ନୂଆଦିଲ୍ଲୀ,୩୧।୮: ମୁମ୍ବାଇରେ ଅନୁଷ୍ଠିତ ହେବାକୁ ଥିବା ବିରୋଧୀ ମେଣ୍ଟ ‘ଇଣ୍ଡିଆ’ ବୈଠକର ପ୍ରସ୍ତାବିତ ଏଜେଣ୍ଡାରେ ସଂଯୋଜକ ପ୍ରସଙ୍ଗ ସାମିଲ କରାଯାଇ ନାହିଁ। ସୂତ୍ରରୁ ପ୍ରକାଶ ଯେ, ଏହାକୁ ପ୍ରାରମ୍ଭିକ ଏଜେଣ୍ଡାରେ ରଖାଯାଇ ନାହିଁ। ତଥାପି, ଏକ ସମ୍ଭାବନାରୁ ପ୍ରକାଶ ପାଇଛି ଯେ ଯଦି ସଂଯୋଜକ ନିଷ୍ପତ୍ତି ନେବା ପ୍ରସଙ୍ଗ ଉଠାଯାଏ ତେବେ ଏହାକୁ ସାମିଲ କରାଯାଇପାରେ।
ଏଥି ସହିତ, ଏହି ବୈଠକରେ ଲୋଗୋ, ସମନ୍ବୟ କମିଟି, ନିର୍ବାଚନ ପରିଚାଳନା ସଚିବାଳୟ, ଅନୁସନ୍ଧାନ ବିଭାଗ, ଗଣମାଧ୍ୟମ ଏବଂ ସୋସିଆଲ ମିଡିଆ ଦଳ, ଜାତୀୟ ଏଜେଣ୍ଡା ସ୍ଥିର କରିବାକୁ କମିଟି, ପ୍ରଚାରର ସାଧାରଣ ପ୍ରସଙ୍ଗ, ସାଧାରଣ କାର୍ଯ୍ୟକ୍ରମର ରୂପରେଖା ଆଦି ପ୍ରସଙ୍ଗ ଉପରେ ଆଲୋଚନା ହେବ। ପୂର୍ବରୁ କୁହାଯାଇଥିଲା ଯେ, ସଂଯୋଜକ ପ୍ରସଙ୍ଗ ମଧ୍ୟ ଏଥିରେ ସାମିଲ ରହିବ।