ନୂଆଦିଲ୍ଲୀ,୯।୫: ପ୍ରତିରକ୍ଷା ମନ୍ତ୍ରଣାଳୟ ଶୁକ୍ରବାର ଗଣମାଧ୍ୟମକୁ ପ୍ରତିରକ୍ଷା ଅଭିଯାନ ଏବଂ ସୁରକ୍ଷା ବାହିନୀର ଗତିବିଧିର ସିଧା ପ୍ରସାରଣ ପ୍ରଦର୍ଶନ କରିବାରୁ ନିବୃତ୍ତ ରହିବା ପାଇଁ ଏକ ପରାମର୍ଶ ବା ଆଡଭାଇଜରି ଜାରି କରିଛି।
ଏହାର ସୋସିଆଲ ମିଡିଆ ହ୍ୟାଣ୍ଡେଲ ଏକ୍ସରେ ଏକ ପୋଷ୍ଟରେ ମନ୍ତ୍ରଣାଳୟ କହିଛି, ‘ସମସ୍ତ ଗଣମାଧ୍ୟମ ଚ୍ୟାନେଲ, ଡିଜିଟାଲ ପ୍ଲାଟଫର୍ମ ଏବଂ ବ୍ୟକ୍ତିବିଶେଷଙ୍କୁ ପ୍ରତିରକ୍ଷା ଅଭିଯାନ ଏବଂ ସୁରକ୍ଷା ବାହିନୀର ଗତିବିଧିର ସିଧା ପ୍ରସାରଣ କିମ୍ବା ରିଅଲ-ଟାଇମ ରିପୋର୍ଟିଂରୁ ନିବୃତ୍ତ ରହିବାକୁ ପରାମର୍ଶ ଦିଆଯାଇଛି।’ କାରଣ ସୂତ୍ର ଭିତ୍ତିକ ଖବର ପ୍ରସାରଣ ସେନା କାର୍ଯ୍ୟରେ ବାଧା ସୃଷ୍ଟି କରିପାରେ।
ଏହା କାରଗିଲ ଯୁଦ୍ଧ, ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ଏବଂ କାନ୍ଦାହାର ହାଇଜ୍ୟାକ ଭଳି ଅତୀତର ଘଟଣାଗୁଡ଼ିକୁ ମଧ୍ୟ ଉଲ୍ଲେଖ କରିଛି, ଯାହା ସମୟ ପୂର୍ବରୁ ରିପୋର୍ଟିଂ କରିବାର ବିପଦକୁ ସୂଚିତ କରେ।
ମନ୍ତ୍ରଣାଳୟ କହିଛି ଯେ କେବୁଲ ଟେଲିଭିଜନ ନେଟୱାର୍କ (ସଂଶୋଧନ) ନିୟମ, ୨୦୨୧ ର ଧାରା ୬(୧)(ପି) ଅନୁଯାୟୀ, ଆତଙ୍କବାଦ ବିରୋଧୀ କାର୍ଯ୍ୟ ସମୟରେ କେବଳ ନିଯୁକ୍ତ ଅଧିକାରୀମାନଙ୍କ ଦ୍ୱାରା ସାମୟିକ ବ୍ରିଫିଂ ଅନୁମତି ଦିଆଯାଇଛି।
‘ସମସ୍ତ ଷ୍ଟେକହୋଲ୍ଡମାନଙ୍କୁ ଜାତିର ସେବାରେ ସର୍ବୋଚ୍ଚ ମାନଦଣ୍ଡକୁ ବଜାୟ ରଖି କଭରେଜରେ ସତର୍କତା, ସମ୍ବେଦନଶୀଳତା ଏବଂ ଦାୟିତ୍ୱ ବ୍ୟବହାର କରିବାକୁ ଅନୁରୋଧ କରାଯାଉଛି,ମନ୍ତ୍ରଣାଳୟର ପୋଷ୍ଟରେ ଏହା କୁହାଯାଇଛି।
