ଭୁବନେଶ୍ୱର,୧୭।୨:ଟାଟା ପାଓ୍ବାର ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିସିଓଡିଏଲ୍) ପକ୍ଷରୁ ଏକକାଳୀନ ସମାଧାନ ସ୍କିମ୍ (ଓଟିଏସ୍) ସମ୍ପର୍କରେ ଘୋଷଣା କରାଯାଇଛି। ବିଶେଷକରି ଅତୀତର ବକେୟା ବିଲ୍ ପେମେଣ୍ଟ ଉପରେ ଗ୍ରାହକମାନଙ୍କୁ ଆଶ୍ୱସ୍ତି ପ୍ରଦାନ କରିବା ଲାଗି ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (ଓଇଆର୍ସି)ଙ୍କ ଅନୁମୋଦନକ୍ରମେ ଓଟିଏସ୍କୁ ଟିପିସିଓଡିଏଲ୍ ପକ୍ଷରୁ କାର୍ଯ୍ୟକାରୀ କରାଯାଇଛି। ଏହି ସ୍ବତନ୍ତ୍ର ସ୍କିମ୍ ଜରିଆରେ ୨୦୨୦ ମେ ୩୧ ପର୍ଯ୍ୟନ୍ତ ଥିବା ବିଦ୍ୟୁତ୍ ବକେୟା ଉପରେ ୩୦% ପର୍ଯ୍ୟନ୍ତ ରିହାତି ପ୍ରଦାନ କରାଯିବ। ସେହିଭଳି ସମସ୍ତ ଲୋ ଟେନ୍ସନ ଗ୍ରାହକ ଯେଉଁମାନଙ୍କ ଦୀର୍ଘଦିନରୁ ବିଦ୍ୟୁତ୍ ବିଲ୍ ବକେୟା ହୋଇ ରହିଛି ସେମାନେ ଅତୀତର ବକେୟା ମୂଳ ରାଶି ଉପରେ ଏକକାଳୀନ ୩୦% ପର୍ଯ୍ୟନ୍ତ ରିହାତି ଏବଂ ବିଳମ୍ବିତ ପେମେଣ୍ଟ ସରଚାର୍ଜ (ଡିପିଏସ୍) ଉପରେ ୮୦% ରିହାତି ପାଇପାରିବେ ଏବଂ ସମସ୍ତ ଏଚ୍ଟି-ଇଏଚ୍ଟି ଗ୍ରାହକମାନେ ବିଳମ୍ବିତ ସରଚାର୍ଜ ଉପରେ ୬୦% ପର୍ଯ୍ୟନ୍ତ ରିହାତି ପାଇପାରିବେ। ସେହିପରି ଦୀର୍ଘଦିନରୁ ବିଦ୍ୟୁତ୍ ବିଲ୍ ବକେୟା ରଖିଥିବା ଗ୍ରାହକମାନେ ତୁରନ୍ତ ଟିପିସିଓଡିଏଲ୍ର ଗ୍ରାହକ ସେବା କେନ୍ଦ୍ର, ସବ୍ଡିଭିଜନ, ଡିଭିଜନ, ସେକ୍ସନ ଅଫିସ ଜରିଆରେ କିମ୍ବା ୧୯୧୨, ୧୮୦୦୩୪୫୭୧୨୨ ନମ୍ବର ଡାଏଲ୍ କରି ପଞ୍ଜୀକରଣ କରିପାରିବେ। ନଚେତ୍ ଗ୍ରାହକମାନେ ୯୧୨୪୯୯୮୭୨୯ ନମ୍ବରରେ ହ୍ବାଟ୍ସଆପ୍ କରି ମଧ୍ୟ ପଞ୍ଜୀକରଣ କରିପାରିବେ। ଅପରପକ୍ଷରେ ଟିପିସିଓଡିଏଲ୍ର ‘ଗାଁ ଚାଲ’ ଶିବିରରେ ମଧ୍ୟ ପଞ୍ଜୀକରଣ ପ୍ରକ୍ରିୟା ସୁବିଧା ପ୍ରଦାନ କରାଯାଉଛି। ଦୀର୍ଘଦିନର ବିଦ୍ୟୁତ୍ ବିଲ୍ ବକେୟା ରଖିଥିବା ଗ୍ରାହକମାନଙ୍କ ଲାଗି ଉକ୍ତ ସ୍କିମ୍ ଏକ ସୁବର୍ଣ୍ଣ ସୁଯୋଗ ଆଣି ଦେଇଛି। ଯେହେତୁ ଏହି ସ୍କିମ୍ ସୀମିତ ଅବଧି ଲାଗି ଉପଲବ୍ଧ। ତେଣୁ ଦୀର୍ଘଦିନ ଧରି ବିଦ୍ୟୁତ୍ ବିଲ୍ ବକେୟା ରଖିଥିବା ଗ୍ରାହକମାନେ ତୁରନ୍ତ ଏଥିରେ ନିଜକୁ ପଞ୍ଜୀକରଣ କରି ଉକ୍ତ ସ୍କିମ୍ ଅଧୀନରେ ପ୍ରଦାନ କରାଯାଉଥିବା ସୁବିଧାର ଲାଭ ହାସଲ କରିପାରିବେ।
