ଭୁବନେଶ୍ୱର,୧୦।୧୧(ବ୍ୟୁରୋ): ବିଶ୍ୱର ଶ୍ରେଷ୍ଠ ଗବେଷକ ତାଲିକାରେ ସ୍ଥାନ ପାଇଛନ୍ତି ଓଡ଼ିଆ ବୈଜ୍ଞାନିକ। ଆମେରିକାର ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟ ଦ୍ୱାରା ପ୍ରକାଶ ପାଇଥିବା ଏହି ତାଲିକାରେ ଭାରତର ୭ଜଣ ବୈଜ୍ଞାନିକଙ୍କ ନାମ ରହିଛି। ଏମାନଙ୍କ ମଧ୍ୟରେ ରହିଛନ୍ତି ଓଡ଼ିଶାର ବି.କେ. ମିଶ୍ର। ଡ. ମିଶ୍ର ବର୍ତ୍ତମାନ ଆଇଆଇଟି ଗୋଆର ନିର୍ଦ୍ଦେଶକ ଅଛନ୍ତି। ସେହିଭଳି ଆଇଆଇଟି ଗୋଆର ୩ଜଣ ବୈଜ୍ଞାନିକ ଥିବାବେଳେ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ଓସେନୋଗ୍ରାଫି(ଏନ୍ଆଇଓ)ର ୩ଜଣ ଓ ପରିବେଶବିତ୍ ମାଧବ ଗାଡଗିଲ୍ ରହିଛନ୍ତି।
୨୦୧୯ ପର୍ଯ୍ୟନ୍ତ ଯେଉଁ ବୈଜ୍ଞାନିକମାନେ ଗବେଷଣା କରିଛନ୍ତି, ସେମାନଙ୍କ ତଥ୍ୟ ସଂଗ୍ରହ କରି ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟ ଏହି ତାଲିକା ପ୍ରକାଶ କରିଛି। ସବୁଠାରୁ ବଡ଼କଥା ହେଉଛି ଏକମାତ୍ର ଓଡ଼ିଆ ଭାବେ ଏଥିରେ ସ୍ଥାନ ପାଇଛନ୍ତି ବୈଜ୍ଞାନିକ ବି.କେ. ମିଶ୍ର। ଖଣି ଓ ଧାତୁ କ୍ଷେତ୍ରରେ ଗବେଷଣା ପାଇଁ ମିଶ୍ର ଏହି ଅନ୍ତର୍ଜାତୀୟ ତାଲିକାର ୧୧ ନମ୍ବର ସ୍ଥାନରେ ରହିଛନ୍ତି। ମେଟାଲିଜ୍ ଓ ପାଉଡର ଟେକ୍ନୋଲୋଜି କ୍ଷେତ୍ରରେ ଗବେଷଣା ପାଇଁ ତାଙ୍କୁ ଏହି ପୁରସ୍କାର ପ୍ରଦାନ କରାଯିବ। ମିଶ୍ର ଏହା ପୂର୍ବରୁ ଲୁହାପଥର ଖନନ ଦ୍ୱାରା ଗୋଆର ପରିବେଶ ଉପରେ ପଡ଼ୁଥିବା ପ୍ରଭାବ ସମ୍ପର୍କରେ ଆକଳନ ପାଇଁ ସୁପ୍ରିମକୋର୍ଟଙ୍କ ଦ୍ୱାରା ଗଠିତ ବିଶେଷଜ୍ଞ କମିଟିର ସଦସ୍ୟ ଭାବେ ନିଯୁକ୍ତ ହୋଇଥିଲେ। ୧୯୮୧ ସେ ଏନ୍ଆଇଟି ରାଉରକେଲାରେ ମେଟାଲର୍ଜିକାଲ ଇଞ୍ଜିନିୟରିଂରେ ବିଏସ୍ସି ଶେଷ କରିବା ପରେ ଆମେରିକାରେ ଏମ୍ଏସ୍ସି ଓ ପିଏଚ୍ଡି ହାସଲ କରିଥିଲେ। ୨୦୦୫ରୁ ୨୦୧୭ ପର୍ଯ୍ୟନ୍ତ ଭୁବନେଶ୍ୱରସ୍ଥିତ ସିଏସ୍ଆଇଆର୍-ଆଇଏମ୍ଏମ୍ଟିର ନିର୍ଦ୍ଦେଶକ ଭାବେ କାର୍ଯ୍ୟ କରିଥିଲେ।
ତେବେ ବିଶ୍ୱ ଶ୍ରେଷ୍ଠ ଗବେଷକ ତାଲିକାରେ ପ୍ରଥମଥର ପାଇଁ ଏତେ ସଂଖ୍ୟକ ଭାରତୀୟଙ୍କୁ ଦେଖିବା ଗର୍ବର ବିଷୟ ବୋଲି ମିଶ୍ର ଏହି ଅବସରରେ କହିଛନ୍ତି। ତାଲିକାରେ ଅନ୍ୟମାନଙ୍କ ମଧ୍ୟରେ ଗୋଆ ଏନ୍ଆଇଓର ପୂର୍ବତନ ନିର୍ଦ୍ଦେଶକ ଏସ୍.ଡବ୍ଲ୍ୟୁ.ଏ ନକ୍ଭି ଏବଂ ଏସ. ଆର. ସେଟ୍ଟି ସ୍ଥାନ ପାଇଛନ୍ତି। ଏହି ଦୁଇ ବୈଜ୍ଞାନିକ ପାଣିପାଗ ବିଜ୍ଞାନ ଓ ବାୟୁମଣ୍ଡଳ ବିଜ୍ଞାନ ଉପରେ ଗବେଷଣା କରୁଥିଲେ। ସେହିଭଳି ଅନ୍ୟଜଣେ ବରିଷ୍ଠ ବୈଜ୍ଞାନିକ ସି.ରଘୁ କୁମାରଙ୍କୁ ସାମୁଦ୍ରିକ ଜୀବ ବିଜ୍ଞାନ ଓ ହାଇଡ୍ରୋବାୟୋଲୋଜି ବର୍ଗରେ ସଫଳତା ମିଳିଛି।
