ଅମରପାଲି,୧୭ା୮(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଲୁତୁରପଙ୍କ ପଞ୍ଚାୟତର ପୁରୁଷୋତ୍ତମପାଲିରେ ଝାଡ଼ାବାନ୍ତି ବ୍ୟାପିଛି। ଏଥିରେ ଜଣକଙ୍କର ମୃତ୍ୟୁ ହୋଇଥିବା ବେଳେ ୧୧ଜଣ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ତେବେ ଶନିବାର ରାତିରେ ଆଉ ୩ ଜଣ ଆକ୍ରାନ୍ତ ହୋଇ ଡାକ୍ତରଖାନାକୁ ଚିକିତ୍ସା ପାଇଁ ନିଆଯାଇଥିବା ଜଣାପଡ଼ିଛି। ମୃତକ ଜଣକ ହେଲେ ପୁରୁଷୋତ୍ତମପାଲି ଗ୍ରାମର ଦେବରାଜ ବେହେରା(୬୪)।
ଗତ ବୁଧବାର ମୃତକ ଜଣକ ଝାଡ଼ାବାନ୍ତି ହୋଇଥିଲେ। ପ୍ରଥମେ ତାଙ୍କୁ ବୀରମହାରାଜପୁର ଡାକ୍ତରଖାନାକୁ ନିଆଯାଇଥିଲା। ସେଠାରେ ମଧ୍ୟ ଝାଡ଼ା ବାନ୍ତି ନ କମିବାରୁ ତାଙ୍କୁ ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ମାତ୍ର ସେଠାରେ ସେ ଚିକିତ୍ସାଧୀନ ଅବସ୍ଥାରେ ଗୁରୁବାର ତାଙ୍କର ମୃତ୍ୟୁ ଘଟିଥିଲା। ଏବେ ମଧ୍ୟ ଗାଁରେ ପ୍ରାୟ ୧୪ ଜଣ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି। ଅନ୍ୟ ଆକ୍ରନ୍ତମାନେ ହେଲେ ସେହି ଗ୍ରାମର ନିମାଇଁ ବେହେରା(୩୫), ବାସନ୍ତୀ ବେହେରା(୨୮), ଜଲି ବେହେରା(୭), ସପ୍ତେଶ୍ବରୀ ଗାଇଗରିଆ(୬୨), ଚକ୍ରଧର ଗାଇଗରିଆ (୪୨), ମୃତ୍ୟୁଞ୍ଜୟ ବେହେରା(୧୭),ଯାଜ୍ଞସେନୀ ଚୌଧୁରୀ(୫),ଉଜାଲା ଚୌଧୁରୀ(୧୦), ପ୍ରାଣବନ୍ଧୁ ଚୌଧୁରୀ(୫୨), ପ୍ରଭଞ୍ଜନ ଚୌଧୁରୀ(୨୨) ଓ ସୁଶାନ୍ତ ଚୌଧୁରୀ(୫୫)ବୋଲି ଜଣାପଡ଼ିଛି।
ଉକ୍ତ ଗ୍ରାମରେ ଝାଡ଼ାବାନ୍ତିରେ ଆକ୍ରାନ୍ତ ହୋଇ ଜଣଙ୍କର ମୃତ୍ୟୁ ହେବା ପରେ ଗାଁ ଲୋକଙ୍କୁ ମୃତ୍ୟୁ ଭୟ ଘାରିଛି। ଅନ୍ୟପକ୍ଷରେ ଝାଡ଼ାବାନ୍ତିର ମୃତ୍ୟୁ ହେବା ଘଟଣାକୁ ନେଇ ସ୍ବାସ୍ଥ୍ୟ ବିଭାଗ ବେଶ୍ ତତ୍ପରତା ପ୍ରକାଶ କରିଛି। ମୁର୍ଷୁଣ୍ଢି ଉପସ୍ବାସ୍ଥ୍ୟକେନ୍ଦ୍ରର ଡାକ୍ତର ଶିବାନନ୍ଦ ଚାଉଳିଆଙ୍କ ନେତୃତ୍ୱରେ ଏକ ମେଡିକାଲ ଟିମ୍ ଯାଇ ଆକ୍ରାନ୍ତଙ୍କ ଚିକିତ୍ସା କରୁଛନ୍ତି। ଆୟୁଷ ଡାକ୍ତର ନିରୂପମା ମହାପାତ୍ର,ସ୍ବାସ୍ଥ୍ୟକର୍ମୀ ସଞ୍ଜୁ ମଲ୍ଲିକ, ଆଶାକର୍ମୀ ଯଶୋବନ୍ତୀ ଚନ୍ଦ ଓ ଅଙ୍ଗନଓ୍ବାଡି କର୍ମୀ ଆରତୀ ଦେହୁରୀ ଗାଁ ରେ ଘର ଘର ବୁଲି ସଚେତନ କରୁଛନ୍ତି।
ଲୋକଙ୍କୁ ଓଆର୍ଏସ୍ ଓ ଔଷଧ ବଣ୍ଟନ କରାଯାଉଛି। ବ୍ଲିଚିଂ ପାଉଡର ପକାଇ ଲୋକଙ୍କୁ ବିଶୁଦ୍ଧ ପାଣି ବ୍ୟବହାର କରିବାକୁ ପରାମର୍ଶ ଦିଆଯାଉଛି। ଘର ଘର ଯାଇ ଆକ୍ରାନ୍ତଙ୍କୁ ଆମ୍ବୁଲାନ୍ସ ଯୋଗେ ଡାକ୍ତରଖାନାକୁ ପଠାଉଛନ୍ତି।
ବୀରମହାରାଜପୁର ଉପଖଣ୍ଡ ଚିକିତ୍ସାଳୟର ଅଧ୍ୟକ୍ଷ ଡ.ସଞ୍ଜୟ ମହାପାତ୍ରଙ୍କୁ ପରାଚିବାରୁ ଗ୍ରାମକୁ ମେଡିକାଲ ଟିମ୍ ଯାଇ ଚିକିତ୍ସା କରୁଛନ୍ତି। ବିଭାଗ ପ୍ରସ୍ତୁତ ରହିଛି। ଘଟଣା ଉପରେ ବିଭାଗର ତିକ୍ଷଣ ନଜର ରହିଛି ବୋଲି କହିବା ସହିତ ଗ୍ରାମରେ ଏବେ ଝାଡାବାନ୍ତି ସ୍ଥିତି ନିୟନ୍ତ୍ରଣାଧୀନ ରହିଛି ବୋଲି ପ୍ରକାଶ କରିଛନ୍ତି। ଖବର ପାଇ ଆକ୍ରାନ୍ତଙ୍କୁ ଭେଟି ସମସ୍ୟା ବୁଝି ଚିକିତ୍ସା ବ୍ୟବସ୍ଥା କରିବା ସହିତ ଝାଡ଼ାବାନ୍ତିରେ ମୃତକଙ୍କ ପରିବାରକୁ ଭେଟି ସମବେଦନା ଜଣାଇଛନ୍ତି ଜନପ୍ରତିନିଧି। ବୀରମହାରାଜପୁର ବ୍ଲକ ଉପାଧ୍ୟକ୍ଷ ନାରାୟଣ ଲୁହା ଓ ସ୍ଥାନୀୟ ସରପଞ୍ଚ ସୂର୍ଯ୍ୟ ନନ୍ଦ, ପିଇଓ ଗୌର ଚରଣ ସାହୁ ପ୍ରମୁଖ ପୁରୁଷୋତ୍ତମପାଲିକୁ ଯାଇ ଆକ୍ରାନ୍ତଙ୍କ ସ୍ଥିତି ଦେଖି ମେଡିକାଲ ଟିମ୍କୁ ଡାକି ଚିକିତ୍ସା ବ୍ୟାବସ୍ଥା କରାଇଥିଲେ। ଏହା ସହିତ ମୃତକଙ୍କ ପରିବାରକୁ ଭେଟି ସମବେଦନା ଜଣାଇଛନ୍ତି ବ୍ଲକ ଉପାଧ୍ୟକ୍ଷ ନାରାୟଣ ଲୁହା। ମୃତକଙ୍କ ପରିବାରକୁ ଆର୍ଥିକ ସହାୟତା ମଧ୍ୟ ପ୍ରଦାନ କରିଛନ୍ତି।
