ଛତ୍ରପୁର,୨୦ା୯(ଦିଲ୍ଲୀପ ସାମଲ/ଦ୍ୱାରିକା ପଟ୍ଟନାୟକ): ଗଞ୍ଜାମ ସାଇବର ପୋଲିସ ଏକ ଅନଲାଇନ୍ ବେଟିଂ ଆପ୍ ଠକେଇ ନେଟ୍ଓ୍ବର୍କର ପର୍ଦ୍ଦାଫାଶ କରି ୩ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଝାଡ଼ଖଣ୍ଡର ଶତ୍ରୁଘ୍ନ କୁମାର ପାଣ୍ଡେ, ଛତିଶଗଡ଼ର ଧର୍ମଦାସ ମାଣିକପୁରୀ ଏବଂ ସ୍ଥାନୀୟ ଚମାଖଣ୍ଡି ଅଞ୍ଚଳର ଜଗଦୀଶ ସେଠୀ।
ରମ୍ଭା ଥାନା ଅଧୀନ ଗଜପତିନଗରରେ ଭଡ଼ା ଘରେ ରହି ଏହି ବେଟିଂ ନେଟ୍ଓ୍ବର୍କ ପରିଚାଳନା କରାଯାଉଥିଲା। ଚଢ଼ାଉ ସମୟରେ ୭୮ଟି ଏଟିଏମ୍ କାର୍ଡ, ୮୬ଟି ସିମ୍କାର୍ଡ, ୧୪ଟି ସ୍ମାର୍ଟଫୋନ, ୨ଟି ଲାପ୍ଟପ୍, ୧ଟି କ୍ରୋମବୁକ୍, ୧୬ଟି ବ୍ୟାଙ୍କ ପାସ୍ବୁକ୍, ଗୋଟିଏ ବାଇକ୍ ଏବଂ ବହୁ ପରିଚୟପତ୍ର ଓ ଦଲିଲ ମିଳିଛି।
‘ରେଡ୍ଡୀ ପ୍ଲେ ୧୧’, ’ଲାଫ୍ ୭୭୭’, ’୧୦୦ ପ୍ୟାନେଲ ଆଦି ବେଟିଂ ଆପ୍ର ୟୁଜର୍ ଆଇଡି, ପାସଓ୍ବାର୍ଡ ଏବଂ ଆର୍ଥିକ ନେଣଦେଣ ରେକର୍ଡ ଜବତ ହୋଇଛି।
ଛତ୍ରପୁରଠାରେ ଆୟୋଜିତ ପ୍ରେସମିଟ୍ରେ ଗଞ୍ଜାମ ଏସ୍ପି ହରିଶ ବିଶି ଏହି ସୂଚନା ଦେଇଛନ୍ତି। ପୋଲିସ କେସ୍ ନଂ ୨୦/୨୬ରେ ଏକ ମାମଲା ରୁଜୁ କରି ଅଧିକ ତଦନ୍ତ ସହ ଡିଜିଟାଲ ଉପକରଣଗୁଡ଼ିକର ଫରେନସିକ୍ ଯାଞ୍ଚ ଚଳାଇଛି। ଛତ୍ରପୁର ଏସ୍ଡିପିଓ ଚନ୍ଦନ କୁମାର ଘଡ଼ାଇ, ସାଇବର ଥାନା ଆଇଆଇସି ଜ୍ୟୋତି ରଞ୍ଜନ ବେହେରାଙ୍କ ସମେତ ଅନ୍ୟାନ୍ୟ ପୋଲିସ ଅଧିକାରୀ ଉପସ୍ଥିତ ଥିଲେ।