ବରଗଡ,୧୧।୪(ପ୍ରେମାନନ୍ଦ ଖମାରୀ): ଭଲ କାହାଣୀ, ଭଲ ନାଟକ ଏବଂ ଭଲ କବିତା ଦ୍ଵାରା ଓଡ଼ିଆ ଭାଷା ତିଷ୍ଠି ରହିପାରିବ । ଯୁବପିଢ଼ିଙ୍କ ମଧ୍ୟରେ ଓଡ଼ିଆ ଭାଷା ସାହିତ୍ୟକୁ ରୁଦ୍ଧିମନ୍ତ କରିବାର ଗୁରୁ ଦାୟିତ୍ଵ ରହିଛି । ସେମାନଙ୍କ ଲେଖନୀ ମୁନରେ ହିଁ ଏ ସ୍ଵପ୍ନ ସାକାର ହୋଇପାରିବ । ଏଣୁ ସେମାନଙ୍କୁ ସମ୍ମାନିତ କରିବା, ସେମାନଙ୍କ କାର୍ଯ୍ୟ ଓ ଦକ୍ଷତାକୁ ସ୍ଵୀକୃତି ଦେବା ଉଦ୍ଦେଶ୍ୟ ନେଇ ଶୁକ୍ରବାର ବରଗଡ଼ ପିଏମଶ୍ରୀ ବାଳିକା ଉଚ୍ଚ ବିଦ୍ୟାଳୟ ଠାରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଏବଂ ଓଡ଼ିଶା ସାହିତ୍ୟ ଏକାଡେମୀର ମିଳିତ ସହଯୋଗରେ ଜିଲାସ୍ତରୀୟ ଯୁବ ଲେଖକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏହି ସମ୍ମିଳନୀରେ ଓଡ଼ିଆ ଜାତୀୟତା, ସଂସ୍କୃତି ଏବଂ ପରମ୍ପରା ଆଧାରିତ ଓଡ଼ିଆ କବିତା ଲିଖନ, ଓଡ଼ିଆ ଗଳ୍ପ ଲିଖନ ଓ ପ୍ରବନ୍ଧ ଲିଖନ ପ୍ରତିଯୋଗିତାରେ ଜିଲାର ବିଭିନ୍ନ ମହାବିଦ୍ୟାଳୟର ୩୦୦ରୁ ଊର୍ଦ୍ଧ୍ଵ ଛାତ୍ରୀଛାତ୍ରମାନେ ଭାଗ ନେଇ ନିଜ ଗଳ୍ପ, ପ୍ରବନ୍ଧ ଏବଂ କବିତା ମଧ୍ୟମରେ ନିଜ କଳ୍ପନାର ପରିପ୍ରକାଶ କରିଥିଲେ l ବାଳିକା ଉଚ୍ଚ ବିଦ୍ୟାଳୟ ପ୍ରଧାନ ଶ୍ରୀକ୍ଷୟିତ୍ରୀ ଶାନ୍ତି ସୁନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ସମ୍ମିଳନୀରେ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ପ୍ରହଲ୍ଲାଦ ଖୋସ୍ଲା ମୁଖ୍ୟ ଅତିଥିଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଜିଲ୍ଲାର ବିଶିଷ୍ଠ ସାହିତ୍ୟିକ, ଲେଖକ, ଗାଳ୍ପିକ ଦିବ୍ୟ କିଶୋର ଦେବତା, ମାନରଞ୍ଜନ ମେହେର, ପାର୍ବତୀଗିରି ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ପ୍ରଦୀପ ହୋତା, ସରକାରୀ ମହା ବିଦ୍ୟାଳୟ, ବଲାଙ୍ଗିରର ପୂର୍ବତନ ଅଧ୍ୟକ୍ଷ ଡଃ ଅଶୋକ ମହାପାତ୍ର, ଭରପ୍ରାପ୍ତ ଜିଲା ସଂସ୍କୃତି ଅଧିକାରୀ ଶ୍ରୀ ତାହିର ହୁସେନ ଏବଂ ଜିଲା ଇ-ପ୍ରଶାସନ ଅଧିକାରୀ ମସ୍ତରାମ ଛନ୍ଦ ପ୍ରମୁଖ ଯୋଗଦେଇ ଯୁବ ଲେଖକଙ୍କୁ ଉତ୍ସାହିତ କରିଥିଲେ ।
