ପୁରୀ ଅଫିସ,୧୯ା୧୧: ଇଂଲିଶ୍ ନବବର୍ଷରେ ଶ୍ରୀମନ୍ଦିରର ରୀତିନୀତିକୁ ଉପେକ୍ଷା କରି ଅର୍ଦ୍ଧରାତ୍ରରେ ଦ୍ୱାରଫିଟା ନୀତିକୁ ବିରୋଧ କରିଛନ୍ତି ସୂଚନାଧିକାର କର୍ମୀ ଜୟନ୍ତ ଦାଶ। ଏ ନେଇ ସେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଚିଠି ପ୍ରଦାନ କରିଛନ୍ତି। ଚିଠିରେ ଉଲ୍ଲେଖ କରିଛନ୍ତି, ସେ ଜଣେ ହିନ୍ଦୁ, ସନାତନ ଧର୍ମ ପାଇଁ ଗର୍ବିତ। ଦୀର୍ଘ ୨୦ ବର୍ଷ ଧରି ପ୍ରଶାସନ ଇଂଲିଶ୍ ନୂଆବର୍ଷ ଦିନ ଶ୍ରୀମନ୍ଦିରରେ ସଅଳ ଦ୍ୱାରଫିଟା ନୀତି କରୁଛନ୍ତି। ଯାହାକୁ ଓଡ଼ିଶା ପ୍ରଶାସନ ତଥା ସେବାୟତ ଅନ୍ୟ ଧର୍ମର ନୀତିକୁ ଅନୁସରଣ କରୁଛନ୍ତି। ତେଣୁ ରାତି ୧୨ଟା ୩୦ରେ ମହାପ୍ରଭୁଙ୍କ ଦ୍ୱାରଫିଟା ନୀତି ଅନୁଷ୍ଠିତ ହେଉଛି। ମହାପ୍ରଭୁଙ୍କୁ ଜୋର ଜବରଦସ୍ତ ଉଠାଯାଉଛି। ଯାହା ସନାତନ ହିନ୍ଦୁ ସଂସ୍କୃତିରେ ନାହିଁ ଓ ଏହା ହିନ୍ଦୁ ବିରୋଧୀ ଅଟେ। ଏହା ଶ୍ରୀଜଗନ୍ନାଥ ମନ୍ଦିର ରୀତିନୀତିର ଉଲ୍ଲଂଘନ ଅଟେ। ଶ୍ରୀମନ୍ଦିର ସତ୍ତ୍ୱଲିପିରେ ମଧ୍ୟ ଇଂଲିଶ୍ ନବବର୍ଷରେ ସଅଳ ଦ୍ୱାରଫିଟା ନୀତି ଉଲ୍ଲେଖ ନ ଥିବା ସେ ଦର୍ଶାଇଛନ୍ତି। ଅନ୍ୟ ଧର୍ମ ଅନୁସରଣକାରୀ ଇସ୍କନମାନଙ୍କୁ ଶ୍ରୀମନ୍ଦିରରେ ପ୍ରବେଶ ପାଇଁ ଅନୁମତି ଦିଆଯାଇ ନ ଥାଏ। ତେବେ ଜାନୁୟାରୀ ୧ ତାରିଖରେ କାହିଁକି ରାତି ଅଧରେ ମନ୍ଦିରର ଦ୍ୱାର ଖୋଲାଯାଉଛି। ଯାହା ମହାପ୍ରଭୁଙ୍କ ଧାର୍ମିକ ଭାବନାକୁ କୁଠାରାଘାତ କରୁଛି। ଶ୍ରୀମନ୍ଦିର ପ୍ରଶାସନର ଏପରି କାର୍ଯ୍ୟ ଶ୍ରୀଜଗନ୍ନାଥ ସଂସ୍କୃତି ଓ ସନାତନ ଧର୍ମ ସମ୍ପର୍କରେ ସମଗ୍ର ବିଶ୍ୱକୁ ଭୁଲ୍ ବାର୍ତ୍ତା ଯାଉଛି। ତେଣୁ ଚଳିତ ଇଂଲିଶ୍ ନବବର୍ଷରେ କୌଣସି ହିନ୍ଦୁ ରୀତିନୀତି କାର୍ଯ୍ୟ ନାହିଁ। ତେଣୁ ରୀତିନୀତି ଅନୁଯାୟୀ ଉକ୍ତ ଦିନ ଠିକ୍ ସମୟରେ ଦ୍ୱାରଫିଟା କରାଯାଉ। ଯଦି ରୀତିନୀତକୁକୁ ଉପେକ୍ଷା କରାଯାଇ ନବବର୍ଷକୁ ପ୍ରାଧାନ୍ୟ ଦେଇ ମହାପ୍ରଭୁଙ୍କ ଦ୍ୱାର ନିର୍ଦ୍ଧାରିତ ସମୟଠାରୁ ସଅଳ ଖୋଲାଯାଏ ଏବଂ ହିନ୍ଦୁମାନଙ୍କ ଧାର୍ମିକ ଭାବାବେଗକୁ ଅପମାନିତ କରାଯାଉଛି, ତେବେ ଏ ବିରୋଧରେ ଥାନାରେ ମାମଲା ରୁଜୁ କରିବେ ବୋଲି ଦାଶ ଗଣମାଧ୍ୟମକୁ ସୂଚନା ଦେଇଛନ୍ତି।
