ଓ୍ବାଶିମ୍: ମହାରାଷ୍ଟ୍ର ଓ୍ବାଶିମ୍ ଜିଲାର ଏକ ଛୋଟିଆ ଗାଁ ଗଣେଶପୁର। ସେଠାରେ ପାଖାପାଖି ୨୦୦ ଲୋକ ବାସ କରନ୍ତି। ଗାଁରେ ଏକ ଜିଲା ପରିଷଦ ପ୍ରାଇମେରୀ ସ୍କୁଲ ରହିଛି, ଯେଉଁଠାରେ ଜଣେ ଶିକ୍ଷକ ଥିବାବେଳେ ଜଣେ ଛାତ୍ର ସେହି ସ୍କୁଲରେ ପାଠ ପଢ଼ୁଛନ୍ତି। ବିଦ୍ୟାଳୟରେ ପ୍ରଥମରୁ ଚତୁର୍ଥ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ପାଠ ପଢ଼ାଯାଉଥିବାବେଳେ ସେହି ବୟସ ବର୍ଗର କୌଣସି ପିଲା ଆଉ ଗଣେଶପୁରରେ ନାହାନ୍ତ, ଯେଉଁଥି ପାଇଁ ସ୍କୁଲରେ କାର୍ତ୍ତିକ ଶେଗୋକାର ଏକାକୀ ପାଠ ପଢ଼ୁଛନ୍ତି। କାର୍ତ୍ତିକ ପ୍ରତ୍ୟେକ ଦିନ ସ୍କୁଲ ଯାଆନ୍ତି। ସେ ୩ୟ ଶ୍ରେଣୀର ଛାତ୍ର ଅଟନ୍ତି। ତାଙ୍କୁ ପଢ଼ାଉଥିବା ଶିକ୍ଷକ କିଶୋର ମନକରଙ୍କୁ ପ୍ରତ୍ୟେକ ଦିନ ୨୪ କିଲୋମିଟର ଯିବା ଆସିବା କରିବାକୁ ପଡ଼ୁଛି। ଦୁହେଁ ପ୍ରତିଦିନ ସକାଳ ୧୦ଟାରେ ସ୍କୁଲରେ ପହଞ୍ଚନ୍ତି। ପ୍ରାର୍ଥନା ସାଙ୍ଗକୁ ଦୁହେଁ ପ୍ରଥମେ ଜାତୀୟ ସଙ୍ଗୀତ ଗାନ କରନ୍ତି। ଏହାପରେ କିଶୋର ପାଠ ପଢ଼େଇବା ଆରମ୍ଭ କରନ୍ତି। ଦୁଇବର୍ଷ ପୂର୍ବେ ସ୍କୁଲରେ କାର୍ତ୍ତିକଙ୍କ ନାମ ଲେଖାଯାଇଥିବାବେଳେ ତା’ ପରଠାରୁ କୌଣସି ପିଲାଙ୍କ ଆଡ୍ମିଶନ୍ କରାଯାଇ ନ ଥିବା କିଶୋର କହିଛନ୍ତି। ସ୍କୁଲରେ ପିଲା ନ ଥାଇ ସୁଦ୍ଧା ଅନ୍ୟ ବିଦ୍ୟାଳୟରେ ଛାତ୍ରୀଛାତ୍ରମାନଙ୍କୁ ସରକାରଙ୍କ ତରଫରୁ ମିଳୁଥିବା ସମସ୍ତ ସୁବିଧା କାର୍ତ୍ତିକଙ୍କୁ ପ୍ରଦାନ କରାଯାଉଛି।
