ନୂଆଦିଲ୍ଲୀ,୧୬।୭: ପ୍ରତିରକ୍ଷା ମୁଖ୍ୟ (ସିଡିଏସ) ଜେନେରାଲ ଅନିଲ ଚୌହାନ ଆଧୁନିକ ଯୁଦ୍ଧରେ ଡ୍ରୋନ ଓ କାଉଣ୍ଟର-ୟୁଏଭି ସମର୍ଥନର ଗୁରୁତ୍ୱ ଉପରେ ଜୋର ଦେଇଛନ୍ତି। ନୂଆଦିଲ୍ଲୀର ମାନେକଶ ସେଣ୍ଟରରେ ଆୟୋଜିତ ଏକ କାର୍ଯ୍ୟକ୍ରମରେ ସେ କହିଛନ୍ତି, “ପୁରୁଣା ଅସ୍ତ୍ରଶସ୍ତ୍ରରେ ନୂଆ ଯୁଦ୍ଧ ଜିତାଯାଇ ପାରିବ ନାହିଁ। ସ୍ୱଦେଶୀ ଡ୍ରୋନ ଓ କାଉଣ୍ଟର-ଡ୍ରୋନ ପ୍ରଯୁକ୍ତି ଆମ ପାଇଁ ଅତ୍ୟନ୍ତ ଜରୁରୀ।”
ଜେନେରାଲ ଚୌହାନ ‘ଅପରେସନ ସିନ୍ଦୁର’ର ଉଦାହରଣ ଦେଇ କହିଛନ୍ତି ଯେ, ମେ ୧୦ରେ ପାକିସ୍ତାନ ଡ୍ରୋନ ଓ ଲୋଇଟରିଂ ମ୍ୟୁନିସନ ବ୍ୟବହାର କରିଥିଲା, କିନ୍ତୁ ଭାରତୀୟ ସୈନ୍ୟ ଏହାକୁ କାଇନେଟିକ ଓ ଅନ-କାଇନେଟିକ ପଦ୍ଧତିରେ ନିଷ୍କ୍ରିୟ କରିଥିଲେ। ଏହି ଘଟଣା ନିମ୍ନ ଆକାଶକୁ ସୁରକ୍ଷିତ କରିବା ଓ ସମନ୍ୱିତ କାଉଣ୍ଟର-ୟୁଏଏସ ସିଷ୍ଟମ ବିକାଶର ଆବଶ୍ୟକତାକୁ ପ୍ରମାଣ କରିଛି।
ସେ କହିଛନ୍ତି, “ଡ୍ରନ ଗୁଡ଼ିକ ସହଜ, ସନ୍ଧାନ କରିବା କଷ୍ଟକର ଓ ଅତ୍ୟାଧୁନିକ। ଏହା ପାରମ୍ପରିକ ସାମରିକ ଚିନ୍ତାଧାରାକୁ ବଦଳାଇ ଦେଇଛି।” ବିଦେଶୀ ପ୍ରଯୁକ୍ତିରେ ନିର୍ଭର କରିବା ଅପେକ୍ଷା ସ୍ୱଦେଶୀ ଡ୍ରୋନ ବିକାଶ ଉପରେ ଜୋର ଦେଇ ସେ କହିଛନ୍ତି, “ବିଦେଶୀ ସିସ୍ଟମର ସୀମା ରହିଛି, ଯାହାର ସ୍ପେସିଫିକେସନ ଶତ୍ରୁଙ୍କୁ ଜଣାଥାଏ।”
ଜେନେରାଲ ଚୌହାନ ଆଗାମୀ ଯୁଦ୍ଧ ପାଇଁ ଅତ୍ୟାଧୁନିକ ପ୍ରଯୁକ୍ତିର ଆବଶ୍ୟକତା ଉପରେ ଗୁରୁତ୍ୱ ଦେଇ କହିଛନ୍ତି, “ଆଜିର ଯୁଦ୍ଧ ଆସନ୍ତାକାଲିର ପ୍ରଯୁକ୍ତି ସହ ଲଢ଼ାଯିବ।” ଏହା ଭାରତର ପ୍ରତିରକ୍ଷା କ୍ଷେତ୍ରରେ ସ୍ୱାବଲମ୍ବୀ ହେବାର ରଣନୀତିକୁ ପ୍ରତିଫଳିତ କରୁଛି।
