ବ୍ରହ୍ମପୁର ଅଫିସ,୧୬ା୧୦: ବ୍ରହ୍ମପୁରସ୍ଥିତ ମହାରାଜା କୃଷ୍ଣଚନ୍ଦ୍ର ଗଜପତି ମେଡିକାଲ କଲେଜ ଏବଂ ହସ୍ପିଟାଲରେ ରୋଗୀସେବା ବିପର୍ଯ୍ୟସ୍ତ ହୋଇପଡ଼ିଛି। ହୃଦ୍ରୋଗ (କାର୍ଡିଓଲୋଜି) ବିଭାଗର ସ୍ପେଶାଲ ନିୟୁ ବର୍ନ କେୟାର ୟୁନିଟ୍ (ଏସ୍ଏନ୍ସିୟୁ) ୱାର୍ଡରେ ଶନିବାର ଗୋଟିଏ ସିଲିଣ୍ଡରରୁ ୩ ଶିଶୁଙ୍କୁ ବିପଦପୂର୍ଣ୍ଣ ଭାବେ ଅକ୍ସିଜେନ ଯୋଗାଣ ହେଉଥିବା ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। କାର୍ଡିଓଲୋଜି ବିଭାଗ ଏସ୍ଏନ୍ସିୟୁରେ ହୃଦ୍ଜନିତ ସମସ୍ୟା ଥିବା ୪ ଶିଶୁଙ୍କୁ କିଛି ଦିନ ପୂର୍ବରୁ ଭର୍ତ୍ତି କରାଯାଇଥିଲା। ସେମାନଙ୍କୁ ଶନିବାର ଇକୋ ଟେଷ୍ଟ ଲାଗି ନିଆଯାଉଥିବାବେଳେ ଗୋଟିଏ ସିଲିଣ୍ଡରରୁ ଶିଶୁଙ୍କୁ ଅକ୍ସିଜେନ୍ ସଂଯୋଗ ଦିଆଯାଇଥିବା ଦେଖିବାକୁ ମିଳିଥିଲା। ଜଣେ କର୍ମଚାରୀ ଅକ୍ସିଜେନ ସିଲିଣ୍ଡରଙ୍କୁ ଟାଣି ଟାଣି ନେଉଥିବାବେଳେ ଶିଶୁଙ୍କୁ ସେମାନଙ୍କ ମା’ମାନେ କୋଳରେ ଧରି ପଛେ ପଛେ ଯାଉଥିଲେ। ଗୋଟିଏ ସିଲିଣ୍ଡରରୁ ଜଣେ କିମ୍ବା ୨ ଶିଶୁଙ୍କୁ ଅକ୍ସିଜେନ ଦିଆଯିବା କଥା। କିନ୍ତୁ ଥରକେ ୩ ଜଣଙ୍କୁ ଅକ୍ସିଜେନ ଦିଆଯିବା ଶିଶୁଙ୍କ ଜୀବନ ପ୍ରତି ଖେଳ ବୋଲି ଚର୍ଚ୍ଚା ହେଉଛି। ଏ ନେଇ ଏମ୍କେସିଜି ଅଧୀକ୍ଷକ ପ୍ରଫେସର ଡା. ସନ୍ତୋଷ ମିଶ୍ର କହିଛନ୍ତି, ଗୋଟିଏ ସିଲିଣ୍ଡରରୁ ୩ ଶିଶୁଙ୍କୁ ଅକ୍ସିଜେନ ଦିଆଗଲେ କିଛି ଅସୁବିଧା ନାହିଁ। ଶିଶୁଙ୍କର ଇକୋ ପରୀକ୍ଷା ପାଇଁ ନିଆଯାଉଥିଲା। ତେବେ ସତର୍କତା ଦୃଷ୍ଟିରୁ ସେମାନଙ୍କୁ ପାଇପ୍ ଯୋଗେ ଅକ୍ସିଜେନ ଦିଆଯାଉଥିଲା ବୋଲି ସେ କହିଛନ୍ତି। ପ୍ରକାଶ ଯେ, ଦୁର୍ବଳ ଭିତ୍ତିଭୂମିକୁ ନେଇ ଏମ୍କେସିଜି ମେଡିକାଲ କଲେଜ ରାଜ୍ୟରେ ଚର୍ଚ୍ଚାର ଶିରୋନାମ ପାଲଟିଛି। ମେଡିକାଲର ସୁପରସ୍ପେଶାଲିଟି ବିଭାଗରେ ପ୍ରଧାନମନ୍ତ୍ରୀ ସ୍ବାସ୍ଥ୍ୟ ସୁରକ୍ଷା ଯୋଜନା (ପିଏମ୍ଏସ୍ଏସ୍ୱାଇ)ରେ ପ୍ରାୟ ୧୫୦ କୋଟି ଟଙ୍କା ବ୍ୟୟରେ ନିର୍ମିତ ଅତ୍ୟାଧୁନିକ କୋଠାର ପଞ୍ଚମ ମହଲାରେ ଥିବା ଓଟି କମ୍ପ୍ଲେକ୍ସରେ ଅଗଷ୍ଟ ୨୬ରେ ଭୟାବହ ଅଗ୍ନିକାଣ୍ଡ ଘଟିଥିଲା। ସୌଭାଗ୍ୟବଶତଃ ଏଥିରେ କେହି ମୃତାହତ ହୋଇ ନ ଥିଲେ। ପରେ ଉକ୍ତ କୋଠାର ବିଭିନ୍ନ ବିଭାଗରୁ ସିଲିଂ ଖସୁଛି। ସେପ୍ଟେମ୍ବର ୮ରେ ଚତୁର୍ଥ ମହଲାରେ ଥିବା ଅନ୍ୟ ଏକ ଓଟି କମ୍ପ୍ଲେକ୍ସରୁ ସିଲିଂ ଖସିଥିଲା। ସେହିପରି ସେପ୍ଟେମ୍ବର ୯ ଏବଂ ଅକ୍ଟୋବର ୧୪ରେ ଏଣ୍ଡୋକ୍ରାଇନୋଲୋଜି ବିଭାଗର ସିଲିଂ ଖସିିଥିଲା। ବାରମ୍ବାର ଏଭଳି ଅଘଟଣକୁ ନେଇ ରୋଗୀ ଓ ସେମାନଙ୍କ ସମ୍ପର୍କୀୟମାନେ ଭୟଭୀତ ଅବସ୍ଥାରେ ରହୁଛନ୍ତି।
