ନୂଆଦିଲ୍ଲୀ,୧୨।୩: ଅନାସ୍ଥା ପ୍ରସ୍ତାବ ଖାରଜ ପରେ ଲୋକସଭା ବାଚସ୍ପତି ଆସନରେ ବସିଛନ୍ତି ଓମ୍ ବିର୍ଲା। ଏହି ଅବସରରେ ବାଚସ୍ପତି ବିରୋଧୀଙ୍କ ପ୍ରତିଟି ଅଭିଯୋଗର ଉତ୍ତର ରଖିଛନ୍ତି।
ଗୃହର କୌଣସି ସଦସ୍ୟ ନିୟମ ଊଦ୍ଧର୍ବରେ ନୁହଁନ୍ତି ବୋଲି କହିବା ସହ ଗୃହ କାର୍ଯ୍ୟକୁ ସୂଚାରୁ ରୂପେ ପରିଚାଳନା କରିବା ବାଚସ୍ପତିଙ୍କ ଦାୟିତ୍ୱ ବୋଲି ସେ କହିଛନ୍ତି। ଏପରିକି ଗୃହର ଗରିମା ବୃଦ୍ଧି ପାଇଁ ସବୁବେଳେ ସେ ଉଦ୍ୟମରତ ଥିବା କହିଛନ୍ତି। ନିରପେକ୍ଷ ଭାବେ ଗୃହ କାର୍ଯ୍ୟ ପରିଚାଳନା ପାଇଁ ସବୁବେଳେ ଚେଷ୍ଟା କରୁଥିବା ବାଚସ୍ପତି କହିଛନ୍ତି।
ଲୋକସଭାରେ ମାଇକ ସୁଇଚ୍ ଅଫ କରାଯାଇଥିବା ରାହୁଲଙ୍କ ଅଭିଯୋଗକୁ ବାଚସ୍ପତି ଖଣ୍ଡନ କରିଛନ୍ତି। ସେ କହିଛନ୍ତି ବାଚସ୍ପତିଙ୍କ ଆସନ ନିକଟରେ କୌଣସି ମାଇକ୍ ସୁଇଚ୍ ନ ଥାଏ। ଗୃହରେ କୌଣସି ସଦସ୍ୟଙ୍କ ପ୍ରତି ପକ୍ଷପାତିତା କରି ନ ଥିବା ବାଚସ୍ପତି କହିଛନ୍ତି।
