ପୁରୀ ଅଫିସ,୧୩ା୩: ପୁରୀ ସମୁଦ୍ରକୂଳରେ ବିରଳ ଅଲିଭ ରିଡ୍ଲେ କଇଁଛଙ୍କ ମିଳନ ପରେ ଏବେ ଅଣ୍ଡାଦାନ ପ୍ରକ୍ରିୟା ଆରମ୍ଭ ହୋଇଛି। କଇଁଛମାନେ ସୁରକ୍ଷିତ ସ୍ଥାନ ମଣୁଥିବା ବେଳାଭୂମିରେ ଅଣ୍ଡା ଦେଉଛନ୍ତି। ମୁଖ୍ୟତଃ ଓଡ଼ିିଶା ଉପକୂଳରେ ଅଲିଭ୍ ରିଡ୍ଲେ କଇଁଛମାନେ ଅଣ୍ଡା ଦେଇଥାନ୍ତି। ତେବେ ପ୍ରଥମଥର ପାଇଁ ଅଲିଭ ରିଡ୍ଲେ କଇଁଛମାନେ ଅଣ୍ଡାଦାନ ପାଇଁ ପୁରୀ ପେଣ୍ଠକଟା ସମୁଦ୍ର ମୁହାଁ ହୋଇଛନ୍ତି, ଯାହାକୁ ନେଇ ପରିବେଶବିତ୍ମାନେ ଖୁସି ବ୍ୟକ୍ତ କରିଛନ୍ତି। ପେଣ୍ଠକଟା ଗଙ୍ଗାଦେବୀ ସାହି ନିକଟ ବେଳାଭୂମିରେ ଅଲିଭ ରିଡଲେ କଇଁଛମାନେ ଅଣ୍ଡା ଦେଇଥିବା ରବିବାର ସକାଳେ ଦେଖିବାକୁ ମିଳିଛି। କଇଁଛମାନେ ଅଣ୍ଡା ଦେଇ ସେଗୁଡିକୁ ବାଲିରେ ପୋତି ଚାଲିଯାଇଛନ୍ତି। ସକାଳୁ ସ୍ଥାନୀୟ ମତ୍ସ୍ୟଜୀବୀ ସମୁଦ୍ରକୁ ଡଙ୍ଗା ନେଇ ଯିବାବେଳେ ଏହା ଦେଖି ମୋବାଇଲ କ୍ୟାମେରାରେ କଏଦ କରିଥିଲେ। ପରେ ଲୋକେ ବନ ବିଭାଗକୁ ଖବର ଦେଇଥିଲେ। ବନ ବିଭାଗ କର୍ମଚାରୀ ପହଞ୍ଚି ବାଲି ଭିତରୁ ୧୧୫ଟି ଅଣ୍ଡା ଉଦ୍ଧାର କରି ବ୍ୟାଗରେ ପୂରାଇ ନେଇଯାଇଥିଲେ।
ସାମାଜିକ କର୍ମୀ ବିସ୍ମୟ ମିଶ୍ର କହିଛନ୍ତି, ଅଲିଭ ରିଡ୍ଲେ ଅଣ୍ଡା ଦେଇଥିବା ନେଇ ରବିବାର ସକାଳ ପ୍ରାୟ ୬ଟାରେ କମ୍ୟୁନିଟିରୁ ତାଙ୍କ ନିକଟକୁ ଫୋନ ଆସିଥିଲା। ଖବର ପାଇ ସେ ସେଠାକୁ ଯାଇ ଦେଖିବା ବେଳକୁ କଇଁଛ ଅଣ୍ଡା ଦେଇ ଚାଲିଯାଇଥିଲା। ତେବେ କୁକୁର ଉକ୍ତ ସ୍ଥାନରେ ମୁହଁ ମାରିଥିବା ସେ ଦେଖିବାକୁ ପାଇଥିଲେ। ତେଣୁ ଉକ୍ତ ସ୍ଥାନକୁ ଯେପରି କୁକୁର ନ ଯିବ ଏବଂ ଅଣ୍ଡା ନଷ୍ଟ ନ କରିବ ସେଥିପ୍ରତି ଧ୍ୟାନ ଦେବାକୁ ବନ ବିଭାଗକୁ ସୂଚନା ଦେଇଥିଲୁ। ଏଣେତେଣେ ପଡ଼ିରହିଥିବା କଇଁଛ ଅଣ୍ଡାଗୁଡିକୁ ଗୋଟିଏ ସ୍ଥାନରେ ବାଲିରେ ପୋତି ରଖିଥିଲୁ। କିଛି ସମୟ ପରେ ବନ ବିଭାଗର କର୍ମଚାରୀ ଆସି ଏକ ସାଧାରଣ ବ୍ୟାଗରେ ସମସ୍ତ ୧୧୫ଟି ଅଣ୍ଡାକୁ ବାଲିରୁ ଉଦ୍ଧାର କରି ନେଇଯାଇଥିଲେ। ତେବେ ରାଜ୍ୟ ସରକାର ବିରଳ ଅଲିଭ ରିଡ୍ଲେ କଇଁଛମାନଙ୍କ ସୁରକ୍ଷା ପାଇଁ ଅନେକ ପଦକ୍ଷେପ ନେଉଛନ୍ତି। ମାତ୍ର ପ୍ରଶାସନ କଇଁଛଙ୍କ ସୁରକ୍ଷା ପ୍ରତି ବିଶେଷ ଧ୍ୟାନ ଦେଉନାହିଁ। କଇଁଛ ଅଣ୍ଡା ସୁରକ୍ଷିତ ରହିଲେ କଇଁଛ ବଂଶ ବୃଦ୍ଧି ହେବ। ମାତ୍ର ବନ ବିଭାଗ ପକ୍ଷରୁ ସାଧାରଣ ବ୍ୟାଗରେ ଅସୁରକ୍ଷିତ ଭାବେ ଅଣ୍ଡା ନିଆଯିବା କ୍ଷୋଭର ବିଷୟ ବୋଲି ମିଶ୍ର ପ୍ରକାଶ କରିଛନ୍ତି। ଅପରପକ୍ଷରେ ଚଳିତ ବର୍ଷ ପୁରୀ ବେଳାଭୂମିରେ ଶହ ଶହ ସଂଖ୍ୟାରେ ଅଲିଭ ରିଡ୍ଲେ କଇଁଛ ମୃତ୍ୟୁବରଣ କରିଥିବା ଦେଖିବାକୁ ମିଳିଥିଲା। ମୁଖ୍ୟତଃ ପ୍ରଶାସନ ପକ୍ଷରୁ କରାଯାଇଥିବା ନିଷିଦ୍ଧାଞ୍ଚଳରେ ଅବୈଧ ଭାବେ ଟ୍ରଲର ଚଳାଚଳ ଓ ମାଛ ଧରିବା ଫଳରେ ଅନେକ କଇଁଛ ମୃତ୍ୟୁବରଣ କରିଥିବା ଦେଖିବାକୁ ମିଳିଥିଲା। ପ୍ରଶାସନ ପକ୍ଷରୁ ପ୍ରତ୍ୟେକ ବର୍ଷ ନଭେମ୍ବରଠାରୁ ମେ ପର୍ଯ୍ୟନ୍ତ କଇଁଛଙ୍କ ସୁରକ୍ଷା ପାଇଁ ସମୁଦ୍ରର ଏକ ନିର୍ଦ୍ଦିଷ୍ଟ ଅଞ୍ଚଳକୁ ନିଷିଦ୍ଧାଞ୍ଚଳ ଘୋଷଣା କରାଯିବା ସହ ମାଛମରା ଓ ଟ୍ରଲର ଚଳାଚଳ ଉପରେ କଟକଣା ଲଗାଯାଇଥାଏ। ମାତ୍ର ଅନେକ ସମୟରେ ପ୍ରଶାସନର ନିୟମ ଉଲ୍ଲଂଘନ କରି ନିଷିଦ୍ଧାଞ୍ଚଳରେ ମାଛ ମାରିବା ଫଳରେ କଇଁଛମାନଙ୍କର ଅକାଳ ମୃତ୍ୟୁ ହୋଇଥାଏ। ତେବେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉଛି ବୋଲି ବନ ବିଭାଗ ପକ୍ଷରୁ ସଫେଇ ଦିଆଯାଏ। ଏଣିକି ପେଣ୍ଠକଟା ବେଳାଭୂମିରେ ଆହୁରି ଅଧିକ କଇଁଛ ଆସି ଅଣ୍ଡାଦେବା ନେଇ ପରିବେଶବିତ୍ମାନେ ଆଶାବ୍ୟକ୍ତ କରିଛନ୍ତି। ତେଣୁ ଏଥିଲାଗି ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ ପାଇଁ ସାଧାରଣରେ ଦାବି ହେଉଛି।
