ଭୁବନେଶ୍ୱର,୩।୧୦: ଓଡ଼ିଶା ବିଦ୍ୟୁତ ଶକ୍ତି ସଞ୍ଚାରଣ ନିଗମ ଲିମିଟେଡ (ଓପିଟିସିଏଲ୍)ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସଞ୍ଜୟ କୁମାର ମିଶ୍ରଙ୍କୁ ନିକଟରେ ଶ୍ରେଷ୍ଠ ପ୍ରଶାସକ ସମ୍ମାନରେ ସମ୍ମାନିତ କରାଯାଇଛି। ରବିବାର ସ୍ଥାନୀୟ ଜୟଦେବ ବିହାରସ୍ଥିତ ଏକ ହୋଟେଲରେ ଆୟୋଜିତ ଇଣ୍ଟରଭ୍ୟୁ ଟାଇମ୍ସ ପତ୍ରିକାର ୧୧ତମ ବାର୍ଷିକ ଉତ୍ସବରେ ଓଡ଼ିଶାର ବିଭିନ୍ନ କ୍ଷେତ୍ରରେ ଦକ୍ଷତା ପ୍ରଦର୍ଶନ ଓ ପ୍ରେରଣା ସୃଷ୍ଟି କରିଥିବା ୨୦ଜଣ ଶ୍ରେଷ୍ଠ ବ୍ୟକ୍ତିତ୍ୱଙ୍କୁ ଏହି ପରିପ୍ରେକ୍ଷୀରେ ସମ୍ମାନିତ କରାଯାଇଥିଲା।
ପ୍ରଶାସନିକ ସେବା କ୍ଷେତ୍ରରେ ସଞ୍ଜୟ ମିଶ୍ରଙ୍କୁ ଶ୍ରେଷ୍ଠ ପ୍ରଶାସକ ଭାବେ ସମ୍ମାନିତ କରାଯାଇଛି। ଉଲ୍ଲେଖଯୋଗ୍ୟ ଯେ ମିଶ୍ର ଭାରତୀୟ ରେଳ ଯାତାୟାତ ସେବା (ଆଇଆରଟିଏସ)ର ଅଧିକାରୀ। ଏହା ପୂର୍ବରୁ ସେ ପୂର୍ବତଟ ରେଳପଥ ବିଭାଗରେ କାଯର୍ୟରତ ଥିବା ବେଳେ ୨୦୨୧ ଅଗଷ୍ଟରେ ସଞ୍ଜୟ ଓଡ଼ିଶା ସରକାରଙ୍କ ବାଣିଜ୍ୟ ଓ ପରିବହନ ବିଭାଗରେ ସ୍ବତନ୍ତ୍ର ସଚିବ ଭାବେ ଡେପୁଟେସନରେ ଯୋଗ ଦେଇଥିଲେ। ପରବର୍ତ୍ତୀ ସମୟରେ ଅତିରିକ୍ତ ଭାବେ ମିଶ୍ରଙ୍କୁ ଓପିଟିସିଏଲରେ ପରିଚାଳନା ନିର୍ଦ୍ଦେଶକ ଦାୟିତ୍ୱ ମଧ୍ୟ ରାଜ୍ୟ ସରକାର ନ୍ୟସ୍ତ କରିଥିଲେ। କୋଭିଡ୍ ପ୍ରତିବନ୍ଧକ ଏବଂ ପ୍ରାକୃତିକ ବିପର୍ଯ୍ୟୟ ସମୟରେ ସେ ଓପିଟିସିଏଲର ମଙ୍ଗ ଧରିଥିଲେ ଏବଂ ଓଡ଼ିଶାର ବିଦ୍ୟୁତ୍ ସରବରାହ ଭିତ୍ତିଭୂମିରେ ଯଥେଷ୍ଟ ବୃଦ୍ଧି ମିଶ୍ରଙ୍କ ନେତୃତ୍ୱରେ ହୋଇପାରିଥିଲା। ନିକଟରେ ରାଜ୍ୟ ସରକାର ମିଶ୍ରଙ୍କୁ ଓପିଟିସିଏଲର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ଦାୟିତ୍ୱ ନ୍ୟସ୍ତ କରିଛନ୍ତି।
ଓଡ଼ିଶା ସରକାରଙ୍କ ୫ଟି ମନ୍ତ୍ରକୁ ସଫଳ ରୂପାୟନ କରିବା ପାଇଁ ଓପିଟିସିଏଲରେ ମଧ୍ୟ ବ୍ୟାପକ ଟେକ୍ନୋଲଜି ବ୍ୟବହାରକୁ ସେ ଗୁରୁତ୍ୱ ଦେଇଛନ୍ତି। ଇ-ଅଫିସ୍, ଗ୍ରୀଡ଼୍ ଅଟୋମେସନ୍ ଏବଂ ରିମୋଟ୍ ପରିଚାଳନା ଭଳି ବହୁ ଆଧୁନିକ ଜ୍ଞାନକୈାଶଳକୁ ପ୍ରଣୟନ କରିବାରେ ସେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ଏହି ସମ୍ମାନ ପାଇଁ ଓପିଟିସିଏଲର ସମସ୍ତ ନିର୍ଦ୍ଦେଶକ,ଉଚ୍ଚପଦସ୍ଥ ଅଧିକାରୀ ଏବଂ ଏହାର କର୍ମକର୍ତ୍ତାମାନେ ଅଧ୍ୟକ୍ଷଙ୍କୁ ଅଭିନନ୍ଦନ ଜଣାଇଛନ୍ତି। ସମ୍ମାନିତ ହେବା ଅବସରରେ ମିଶ୍ର କହିଥିଲେ ଯେ, ଏହି ସମ୍ମାନ ମୋର ବ୍ୟକ୍ତିଗତ ସଫଳତା ନୁହେଁ ବରଂ ଓପିଟିସିଏଲର ସମସ୍ତ କର୍ମଚାରୀଙ୍କ ସାମୂହିକ ସଫଳତା ଅଟେ।
