ଅନୁଗୋଳ ଅଫିସ, ୩୦।୮: ଓଡ଼ିଶା ଫୁଟ୍ ଓ୍ବେୟାର ଟ୍ରେଡର୍ସ ଆସୋସିଏଶନ୍ (ଓଏଫ୍ଟିଏ) ସଦସ୍ୟଙ୍କୁ ନେଇ ଏକ ସମ୍ମିଳନୀ ଅନୁଗୋଳରେ ଅନୁଷ୍ଠିତ ହୋଇଯାଇଛି। ଓଏଫ୍ଟିଏ ସଭାପତି ଓମ୍ପ୍ରକାଶ ତୁଲସିୟାନ୍, ଉପସଭାପତି ସଞ୍ଜୟ ଲୋହିଆ, ସମ୍ପାଦକ ଅବଦୁଲ ରଜାକ ମେହମୁଦ୍, ଯୁଗ୍ମ ସମ୍ପାଦକ ମହମ୍ମଦ ନିଜାମୁଦ୍ଦିନ୍, କୋଷାଧ୍ୟକ୍ଷ କମଲ ମାଫିକା, ପୂର୍ବତନ ଅଧ୍ୟକ୍ଷ ସତ୍ୟଜିତ୍ ପାତ୍ର, ମୁକେଶ ଜୈନ୍ ପ୍ରମୁଖ ଯୋଗଦେଇଥିଲେ। ଫୁଟ୍ଓ୍ବେୟାର କମ୍ପାନୀଗୁଡିକ ଅନ୍ଲାଇନ କାରବାର କରିବା ଦ୍ୱାରା ଟ୍ରେଡର୍ସମାନେ ସମସ୍ୟାର ସମ୍ମୁଖୀନ ହେଉଛନ୍ତି। ୭-୮ମାସ ହେଲା ଅନ୍ଲାଇନ୍ ମାର୍କିଟିଂ କମ୍ପାନୀଗୁଡ଼ିକ ସିଧାସଳଖ କାରବାର କରୁଛନ୍ତି। ନିର୍ଦ୍ଦିଷ୍ଟ ଆପ୍ ମାଧ୍ୟମରେ ଗ୍ରାହକଙ୍କୁ ପ୍ରଲୋଭନ ଦେଖାଉଛନ୍ତି। ଗୋଟିଏ ଉତ୍ପାଦକୁ ଟ୍ରେଡର୍ସ ଯେତିକି ଟଙ୍କାରେ କିଣୁଛି, ତା’ ଠାରୁ କମ୍ ଦାମରେ କମ୍ପାନୀ ସିଧାସଳଖ ଅନଲାଇନରେ ଗ୍ରାହକ ଏବଂ ରିଟେଲରଙ୍କୁ ବିକ୍ରି କରୁଛି। ଅନ୍ଲାଇନରେ କମ୍ ଦରରେ ସାମଗ୍ରୀ ପାଇବା ପରେ ଡିଷ୍ଟ୍ରିବ୍ୟୁଟରଙ୍କ ଉପରେ ରିଟେଲରଙ୍କ ଭରସା ତୁଟୁଛି। ସେମାନେ ଡିଷ୍ଟ୍ରିବ୍ୟୁଟରଙ୍କ ଦ୍ୱାରା ଠକେଇର ଶିକାର ହେଉଥିବା ଭାବୁଛନ୍ତି। ଅନ୍ଲାଇନ କିଣାବିକା ଦ୍ୱାରା ଓଡ଼ିଶା ସରକାରଙ୍କୁ ଟିକସ ମିଳୁନାହିଁ। ଏହା ଅନ୍ୟ ରାଜ୍ୟର ରାଜକୋଷକୁ ଚାଲିଯାଉଛି। ରାଜ୍ୟରେ ଫୁଟୱେୟାର ଶିଳ୍ପରେ ୧୦ଲକ୍ଷରୁ ଊଦ୍ଧର୍ବ ଲୋକ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ସମ୍ପୃକ୍ତ ଅଛନ୍ତି। କମ୍ପାନୀଗୁଡ଼ିକର ଅନ୍ଲାଇନ୍ କାରବାର ସେମାନଙ୍କ ଭବିଷ୍ୟତକୁ ଅନ୍ଧାରକୁ ଠେଲି ଦେଉଛି। ଏହାର ପ୍ରତିକାର କରାଯିବ ଆବଶ୍ୟକ ବୋଲି ଦାବି ଉଠିଥିଲା। ବୈଠକରେ ଅନୁଗୋଳ, ଢେଙ୍କାନାଳ, କଟକ, ଭୁବନେଶ୍ବର, ବୌଦ୍ଧ, ଭବାନୀପାଟଣା, କେଶିଙ୍ଗା, ବରଗଡ଼, ସମ୍ବଲପୁର, ଝାରସୁଗୁଡ଼ା, ରାଉରକେଲା ଅଞ୍ଚଳର ୨୦ଜଣ ଟ୍ରେଡର୍ସ ଯୋଗ ଦେଇଥିଲେ।
