ପ୍ରକୃତି ପ୍ରତ୍ୟେକ ଜୀବ ପାଇଁ ଭିନ୍ନ ଭିନ୍ନ ବୟସ ସୀମା ରଖିଛି। କେତେକ ପ୍ରାଣୀ କେବଳ ଗୋଟିଏ ସପ୍ତାହ ବଞ୍ଚନ୍ତି ତ ଆଉ କେତେକ ୧୦-୧୫ ବର୍ଷ ବଞ୍ଚିପାରନ୍ତି। ଠିକ୍ ସେମିତି ମଣିଷର ସର୍ବାଧିକ ବୟସ ୧୦୦ ବର୍ଷ ବୋଲି ବିବେଚନା କରାଯାଏ। ତଥାପି ଆଜିକାଲି ୭୦-୮୦ ବର୍ଷ ମଧ୍ୟ ବଞ୍ଚି ପାରୁନି ମଣିଷ। କିନ୍ତୁ ଏକ କଇଁଛ ଦୀର୍ଘ ବର୍ଷ ବଞ୍ଚିଥିବାରୁ ଚର୍ଚ୍ଚାରେ ରହିଛି। ଏହି କଇଁଛକୁ ଦୁନିଆର ସବୁଠୁ ବୟସ୍କ କଇଁଛ ବୋଲି କୁହାଯାଉଛି। ଏବେ ଏହି କଇଁଛଟି ନିଟକରେ ତା’ର ୧୯୦ତମ ଜନ୍ମଦିନ ପାଳନ କରିଛି।
ସେଣ୍ଟ୍ ହେଲେନାର ଦକ୍ଷିଣ ଆଟ୍ଲାଣ୍ଟିକ ଦ୍ୱୀପରେ ଜୋନଥନ ନାମକ ଏକ କଇଁଛର ଜନ୍ମଦିନ ପାଳନ କରାଯାଇଥିଲା। କେବଳ ଏତିକି ନୁହେଁ, ଜୋନଥନ ନାଁରେ ଗିନିଜ୍ ଓ୍ବାଲର୍ଡ ରେକର୍ଡ ରହିଛି। ଏହା ହେଉଛି ଦୁନିଆର ସର୍ବ ପୁରାତନ କଇଁଛ। ଜୋନଥନର ପ୍ରକୃତ ବୟସ ଯଦିଓ କେରର୍ଡ କରାଯାଇନାହିଁ ତଥାପି ୧୮୩୨ରେ ତା’ର ଜନ୍ମ ବୋଲି କୁହାଯାଉଛି।
ଏହାକୁ ୧୮୮୨ରେ ସେଚେଲ୍ସରୁ ସେଣ୍ଟ୍ ହେଲେନାକୁ ଅଣାଯାଇଥିଲା। ଏହି କଇଁଛଟି ସାର୍ ଓ୍ବିଲିୟମ ଗ୍ରେ ଓ୍ବିଲସନଙ୍କୁ ଉପହାର ସ୍ବରୂପ ଦିଆଯାଇଥିଲା। ସେଣ୍ଟ ହେଲେନାର ମୁଖ୍ୟ ପର୍ଯ୍ୟଟନ ମ୍ୟାଟ ଜୋଶୁଆ କହିଛନ୍ତି, ଜୋନଥନଙ୍କୁ ୨୦୦ ବର୍ଷ ହୋଇପାରେ। ଏହା ଗିନିଜ ୱାଲର୍ଡ ରେକର୍ଡ ଦ୍ୱାରା ସର୍ବ ପୁରାତନ କଇଁଛ ଭାବରେ ସ୍ବୀକୃତିପ୍ରାପ୍ତ। ଏହାପୂର୍ବରୁ ଏହି ରେକର୍ଡ ତୁଇ ମାଲିଲା ନାମକ ଏକ କଇଁଛ ନାଁରେ ଥିଲା। ଯିଏକି ପ୍ରାୟ ୧୮୮ ବର୍ଷ ବଞ୍ଚିଥିଲା। ତା’ର ୧୯୬୫ରେ ମୃତ୍ୟୁ ହୋଇଥିଲା।
ୟେଲ୍ ୟୁନିଭରସିଟି ଏବଂ ସ୍ପେନର ଓଭିଏଡୋ ୟୁନିଭରସିଟି ଦ୍ୱାରା କରାଯାଇଥିବା ଅନୁସନ୍ଧାନରୁ ଜଣାପଡ଼ିଛି, ବିଶାଳ କଇଁଛଙ୍କର ଡିଏନ୍ଏରେ ଅନେକ ପ୍ରକାର ଜିନ୍ ରହିଛି। ଯାହା କ୍ୟାନସର ସହ ଲଢ଼ିଥାଏ। ସେମାନଙ୍କର ମେଟାବୋଲିକ ହାର ଅନ୍ୟ ଜୀବମାନଙ୍କ ତୁଳନାରେ କମ୍ ଅଟେ। ଯେଉଁଥିପାଇଁ ସେମାନଙ୍କର ଆୟୁଷ ବଢ଼ିଥାଏ।
