ଭୁବନେଶ୍ୱର,୧୧ା୩(ସୁଚିସ୍ମିତା ସାହୁ): ସର୍ବୋଚ୍ଚ ନ୍ୟାୟାଳୟ ଏବଂ ଓଡ଼ିଶା ଉଚ୍ଚ ନ୍ୟାୟାଳୟଙ୍କ ରାୟର ୫ ମାସ ପରେ ମଧ୍ୟ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ କନିଷ୍ଠ ଶିକ୍ଷକ ପାଇଁ ଚୟନ ହୋଇଥିବା ପ୍ରାର୍ଥୀଙ୍କୁ ନିଯୁକ୍ତି ଦେଉନାହିଁ। ପ୍ରତିବାଦରେ କନିଷ୍ଠ ଶିକ୍ଷକ ଆଶାୟୀମାନେ ମଙ୍ଗଳବାର ଭୁବନେଶ୍ୱର ଲୋୟର ପିଏମ୍ଜିଠାରେ ଧାରଣାରେ ବସିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି। ପରୀକ୍ଷା ନେଲ, ସିଲେକ୍ଟ କଲ, ଚାକିରି ନ ଦେଇ ଭଣ୍ଡେଇ ଦେଲ…ଭଳି ବିଭିନ୍ନ ପ୍ରକାର ସ୍ଲୋଗାନ ଦେଇ ସରକାରଙ୍କ ନିକଟରେ ଦାବି ଉପସ୍ଥାପନ କରିଛନ୍ତି। ସଂଘ ସଭାପତି କସ୍ମନ ମେହେର କହିଛନ୍ତି,
ଏନ୍ଆଇଓଏସ୍ ଡି.ଇଏଲ୍.ଇ.ଡି କୋର୍ସ କରିଥିବା ଛାତ୍ରୀଛାତ୍ର ଜୁନିଅର ଟିଚର ସ୍କିମାଟିକ୍ସ (ଜେଟିଏସ୍) ୨୦୨୩ ପରୀକ୍ଷାରେ କୃତକାର୍ଯ୍ୟ ହୋଇ ଚାକିରି ପାଇଁ ଚୟନ ହୋଇଥିଲେ। ହେଲେ ଏହି ପ୍ରାର୍ଥୀଙ୍କ ଡକ୍ୟୁମେଣ୍ଟ ଭେରିଫିକେଶନ ସମୟରେ ଡି.ଇଏଲ୍.ଇ.ଡି. କୋର୍ସକୁ ରିଜେକ୍ସନ କରାଯାଇଥିଲା। ଏହା ବିରୋଧରେ ଚୟନ ହୋଇଥିବା ପ୍ରାର୍ଥୀମାନେ ସୁପ୍ରିମକୋର୍ଟ ଓ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ନ୍ୟାୟାଳୟ ଡି.ଇଏଲ୍.ଇ.ଡି. କୋର୍ସକୁ ବୈଧ ଘୋଷଣା କରିଥିଲେ। ଏହି ବୈଧ ଘୋଷଣା ପରେ ବିଭିନ୍ନ ରାଜ୍ୟରେ ଏହି ବର୍ଗର କନିଷ୍ଠ ଶିକ୍ଷକ ନିଯୁକ୍ତି ପାଇଥିବା ବେଳେ ଆମ ରାଜ୍ୟରେ ଡବଲ ଇଞ୍ଜିନ ସରକାର କନିଷ୍ଠ ଶିକ୍ଷକଙ୍କ ନିଯୁକ୍ତିକୁ ସରକାର ଅଣଦେଖା କରୁଛନ୍ତି। ଏ ବିଷୟରେ ଚୟିତ ପ୍ରାର୍ଥୀମାନେ ବାରମ୍ବାର ଓସେପା ଓ ଗଣଶିକ୍ଷା ବିଭାଗ ସହ ଯୋଗାଯୋଗ କରିଥିଲେ ସୁଦ୍ଧା ବିଭାଗ ତରଫରୁ କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ତେବେ ପୋଲିସ ସହଯୋଗରେ ଧାରଣାସ୍ଥଳରୁ ଏକ ପ୍ରତିନିଧି ଦଳ ଲୋକସେବା ଭବନସ୍ଥିତ ଗଣଶିକ୍ଷା ବିଭାଗ କାର୍ଯ୍ୟାଳୟକୁ ଯାଇ ସ୍ବତନ୍ତ୍ର ସଚିବ ଗିରିଶ ପ୍ରସାଦଙ୍କ ସହ ସାକ୍ଷାତ କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ତେବେ ଆସନ୍ତା ୭ ରୁ ୧୫ ଦିନ ମଧ୍ୟରେ ନିଯୁକ୍ତି ପ୍ରଦାନ କରା ନ ଗଲେ ଶିକ୍ଷକମାନେ ରାଜରାସ୍ତାକୁ ଓହ୍ଲାଇବା ସହ ଆମରଣ ଅନଶନ କରିବେ ବୋଲି ସଂଘ ସଭାପତିଙ୍କ ସହ କାର୍ଯ୍ୟକର୍ତ୍ତା ଅମ୍ବିକା ପ୍ରିୟଦର୍ଶିନୀ, ନାରାୟଣ ବିଶ୍ବାଳ, ସନ୍ତୋଷ କୁମାର ସ୍ବାଇଁ, ଚିତ୍ତରଞ୍ଜନ ସିଂ, ହରିନାଦ ଦାସ, ବନଶ୍ରୀ କାନନିକା ମହାନ୍ତି ପ୍ରମୁଖ ଚେତାବନୀ ଦେଇଛନ୍ତି।
