ବୌଦ୍ଧ,୬।୭(ଅଜିତ କୁମାର ବାରିକ)ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ଭି. କେ. ପାଣ୍ଡିଆନଙ୍କ ବିଭିନ୍ନ ଜିଲା ଗସ୍ତକୁ ବିରୋଧୀ ରାଜନୈତିକ ଦଳଗୁଡ଼ିକର ବିରୋଧ ବଢ଼ିବାରେ ଲାଗିଛି। ମଙ୍ଗଳବାର ସୋନପୁର ଗସ୍ତବେଳେ ୫-ଟି ସଚିବଙ୍କ କାର୍କେଡ୍କୁ ଅଣ୍ଡାମାଡ଼ ହୋଇଥିବାବେଳେ ବୁଧବାର ବୌଦ୍ଧରେ ସମାନ ଘଟଣା ଘଟିଛି। ଭାଜପା ଓ କଂଗ୍ରେସ କର୍ମୀମାନେ କଳାପତାକା ପ୍ରଦର୍ଶନ କରିବା ସହ ନାନା ବିରୋଧାତ୍ମକ ସ୍ଲୋଗାନ ଦେଉଥିବା ଦେଖିବାକୁ ମିଳୁଛି।
ପାଣ୍ଡିଆନ ବୁଧବାର ବୌଦ୍ଧ ଓ କଣ୍ଟାମାଳ ନିର୍ବାଚନମଣ୍ଡଳୀର ବିଭିନ୍ନ କାର୍ଯ୍ୟକ୍ରମରେ ଯୋଗଦେଇଛନ୍ତି। ହେଲେ ୨ ପ୍ରମୁଖ ବିରୋଧୀ ଦଳ ଭାଜପା ଓ କଂଗ୍ରେସ ପକ୍ଷରୁ କଡ଼ା ବିରୋଧ କରାଯାଇଥିଲା।
ସଚିବ ପାଣ୍ଡିଆନ ସକାଳେ କଣ୍ଟାମାଳ ବ୍ଲକର ଆମ୍ବଗାଁ ଜନତା ଉଚ୍ଚ ବିଦ୍ୟାଳୟରେ ଆୟୋଜିତ ସଭାକୁ ଯାଉଥିବା ବେଳେ ଭାଜପା ପକ୍ଷରୁ ପ୍ରଥମେ ବହୁ ସଂଖ୍ୟକ ଦଳୀୟ କର୍ମୀ ହାତରେ ପ୍ଲାକାର୍ଡ ଧରି ବିଭିନ୍ନ ନାରା ଦେଇ ପାଣ୍ଡିଆନ ଗୋ ବ୍ୟାକ୍ ବୋଲି କହିଥିଲେ। ଏହି ସମୟରେ ଦଳ ପକ୍ଷରୁ କଳାପତାକା ପ୍ରଦର୍ଶନ କରାଯାଇଥିଲା। କଂଗ୍ରେସ ପକ୍ଷରୁ ମଧ୍ୟ ଆମ୍ବଗାଁରେ କଳାପତାକା ପ୍ରଦର୍ଶନ କରାଯାଇଥିଲା। ସଚିବ କଣ୍ଟାମାଳ ବ୍ଲକରେ କାର୍ଯ୍ୟକ୍ରମ ସାରି ବୌଦ୍ଧ ଗସ୍ତ କରିଥିଲେ। ସେଠାରେ ପହଞ୍ଚତ୍ବାର କିଛି ସମୟ ପୂର୍ବରୁ ସଭାସ୍ଥଳ ନିକଟସ୍ଥ ଜିଲା ସଂଗ୍ରହାଳୟ ସମ୍ମୁଖରେ କଂଗ୍ରେସ କର୍ମୀମାନେ ହଠାତ୍ ଆସି ହାତରେ ବିଭିନ୍ନ ପ୍ଲାକାର୍ଡ ଧରି ପାଣ୍ଡିଆନ ଗୋ ବ୍ୟାକ୍, ଗଣତନ୍ତ୍ର ହତ୍ୟାକାରୀ ମୁଖ୍ୟମନ୍ତ୍ରୀ ବୋଲି ନାରା ଦେଇଥିଲେ। ସେଠାରେ କଂଗ୍ରେସ କର୍ମୀମାନେ ହାତରେ କଳାପତାକା ଧରି ଦେଖାଇଥିଲେ। ପୋଲିସ କଂଗ୍ରେସ କର୍ମୀମାନଙ୍କୁ ସେଠାରୁ ଉଠାଇନେଇ ଥାନାରେ ଅଟକ ରଖିଥିବା ବେଳେ ସଚିବ ଗଲା ପରେ ଛାଡ଼ିଥିଲା। ସଚିବ ବୌଦ୍ଧ ସହରର ଚନ୍ଦ୍ରଚୂଡ଼ ମନ୍ଦିରଠାରେ ନିର୍ମାଣାଧୀନ ଆଳତି ଘାଟ ପରିଦର୍ଶନରେ ଯାଉଥିବା ବେଳେ କେତେଜଣ କାର୍କେଡ୍କୁ ଅଣ୍ଡାମାଡ଼ ହୋଇଥିବା ଦେଖିବାକୁ ମିଳିଛି।
ଅଣ୍ଡା ଦୋକାନ ବନ୍ଦକୁ ନେଇ ଚର୍ଚ୍ଚା
ମଙ୍ଗଳବାର ସୁବର୍ଣ୍ଣପୁର ଜିଲାରେ ୫-ଟି ସଚିବଙ୍କ ଗସ୍ତ ବେଳେ ତାଙ୍କ ଗାଡ଼ିକୁ ଆମ୍ ଆଦ୍ମୀ ପାର୍ଟିର କେତେଜଣ କର୍ମୀ ଅଣ୍ଡାମାଡ଼ କରିଥିଲେ। ଏହାକୁ ଦୃଷ୍ଟିରେ ରଖି ବୁଧବାର ୫-ଟି ସଚିବଙ୍କ ବୌଦ୍ଧ ଜିଲା ଗସ୍ତ ସମୟରେ ଜିଲା ପୋଲିସ ପ୍ରଶାସନ ପକ୍ଷରୁ ସର୍ତକତାମୂଳକ ପଦକ୍ଷେପ ଗ୍ରହଣ କରାଯାଇଥିଲା। ସଚିବଙ୍କ ଗସ୍ତ ରାସ୍ତାରେ ଥିବା ଅଣ୍ଡା ଦୋକାନଗୁଡ଼ିକ ବନ୍ଦ ରହିଥିଲା। ଉକ୍ତ ଦୋକାନଗୁଡ଼ିକ ପୋଲିସ କୁଆଡେ ବନ୍ଦ ରଖିବାକୁ କହିଥିବା ଚର୍ଚ୍ଚା ହେଉଛି।
