଚାଲିଛି। ମାତ୍ର ଚାଷୀମାନେ ରବି ଧାନ ଏପର୍ଯ୍ୟନ୍ତ ବିକ୍ରି କରି ପାରି ନଥିବାରୁ ଖରିଫ ଚାଷକାର୍ଯ୍ୟ କରି ପାରୁ ନାହାନ୍ତି। ଅପରପକ୍ଷରେ ବର୍ଷା ଆସି ଯାଇଥିବାରୁ ଜିଲାର ଚାଷୀମାନଙ୍କ ଚିନ୍ତା ବଢି ଯାଇଛି।
