ସାଧାରଣତଃ ଅପରାଧ କରିଥିବା ବ୍ୟକ୍ତିଙ୍କୁ ଅନେକ ବର୍ଷ ଜେଲରେ ରହିବାକୁ ପଡେ। ବେଳେବେଳେ କିଛି ଲୋକ ନିଜ ଅପରାଧ ପାଇଁ ଶେଷ ଜୀବନ ପର୍ଯ୍ୟନ୍ତ ଜେଲରେ ବିତାଇଥାନ୍ତି ଏବଂ ଶେଷ ମୁହୂର୍ତ୍ତରେ ମୁକ୍ତ ହୋଇଥାନ୍ତି। ଏଭଳି ପରିସ୍ଥିତିରେ ପରିବାର ଲୋକମାନେ ସେମାନଙ୍କୁ ନେବାକୁ ମଧ୍ୟ କେହି ଆସନ୍ତି ନାହିଁ, କେବଳ ପୋଲିସ କର୍ମଚାରୀମାନେ ଶେଷ ସମୟରେ ସେମାନଙ୍କର ସାହା ହୁଅନ୍ତି। ଉତ୍ତରପ୍ରଦେଶର ଅଯୋଧ୍ୟାରେ ଏଭଳି ଘଟଣା ଦେଖିବାକୁ ମିଳିଛି। ନିକଟରେ ଉତ୍ତରପ୍ରଦେଶର ଅଯୋଧ୍ୟା ଜେଲରୁ ୯୮ ବର୍ଷୀୟ ଦୋଷୀ ରାମ ସୁରତଙ୍କୁ ମୁକ୍ତ କରାଯାଇଛି।
ରାମ ସୁରତ ମୁକ୍ତ ହେବାର ଏକ ଭିଡିଓ ଇଣ୍ଟରନେଟରେ ଭାଇରାଲ ହେଉଛି। ଉତ୍ତରପ୍ରଦେଶର ମହାନିର୍ଦ୍ଦେଶକ (ଜେଲ)ଙ୍କ ଦ୍ୱାରା ଟୁଇଟରରେ ପୋଷ୍ଟ କରାଯାଇଥିବା ଏକ ଭିଡିଓରେ ଅଯୋଧ୍ୟା ଜେଲର ଜିଲା ଅଧୀକ୍ଷକ ଶଶିକାନ୍ତ ମିଶ୍ର ରାମ ସୁରତଙ୍କୁ କହିଛନ୍ତି, ପୋଲିସ ତାଙ୍କୁ ତାଙ୍କ ସ୍ଥାନରେ ଛାଡି ଦେବ। ଏହାସହ ତାଙ୍କୁ କିଛି ଟଙ୍କା ଉପହାର ମଧ୍ୟ ଦିଆଯାଇଛି। ରାମ ସୁରତ ଜେଲ୍ରୁ ମୁକ୍ତ ହେବା ପରେ ତାଙ୍କୁ କେହି ନେବାକୁ ଆସି ନ ଥିଲେ। ତେଣୁ ପୋଲିସ ସହାୟତାର ହାତ ବଢାଇଥିଲା।
ଜେଲ ଅଧିକାରୀଙ୍କ ଅନୁଯାୟୀ, ରାମ ସୁରତ ଆଇପିସିର ଧାରା ୪୫୨, ୩୨୩ ଏବଂ ୩୫୨ ଅନୁଯାୟୀ ଦୋଷୀ ସାବ୍ୟସ୍ତ ହୋଇଥିଲେ। ତାଙ୍କୁ ଅଗଷ୍ଟ ୮, ୨୦୨୨ରେ ମୁକ୍ତ କରାଯାଇଥିଲା, କିନ୍ତୁ ୨୦ ମେ, ୨୦୨୨ରେ ସେ କରୋନାରେ ଆକ୍ରାନ୍ତ ହୋଇଥିଲେ ଏବଂ ତାଙ୍କୁ ୯୦ ଦିନ ପାଇଁ ପାରୋଲରେ ପଠାଯାଇଥିଲା।
