ବଲାଙ୍ଗୀର, ୧୦।୧୨(ସୁନିଲ କୁମାର ମହାନ୍ତି): ବଲାଙ୍ଗୀର ସରକାରୀ ଆୟୁର୍ବେଦିକ କଲେଜ ଓ ହସ୍ପିଟାଲ ସମ୍ମୁଖରେ ନିଖିଳ ଓ ଆୟୁଷ ଛାତ୍ର ସଙ୍ଗଠନ ପକ୍ଷରୁ ଜୋରଦାର ଆନ୍ଦୋଳନ ଜାରି ରହିଛି। ଏବେ ଆୟୁଷ ଛାତ୍ରୀଛାତ୍ରମାନେ ଆମରଣ ଅନଶନରେ ବସିଛନ୍ତି। ସରକାରୀ ଆୟୁର୍ବେଦିକ କଲେଜର ୧୬ ଜଣ ଛାତ୍ରୀଛାତ୍ର ଆମରଣ ଅନଶନରେ ବସିବାର ଇତିମଧ୍ୟରେ ୨୪ ଘଣ୍ଟା ବିତିଯାଇଥିଲେ ମଧ୍ୟ କୌଣସି ଅଧିକାରୀ କି ପ୍ରତିନିଧି ଆସିନଥିବାରୁ ଛାତ୍ର ଅଶାନ୍ତି ବଢିବାରେ ଲାଗିଛି। ଅହୋରାତ୍ର ଆନ୍ଦୋଳନରେ ବସିରହିବା ପରେ ଏବେ ଛାତ୍ରୀଛାତ୍ରମାନେ ଆମରଣ ଅନଶନକୁ ଓହ୍ଳାଇଥିବାରୁ ସେମାନଙ୍କ ସ୍ବାସ୍ଥ୍ୟହାନୀ ଆଶଙ୍କା ବୃଦ୍ଧି ପାଇଛି। ପ୍ରବଳ ଶୀତରେ ଛାତ୍ରୀଛାତ୍ରମାନେ ରାତି ସାରା ଆନ୍ଦୋଳନରେ ବସିଛନ୍ତି। ମଙ୍ଗଳବାର ହସ୍ପିଟାଲ ପକ୍ଷରୁ ଡାକ୍ତରମାନେ ଅନଶନରେ ବସିଥିବା ଛାତ୍ରୀଛାତ୍ରଙ୍କ ସ୍ବାସ୍ଥ୍ୟ ପରୀକ୍ଷା କରିବା ସହ ଚିନ୍ତା ପ୍ରକଟ କରିଛନ୍ତି। ଆନ୍ଦୋଳନରତ ଛାତ୍ରୀଛାତ୍ର କହିଛନ୍ତି ଯେ, ଅନଶନରେ ବସିଲା ପରେ ମଧ୍ୟ ସରକାର ଯଦି ସେମାନଙ୍କ ନ୍ୟାୟ ଦାବି ଶୁଣିବେ ନାହିଁ ତେବେ ଏଥିପାଇଁ ଯାହା ହେବ ସରକାର ହିଁ ଦାୟୀ ରହିବେ। ଯେକୌଣସି ପରିସ୍ଥିତିରେ ସେମାନେ ଆଉ ଅନଶନରୁ ଓହରିବେ ନାହିଁ। ସ୍ବାସ୍ଥ୍ୟମନ୍ତ୍ରୀ ନିଜ ଜିଲାର ହୋଇଥିବା ସତ୍ତ୍ୱେ ସେମାନଙ୍କ ପାଖକୁ ଆସୁନଥିବାରୁ ସେମାନେ ଅସନ୍ତୋଷ ପ୍ରକାଶ କରିଛନ୍ତି। ଆମରଣ ଅନଶନକୁ ନେଇ ଜିଲାପାଳ ଓ ସିଡିଏମଓଙ୍କୁ ଜଣାଇ ଦିଆଯାଇଛି ବୋଲି ସେମାନେ କହିଛନ୍ତି। ସୋମବାର ଛାତ୍ରୀଛାତ୍ରମାନେ ଦାବି ପୂରଣ ପାଇଁ କଲେଜ ସମ୍ମୁଖରେ ହୋମ ଯଜ୍ଞ କରିଥିଲେ।
