କେନ୍ଦୁଝର,୨୧ା୬(ନରେଶ ଚନ୍ଦ୍ର ପଟ୍ଟନାୟକ): ଘଟଗାଁ ଥାନା ଅନ୍ତର୍ଗତ କୋଳିମାଟିଠାରେ ଗତ ୭ ତାରିଖରେ ଜାତୀୟ ରାଜପଥ ୨୦ର ମେଲଣ ନିକଟରେ ବନ ବିଭାଗ କର୍ମଚାରୀଙ୍କ ଉପରେ ଆକ୍ରମଣ କରି ଚୋରା କାଠ ବୋଝେଇ ଗାଡ଼ି ଲୁଟି ନେବା ଘଟଣାରେ ପୋଲିସ ସାନ୍ତରାପୁରର ଜଣେ କାଠ ମାଫିଆ ଏସ୍କେ ଫିରୋଜଙ୍କୁ ଗିରଫ କରିଛି। ଏଥିସହ ୩ଟି ଗାଡି ଜବତ କରିଛି ବୋଲି ଘଟଗାଁ ଥାନା ଅଧିକାରୀ ପ୍ରତିଭା ସାହୁ କହିଛନ୍ତି। ଘଟଣା ଦିନ ରାତିରେ ପ୍ରାୟ ୩ଟି ଗାଡ଼ିରେ ୩୫ରୁ ଊର୍ଦ୍ଧ୍ୱ ମାଫିଆ ବନ ବିଭାଗ କର୍ମଚାରୀଙ୍କୁ ମାରଣାସ୍ତ୍ର ଧରି ଆକ୍ରମଣ କରିଥିଲେ। ଉକ୍ତ ଘଟଣାରେ ୩ଜଣ ବନ କର୍ମଚାରୀ ଆହତ ହୋଇଥିଲେ। ବନ କର୍ମଚାରୀମାନେ ଚୋରାକାଠ ବୋଝେଇ ବୋଲେରୋ ନେଇ ଫେରୁଥିବା ବେଳେ ମାଫିଆମାନେ ସଂଘବଦ୍ଧ ଭାବେ ଆକ୍ରମଣ କରିଥିଲେ। କାଠ ମାଫିଆମାନେ ବନ ବିଭାଗର ଦୁଇଟି ବୋଲେରର ଆଗ କାଚ ଏବଂ ପଛ କାଚ ଭାଙ୍ଗି ଦେଇଛନ୍ତି । ଏହାକୁ ନେଇ ଘଟଗାଁ ରେଞ୍ଜର ପ୍ରଭାତ କୁଅଁର ଘଟଗାଁ ଥାନାରେ ଏତଲା ଦେଇଥିଲେ। ଏତଲାକୁ ଆଧାର କରି ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ସାନ୍ତରାପୁର ଅଞ୍ଚଳରୁ ମାତ୍ର ଜଣଙ୍କୁ ଗିରଫ କରିବାରେ ସମର୍ଥ ହୋଇଛି। ଅନ୍ୟ କାଠ ମାଫିଆମାନେ ଗାଁ ଛାଡି ଅନ୍ୟ ଅଞ୍ଚଳରେ ଲୁଚି ଛପି ରହିଥିବା ବେଳେ ପୋଲିସ ସେମାନଙ୍କର ଟେର୍ ପାଉନାହିଁ।
