ନୂଆଗାଁ,୧୨।୫(ଡି.ଏନ.ଏ.): ଅଧିକାଂଶ ସମୟରେ ଛୋଟ ପିଲାମାନଙ୍କ ଗଠନ ମୂଳକ ପରାମର୍ଶ ସଫଳତା ଆଣିଥାଏ। ସେମିତି ଜଣେ ୧୧ବର୍ଷ ବୟସ୍କ ଝିଅର ପରାମର୍ଶରେ ଜଣେ ଯୁବକ ନିଜ ପରିବାରର ଆର୍ଥିକ ସ୍ଥିତିକୁ ବଦଳାଇବାରେ ସକ୍ଷମ ହୋଇଛନ୍ତି। ଏହି ଘଟଣା ଏବେ ନୟାଗଡ଼ ଜିଲା ନୂଆଗାଁ ବ୍ଲକରେ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ଦିନ ଥିଲା ନୂଆଗାଁ ବ୍ଲକ୍ ମହିପୁର ପୋଖରା ଗ୍ରାମର ଶ୍ରୀକାନ୍ତ ପାତ୍ର କୌଣସି କାମଧନ୍ଦା କରୁ ନ ଥିଲେ। ଫଳରେ ପରିବାରର ଆର୍ଥିକ ସ୍ଥିତି ଦୁର୍ବଳ ହେବାରେ ଲାଗିଥିଲା। ଏପରି ପରିସ୍ଥିତିରେ ସେ କୌଣସି ଉପାୟ ନ ପାଇ କାମ ଅନ୍ବୋଷଣରେ ଭୁବନେଶ୍ୱର ଚାଲି ଯାଇଥିଲେ। ବହୁ ଦିନ ଭୁବନେଶ୍ୱରରେ ରହିବା ପରେ ମଧ୍ୟ ତାଙ୍କୁ କୌଣସି କାମ ମିଳି ନ ଥିଲା। ଅନ୍ୟ କୌଣସି ଉପାୟ ନ ପାଇଁ ୨୦୦୭ରେ ସେ ଭୁବନେଶ୍ୱରରେ ଅଟୋରିକ୍ସା ଚଳାଇବା ଆରମ୍ଭ କରିଥିଲେ। ଏମିତି କିଛିଦିନ ଚାଲିବା ପରେ ଦିନକୁ ଦିନ ରାଜଧାନୀରେ ଅଟୋରିକ୍ସା ସଂଖ୍ୟା ବୃଦ୍ଧି ପାଇଥିଲା। ଫଳରେ ଶ୍ରୀକାନ୍ତଙ୍କ ରୋଜଗାର କମିବାରେ ଲାଗିଲା । ତେଣୁ ସେ ଗାଁକୁ ଫେରି ଆସି ଏକ ବ୍ୟାଟେରୀ ଚାଳିତ ଅଟୋରିକ୍ସା ଚଳାଇବା ଆରମ୍ଭ କରିଥିଲେ । ହେଲେ ଆଦିବାସୀ ଅଧ୍ୟୁଷିତ ଅଞ୍ଚଳରେ ଅଟୋରିକ୍ସା ବ୍ୟାଟେରୀକୁ ଚାର୍ଜ କରିବାରେ ବହୁତ ଅସୁବିଧାର ସମ୍ମୁଖୀନ ହେବାକୁ ପଡ଼ିଲା । ଗାଁଠାରୁ ଦୂରକୁ ଅଟୋରିକ୍ସା ନେଇ ଯିବା ବି ସମ୍ଭବ ହେଲାନାହିଁ। ଏହି ଚିନ୍ତାରେ ଶ୍ରୀକାନ୍ତ ବ୍ୟସ୍ତ ହେଉଥିଲେ। ଏଣେ ଅଟୋରିକ୍ସା ନ ଚାଲିବାରୁ ପରିବାରର ସାଧାରଣ ଖର୍ଚ୍ଚ ତୁଲାଇବା କଷ୍ଟକର ହୋଇପଡୁଥିଲା। ଏହାର ପ୍ରଭାବ ପରିବାର ସଦସ୍ୟଙ୍କ ଉପରେ ପଡିଥିଲା। ଏପରି ସ୍ଥିତିରେ ଶ୍ରୀକାନ୍ତଙ୍କ ଷଷ୍ଠ ଶ୍ରେଣୀରେ ପଢୁଥିବା ୧୧ ବର୍ଷର ଝିଅ ଶ୍ରଦ୍ଧାଞ୍ଜଳି ବି ରାତିରେ ଏହି ଚିନ୍ତାରେ ଶୋଇ ପାରୁ ନ ଥିଲେ। ଦିନେ ସେ ମୋବାଇଲରେ ୟୁଟ୍ୟୁବ୍ ଦେଖି ସୋଲାର ପ୍ଲେଟ୍ର କାର୍ଯ୍ୟଦକ୍ଷତା ବିଷୟରେ ଜାଣିବାକୁ ପାଇଥିଲେ । ରାତି ସାରା ସେ ବିଭିନ୍ନ ସାଇଡ୍ ଖୋଲି ସୋଲାର ପ୍ଲେଟ୍ ଉପରେ ଅଧିକ ତଥ୍ୟ ସଂଗ୍ରହ କରିଥିଲେ। ସକାଳୁ ଉଠି ସୋଲାର ପ୍ଲେଟ୍ ମାଧ୍ୟମରେ ଅଟୋରିକ୍ସା ଚାଲି ପାରିବ କି ନାହିଁ ବୋଲି ବାପାଙ୍କୁ ପ୍ରଶ୍ନ କରିଥିଲେ । ସେଦିନଠାରୁ ସୋଲାର ପ୍ଲେଟ୍ରେ ଅଟୋରିକ୍ସା ଚଳାଇବାର ନିଶା ଶ୍ରୀକାନ୍ତଙ୍କ ମୁଣ୍ଡକୁ ଜୁଟି ଥିଲା । ଏଥିପାଇଁ ସେ ବିଭିନ୍ନ ଗ୍ୟାରେଜ୍ ମାଲିକଙ୍କ ସହିତ ପରାମର୍ଶ କରିଥିଲେ। ଶେଷରେ ଅଟୋରିକ୍ସା ଉପରେ ରହିବା ଯୋଗ୍ୟ ଏକ ସୋଲା ପ୍ଳେଟ କିଣି କଟକର ଏକ ଗ୍ୟାରେଜକୁ ନେଇଥିଲେ। ଆବଶ୍ୟକ ସରଞ୍ଜାମ ମାଧ୍ୟମରେ ସେହି ପ୍ଲେଟ୍ ଅଟୋରିକ୍ସା ଉପରେ ଲଗାଇବା ପରେ ତାଙ୍କ ଅଟୋରିକ୍ସା ପୂର୍ବପରି ଚାଲିଥିଲା। ଏଥିପାଇଁ ତାଙ୍କୁ ପ୍ରାୟ ୫୭ ହଜାର ଟଙ୍କା ଖର୍ଚ୍ଚ କରିବାକୁ ପଡ଼ିଥିଲା। ଗତ ପ୍ରାୟ ୨ମାସ ହେଲା ଶ୍ରୀକାନ୍ତ ନିଜର ସୋଲାର ଅଟୋରିକ୍ସା ଚଳାଇ ଭଲ ରୋଜଗାର କରିପାରୁଥିବା କହିଛନ୍ତି। ଆଉ ବ୍ୟାଟେରୀ ଚାର୍ଜ କରିବା କିମ୍ବା ତେଲ ପକାଇବାକୁ ତାଙ୍କୁ କେଉଁଠି ଅପେକ୍ଷା କରିବାକୁ ପଡୁ ନାହିଁ। ରାସ୍ତାରେ ଅଟୋରିକ୍ସା ଚାଲିବା ସମୟରେ ସୂର୍ଯ୍ୟଙ୍କ କିରଣରେ ସୋଲାର ପ୍ଲେଟ୍ ଚାର୍ଜ ହେଉଛି । ସେଥିପାଇଁ ତାଙ୍କୁ ଏକ ଟଙ୍କା ବି ଖର୍ଚ୍ଚ କରିବାକୁ ଆଉ ପଡୁ ନାହିଁ ବୋଲି ଶ୍ରୀକାନ୍ତ କହିଛନ୍ତି। ଝିଅର ପରାମର୍ଶ ମୋତେ ନୂଆ ରାସ୍ତା ଦେଖାଇଲା ବୋଲି ସେ କହିଛନ୍ତି।
