ଖୋର୍ଦ୍ଧା ଅଫିସ,୨୯।୪: ଭୁବନେଶ୍ୱର-ଚେନ୍ନାଇ ୧୬ ନମ୍ବର ଜାତୀୟ ରାଜପଥ ଗଡ଼ଖୋର୍ଦ୍ଧା ଛକରେ ଗୁରୁବାର ମର୍ମ୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଗଡ଼ଖୋର୍ଦ୍ଧା ଛକ ରାଜପଥରେ ଲାଗିଥିବା ସିସିଟିଭି କ୍ୟାମେରା ସଜାଡିବା ଲାଗି ରାସ୍ତା ପାର୍ଶ୍ୱରେ ଛିଡ଼ା ହୋଇଥିବା ଏକ ଗାଡ଼ିର ପଛପଟୁ ଧକ୍କା ଦେଇ ପିକ୍ଅପ ଭ୍ୟାନ ଓଲଟି ପଡିବାରୁ ଭ୍ୟାନ ଭିତରେ ଚାପି ହୋଇ ଜଣଙ୍କର ମୃତ୍ୟୁ ଘଟିଥିବା ବେଳେ ୨ଜଣ ଗୁରୁତର ଆହତ ହୋଇଛନ୍ତି। ମୃତକ ହେଲେ ଟାଙ୍ଗୀ ଥାନା ଅନ୍ତର୍ଗତ ମେହେରାମପୁର ଭୂଷଣ୍ଡପୁରର ଅରସାଦ ଅଲ୍ଲି ଖାନ(୪୧)। ଆହତଦ୍ୱୟ ହେଲେ ତବ୍ରିଜ ଖାନ(୩୩) ଓ ଏକବାଲ ଖାନ୍ ଓରଫ ବୁଲୁ(୩୪)। ଅଗ୍ନିଶମ କର୍ମଚାରୀ ପହଞ୍ଚି ଗ୍ୟାସ କଟରରେ ଆହତଙ୍କୁ ଉଦ୍ଧାର କରିଥିବା ବେଳେ ଦେଢ଼ ଘଣ୍ଟା ପରେ ମୃତକଙ୍କୁ ବାହାର କରିଥିଲେ। କ୍ରେନରେ ଉଭୟ ଗାଡିକୁ ପୃଥକ କରାଯାଇଥିଲା। ଟାଉନ ପୋଲିସ ଉଭୟ ଗାଡିକୁ ଜବତ କରି ତଦନ୍ତ ଚଳାଇଛି।
ସୂଚନା ମୁତାବକ, ୧୬ ନମ୍ବର ଜାତୀୟ ରାଜପଥର ଗଡ଼ଖୋର୍ଦ୍ଧା ଛକରେ ଏକ ଅଣ୍ଡରପାସ ନିର୍ମାଣ ଚାଲିଛି। ପଞ୍ଚ ପାଇକ ମୂର୍ତ୍ତି ସମ୍ମୁଖ ରାଜପଥରେ ରାଜପଥ କର୍ତ୍ତୃପକ୍ଷଙ୍କ ପକ୍ଷରୁ ସିସିଟିଭି ଖଞ୍ଜା ଯାଇଛି। ସିସିଟିଭି ଚେକିଂ ଲାଗି ରାସ୍ତା ପାର୍ଶ୍ୱରେ ଗାଡି(ଓଡି୦୨-ବିଟି-୫୭୩୬)କୁ ପାର୍କିଂ କରି ସିସିଟିଭି ଯାଞ୍ଚ ଲାଗି ସରଞ୍ଜାମ ପ୍ରସ୍ତୁତ କରୁଥିଲେ। ମଧ୍ୟାହ୍ନ ୧୨ଟା ୩୦ରେ ଭୁବନେଶ୍ୱର ପଟୁ ମାଛ ଅନଲୋଡ କରି ବାଲୁଗଁା ଅଭିମୁଖେ ଏକ ପିକଅପ ଭ୍ୟାନ(ଓଡି-୩୩-ଏଜି-୦୮୮୫) ଆସୁଥିଲା। ସେଥିରେ ୩ଜଣ ବସିଥିଲେ। ଭ୍ୟାନ ଦ୍ରୁତଗତିରେ ଆସି ରାଜପଥରେ ଛିଡ଼ା ହୋଇଥିବା ଗାଡିକୁ ପଛପଟୁ ଧକ୍କା ଦେଇଥିଲା। ଫଳରେ ଆଗରେ ଛିଡ଼ା ହୋଇଥିବା ଗାଡି ସିମେଣ୍ଟ ଡିଭାଇଡରେ ପିଟି ହୋଇ ଯାଇଥିବା ବେଳେ ପଛରେ ଥିବା ପିକଅପ ଭ୍ୟାନ ଓଲଟି ପଡିଥିଲା। ଉଭୟ ଗାଡି ସମ୍ମୁଖ ଭାଗ ଚୁରମାର ହୋଇଯାଇଥିବା ବେଳେ ଉଭୟ ଗାଡି ଲାଖିଯାଇଥିଲା। ଫଳରେ ଭ୍ୟାନରେ ରହିଥିବା ୩ଜଣ ଚାପି ହୋଇଯାଇଥିଲେ। ଖବରପାଇ ଶିଳ୍ପାଞ୍ଚଳ ଫାଣ୍ଡି ଓ ଟାଉନ ପୋଲିସ ଘଟଣା ସ୍ଥଳରେ ପହଞ୍ଚିଥିଲେ। ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ପ୍ରାୟ ଏକ ଘଣ୍ଟା ପରେ ଦୁଇ ଆହତଙ୍କୁ ଉଦ୍ଧାର କରାଯାଇ ଆମ୍ବୁଲାନ୍ସରେ ଚିକିତ୍ସା ଲାଗି ଖୋର୍ଦ୍ଧା ମେଡିକାଲକୁ ପଠାଯାଇଥିଲେ। ଭ୍ୟାନ ଭିତରେ ଚାପି ହୋଇ ମୃତ୍ୟୁବରଣ କରିଥିବା ଅରସାଦଙ୍କୁ ପ୍ରାୟ ଦେଢ ଘଣ୍ଟାର ପରିଶ୍ରମ ପରେ ବାହାର କରିଥିଲେ। ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ଲାଗି ପଠାଇ ଗାଡି ଦୁଇଟିକୁ କ୍ରେନ ସାହାର୍ଯ୍ୟରେ ପୃଥକ କରି ଥାନାକୁ ନେଇଥିଲା। ଅନ୍ୟପଟେ ଦୁର୍ଘଟଣା ଯୋଗୁ ରାଜପଥରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଏକ କିମି ପର୍ଯ୍ୟନ୍ତ ଯାନବାହନ ଅଟକି ରହିଥିଲା। ଖବରପାଇ ଆଞ୍ଚଳିକ ପରିବହନ ଅତିରିକ୍ତ ପରିବହନ ଅଧିକାରୀ ଅରବିନ୍ଦ ନାୟକ ଟିମ୍ ସହ ପହଞ୍ଚିଥିଲେ। ଆରଟିଓ କର୍ମଚାରୀ ଏବଂ ପୋଲିସ ସ୍ଥାନୀୟ ଲୋକଙ୍କ ସହାୟତାରେ ଟ୍ରାଫିକ ନିୟନ୍ତ୍ରଣ କରିଥିଲେ।