ନୂଆଦିଲ୍ଲୀ,୨୯ା୪: ସମଲିଙ୍ଗୀ ବିବାହର ବୈଧିକରଣ ଲାଗି ହେଉଥିବା ଉଦ୍ୟମକୁ ବିରୋଧ କରି ୧୨୦ରୁ ଊର୍ଦ୍ଧ୍ୱ ବିଶିଷ୍ଟ ବ୍ୟକ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପତ୍ର ଲେଖିଛନ୍ତି। ସେମାନଙ୍କ ମଧ୍ୟରେ ହାଇକୋର୍ଟର ଅବସରପ୍ରାପ୍ତ ବିଚାରପତି ଓ ପୂର୍ବତନ ପ୍ରଶାସନିକ ଅଧିକାରୀମାନେ ଅଛନ୍ତି। ସମଲିଙ୍ଗୀ ବିବାହ ଅବାସ୍ତବ ଓ ଅପ୍ରାକୃତ ହୋଇଥିବାରୁ ଏହାକୁ ଭାରତୀୟ ସମାଜ ଓ ସଂସ୍କୃତି ଗ୍ରହଣ କରିବ ନାହିଁ ବୋଲି ସେମାନେ କହିଛନ୍ତି। ଦେଶର ସାଂସ୍କୃତିକ ପରମ୍ପରା ଓ ଧର୍ମୀୟ ସିଦ୍ଧାନ୍ତ ବିରୋଧରେ କ୍ରମାଗତ ଆକ୍ରମଣ ଚାଲିଥିବାରୁ ଏଥିରେ ସେମାନେ ମର୍ମାହତ ବୋଲି ପତ୍ରରେ ସ୍ବାକ୍ଷର କରିଥିବା ବ୍ୟକ୍ତିମାନେ କହିଛନ୍ତି। ବିବାହ ଅନୁଷ୍ଠାନର ନ୍ୟାୟିକ ବ୍ୟାଖ୍ୟା କରି କିମ୍ବା ବର୍ତ୍ତମାନର ବୈଧାନିକ ଢାଞ୍ଚାକୁ ରଦ୍ଦ କରି ଅଦାଲତ ଏହାକୁ ନଷ୍ଟ କରିବାରୁ ଦୂରେଇ ରହନ୍ତୁ ବୋଲି ସେମାନେ ଦାବି କରିଛନ୍ତି। ପତ୍ରର ସ୍ବାକ୍ଷରକାରୀଙ୍କ ମଧ୍ୟରେ ଅଛନ୍ତି ପୂର୍ବତନ ସିଏଜି ରାଜବୀ ମହର୍ଷି, ପୂର୍ବତନ ସ୍ବରାଷ୍ଟ୍ର ସଚିବ ଏଲ୍.ସି. ଗୋୟଲ, ପୂର୍ବତନ ବହିର୍ବ୍ୟାପାର ସଚିବ ଶଶାଙ୍କ, ପୂର୍ବତନ ର’ ମୁଖ୍ୟ ସଞ୍ଜୀବ ତ୍ରିପାଠୀ, ଅବସରପ୍ରାପ୍ତ ବିଚାରପତି ଏସ୍.ଏନ୍. ଧିଙ୍ଗ୍ରା ଏବଂ ଲୋକପାଳ ସିଂ।
