ବ୍ରହ୍ମପୁର ଅଫିସ,୬ା୩: ଗଞ୍ଜେଇ ଚୋରା ଚାଲାଣର ଭୂସ୍ବର୍ଗ ପାଲଟିଛି ବ୍ରହ୍ମପୁର। ଗଜପତି ଓ କନ୍ଧମାଳରୁ ଗଞ୍ଜେଇ ବେଆଇନ ଭାବେ ଅଣାଯାଇ ବ୍ରହ୍ମପୁର ଦେଇ ବାହାର ରାଜ୍ୟବକୁ ଚାଲାଣ ହେଉଛି। ଅବକାରୀ ଗୁଇନ୍ଦା ବିଭାଗ ପକ୍ଷରୁ ଗଞ୍ଜେଇ ଧରପଗଡ଼ ଅଭିଯାନ ଜୋରଦାର କରାଯାଇଛି। ଗଜପତି ଜିଲା ମୋହନାରୁ କାଳଷଣ୍ଢପୁର ଓ ବ୍ରହ୍ମପୁର ଦେଇ ଗଞ୍ଜେଇ ଚାଲାଣ ହେଉଥିବା ନେଇ ଅବକାରୀ ଗୁଇନ୍ଦା ଖବର ପାଇଥିଲା। ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତଙ୍କ ନେତୃତ୍ୱରେ ଏକ ଟିମ୍ ସୋମବାର ଆସିକା ନିକଟ କାଳଷଣ୍ଢପୁର ଛକରେ ପାଟ୍ରୋଲିଂ କରୁଥିଲା। ସେହି ରାସ୍ତାଦେଇ ବ୍ରହ୍ମପୁର ଅଭିମୁଖେ ଆସୁଥିବା ଏକ କାର୍ ନମ୍ବର (ଓ ୦୫୫୮) କୁ ପୋଲିସ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ କାର୍ ଭିତରେ ଗଞ୍ଜେଇ ଭର୍ତ୍ତି ହୋଇଥିବା ଜଣାପଡ଼ିଥିଲା। ୨୭ଟି ପକେଟରେ ୧୩୫ କେଜି ଗଞ୍ଜେଇ ରହିଥିଲା। ଉକ୍ତ ଗଞ୍ଜେଇ ସହ କାର୍ ଜବତ କରାଯାଇଥିଲା। ସେହିପରି ଗଞ୍ଜେଇ ଚାଲାଣ କରୁଥିବା ଦୁଇ ଜଣ ଯୁବକଙ୍କୁ ଗିରଫ କରାଯାଇଛି। ସେମାନେ ହେଲେ କଟକ,ଆଠଗଡ଼ ଥାନା ଅନ୍ତର୍ଗତ ହେମମାଳପୁର ଗ୍ରାମର ବିଶ୍ୱରଞ୍ଜନ ଦଳାଇ(୩୫) ଓ ଅନ୍ୟଜଣେ ଟିକିରିଆ ଥାନା ଅନ୍ତର୍ଗତ ନୂଆପାଟଣାର ଶ୍ରୀକାନ୍ତ ପ୍ରଧାନ (୧୯)। ଗିରଫ ଯୁବକଙ୍କୁ ଜେରା ବେଳେ ସେମାନେ ଉକ୍ତ ଗଞ୍ଜେଇ ଗଜପତି ଜିଲା ମୋହନାରୁ ଆଣି ବ୍ରହ୍ମପୁର ଦେଇ ଆଠଗଡ଼ ଚାଲାଣ କରିଥାନ୍ତେ ବୋଲି ଜଣାପଡିଛି। କେସ୍ ନମ୍ବର ୧୦୧୪/୨୨-୨୩ରେ ଗିରଫ ଦୁଇ ଯୁବକଙ୍କୁ ସୋମବାର କୋର୍ଟ ଚାଲାଣ କରାଯାଇଛି ବୋଲି ଅବକାରୀ ପୋଲିସ ଠାରୁ ସୂଚନା ମିଳିଛି। ଜବତ ଟ୍ରକ ଓ ଗଞ୍ଜେଇର ଆନୁମାନିକ ମୂଲ୍ୟ ୨୪ଲକ୍ଷ ଟଙ୍କା ହେବ ବୋଲି ଅବକାରୀ ଗୁଇନ୍ଦା ବିଭାଗ ପକ୍ଷରୁ କୁହାଯାଇଛି।
