ନୂଆଦିଲ୍ଲୀ,୨୪।୨: ଭାରତୀୟ କ୍ରିକେଟର ସଚିନ ତେନ୍ଦୁଲକର ‘ଗଡ୍ ଅଫ୍ କ୍ରିକେଟ୍’ ଭାବେ ଜଣାଶୁଣା। ସେ ୧୩ ବର୍ଷ ପୂର୍ବେ ଆଜିର ଦିନରେ ଦିନିକିଆ କ୍ରିକେଟ ଇତିହାସରେ ନୂଆ ରେକର୍ଡ ସୃଷ୍ଟି କରିଥିଲେ। ଦିନିକିଆରେ ଦ୍ୱିଶତକ ହାସଲ କରିବାରେ ତେନ୍ଦୁଲକର ପ୍ରଥମ ବ୍ୟାଟ୍ସମ୍ୟାନ୍ ପାଲଟିଥିଲେ। ଗ୍ବାଲିଅରର କ୍ୟାପ୍ଟେନ ରୂପ ସିଂ ଷ୍ଟାଡିୟମରେ ଦକ୍ଷିଣ ଆଫ୍ରିକା ବୋଲରଙ୍କୁ ଘାଇଲା କରି ସେ ଏହି ଉପଲବ୍ଧି ହାସଲ କରିଥିଲେ।
ସଚିନଙ୍କ ରେକର୍ଡ ସହ କ୍ରିକେଟରେ ଏକ ନୂଆ ପରମ୍ପରାର ଆରମ୍ଭ ହୋଇଥିଲା ବୋଲି କୁହାଯାଏ। କାରଣ ତାଙ୍କ ପୂର୍ବରୁ ଏଭଳି କାରନାମା କୌଣସି ବ୍ୟାଟ୍ସମ୍ୟାନ୍ କରି ନ ଥିଲେ। ତାଙ୍କ ପରେ ଏଯାବତ ଦିନିକିଆ କ୍ରିକେଟରେ ୧୦ ଦ୍ୱିଶତକ ମରାଯାଇଛି। ସେଥିରୁ ୭ ଭାରତୀୟ ବ୍ୟାଟ୍ସମ୍ୟାନ୍ ସ୍କୋର କରିଛନ୍ତି। ନିକଟରେ ଶୁଭମନ ଗିଲ ନ୍ୟୁଜିଲାଣ୍ଡ ବିପକ୍ଷରେ ଦ୍ୱିଶତକ ହାସଲ କରିଥିଲେ।
ସଚିନ ଖେଳିଥିବା ଉକ୍ତ ଦ୍ୱିଶତକୀୟ ଇନିଂସ ବିଷୟରେ କହିବାକୁ ଗଲେ ଉକ୍ତ ମ୍ୟାଚ୍ରେ ଭାରତ ପ୍ରଥମେ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ସଚିନ ଇନିଂସର ୫୦ତମ ଓଭରର ତୃତୀୟ ବଲ୍ରେ ଏକ ରନ୍ ନେଇ ନିଜର ଦ୍ୱିଶତକ ପୂରଣ କରିଥିଲେ। ସେ ୧୪୭ ବଲ୍ରେ ୨୦୦ ରନ୍ କରିଥିଲେ।
ସଚିନଙ୍କ ଏହି ସଫଳତା ପରେ କମେଣ୍ଟ୍ରି କରୁଥିବା ରବି ଶାସ୍ତ୍ରୀ କହିଥିଲେ, ‘୨୦୦ରେ ପହଞ୍ଚିଥିବା ପୃଥିବୀର ପ୍ରଥମ ବ୍ୟକ୍ତି ଏବଂ ସେ ହେଉଛନ୍ତି ଭାରତର ସୁପରମ୍ୟାନ୍। ଦୟାକରି ମୋର ପ୍ରଣାମ ଗ୍ରହଣ କର, ମାଷ୍ଟର’। ପରେ ସଚିନ ମ୍ୟାନ୍ ଅଫ ଦ ମ୍ୟାଚ୍ ପୁରସ୍କାର ପାଇବା ପରେ ଦ୍ୱିଶତକକୁ ଭାରତବାସୀଙ୍କୁ ଉତ୍ସର୍ଗ କରିଥିଲେ। ଆଜି ବି କ୍ରିକେଟ ପ୍ରଶଂସକ ଉକ୍ତ ଦିନ ସହ ଶାସ୍ତ୍ରୀଙ୍କ ଶବ୍ଦକୁ ମନେ ପକାଉଛନ୍ତି।
