ଉମରକୋଟ,୨୩।୧୨(ସ୍ବ.ପ୍ର.): ଗତ ୧୫ ତାରିଖରେ ଉମରକୋଟ ସହର ଦେଇ ଯାଇଥିବା ରାସ୍ତାର ଶୋଚନୀୟ ଅବସ୍ଥାକୁ ନେଇ ଉମରକୋଟ ମିଳିତ ନାଗରିକ ମଞ୍ଚ ପକ୍ଷରୁ ସହରର ଡିଏନ୍କେ ଛକରେ ୨ ଘଣ୍ଟିଆ ରାସ୍ତାରୋକୋ କରାଯାଇଥିଲା। ରାସ୍ତାରୋକୋରେ ସାମିଲ ହୋଇ ଉମରକୋଟ ବିଧାୟକ, ଭାଜପା ଓ କଂଗ୍ରେସ ନେତାମାନେ ପୂର୍ତ୍ତ ବିଭାଗର କାର୍ଯ୍ୟଧାରାକୁ ନେଇ ପ୍ରତିବାଦ କରିଥିଲେ। ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଘଟଣାସ୍ଥଳରେ ପହଞ୍ଚତ୍ ୪ ଦିନ ଭିତରେ କାର୍ଯ୍ୟ ଆରମ୍ଭ ହେବ ବୋଲି ପ୍ରତିଶ୍ରୁତି ଦେବାପରେ ରାସ୍ତାରୋକୋ ହଟିଥିଲା। କିନ୍ତୁ ଯେଉଁ ଠିକାଦାର ଧୋଡ୍ରାରୁ ଉମରକୋଟ ରାସ୍ତା କାମର ଠିକା ପାଇଥିଲେ ସେ ନିର୍ଦ୍ଧାରିତ ତାରିଖ ଭିତରେ ସିକ୍ୟୁରିଟି ଅର୍ଥ ପୈଠ କରିବାରେ ବିଫଳ ହେବାରୁ ପୂର୍ତ୍ତ ବିଭାଗ ପୁଣି ସାନି ଟେଣ୍ଡର ଆହ୍ବାନ କରିଥିବା ସୂଚନା ମିଳିଛି। ୨୦ତାରିଖରେ ଟେଣ୍ଡର ଆହ୍ବାନ କରାଯାଇଛି। ୨୭ ତାରିଖ ଟେଣ୍ଡର ପ୍ରକ୍ରିୟାରେ ସାମିଲହେବାର ଶେଷ ତାରିଖ। ଏବେ ରାସ୍ତା କାମ କେବେ ଆରମ୍ଭ ହେବ ତାହାକୁ ନେଇ ଅତିଶ୍ଚିତତା ରହିଛି। ପୂର୍ତ୍ତ ବିଭାଗ ରାସ୍ତାରେ ୨୦ ଟନ୍ ପର୍ଯ୍ୟନ୍ତ ମାଲ ପରିବହନ କଲେ ରାସ୍ତା ଶୀଘ୍ର ନଷ୍ଟ ହୁଏନାହିଁ। ଉମରକୋଟ ଦେଇ ଯାଇଥିବା ରାସ୍ତା ପଡ଼ୋଶୀ ରାଜ୍ୟକୁ ସଂଯୋଗ କରେ। ଏଠାରେ ଓଭରଲୋଡ୍ ପରିବହନ ମାତ୍ରାଧିକ ବଢ଼ିବାରେ ଲାଗିଛି। ବର୍ତ୍ତମାନ ଭାରତମାଳା ପ୍ରକଳ୍ପ ରାସ୍ତା କାମ ଚାଲିଥିବା ଯୋଗୁ ଗାଡ଼ିରେ ୨୫ରୁ ୩୦ ଟନ୍ ମାଲ ପରିବହନ କରାଯାଉଛି। ପଡ଼ୋଶୀ କଳାହାଣ୍ଡିରୁ ଓଭର ଲୋଡିଂ ହୋଇ ପ୍ରତିଦିନ ଧଳା ପାଉଡର ମଧ୍ୟ ଆସୁଛି। ପୋଲିସ ଓ ପରିବହନ ବିଭାଗ ସବୁ ଜାଣି ଚୁପ୍ ରହୁଛି ବୋଲି ଲୋକେ ଅଭିଯୋଗ କରିଛନ୍ତି। ଏହି ଓଭରଲୋଡିଂ ଗାଡ଼ି ଯିବା ଆସିବା କରୁଥିବାରୁ ରାସ୍ତା ଖରାପ ହେଉଛି ବୋଲି ସେମାନେ ଅଭିଯୋଗ କରିଛନ୍ତି। ଓଭରଲୋଡିଂ ଭାରିଯାନ ପ୍ରତି ବିଭାଗୀୟ ଅଧିକାରୀମାନେ କୋହଳ ମନୋଭାବ କାହିଁକି ଦେଖାଉଛନ୍ତି ବୋଲି ସେମାନେ ପ୍ରଶ୍ନ କରିଛନ୍ତି। ଜିଲା ପରିବହନ ବିଭାଗ ଅଧିକାରୀଙ୍କୁ ଏ ବିଷୟରେ ପଚାରିବାରୁ ସେ କହିଛନ୍ତି, ଓଭରଲୋଡିଂ ଚେକିଂ କରାଯାଉଛି। ଆଗକୁ ଏହି ଯାଞ୍ଚ କଡ଼ାକଡ଼ି କରାଯିବ ବୋଲି ସେ କହିଛନ୍ତି।
