ଖୋର୍ଦ୍ଧା ଅଫିସ,୧୫।୩: ରାଜ୍ୟ ସରକାର ୧୯୯୮ ମସିହାରେ ପ୍ରାୟ ୫୦ ଲକ୍ଷ ବ୍ୟୟ ଅଟକଳରେ ବରୁଣେଇ ପାହାଡ଼ ପାଦଦେଶରେ ୧.୮୩୨ ଏକର ଜାଗା ଉପରେ ଏକ ଡିଆରଡିଏ କୋଠା ନିର୍ମାଣ କରିଥିଲେ। ପରବର୍ତ୍ତୀ ସମୟରେ ନୂତନ ଜିଲାପାଳଙ୍କ କାର୍ଯ୍ୟାଳୟ ପରିସରକୁ ଏହା ସ୍ଥାନାନ୍ତରିତ ହୋଇଥିଲା। ପୁରୁଣା କୋଠାରେ ଡିଆରଡିଏର ତାଲିମ କେନ୍ଦ୍ର ଲାଗି ଯୋଜନା ରହିଥିଲା। ସେଠାରେ ଇଡ୍କୋ ପକ୍ଷରୁ ଏକ ଘରୋଇ କଲେଜ ନିର୍ମାଣ ଲାଗି ୧୫ ଏକର ଜାଗା ଯୋଗାଇ ଦିଆଯାଇଥିଲା। ପରିତ୍ୟକ୍ତ ଅବସ୍ଥାରେ ଥିବା ପୁରୁଣା ଡିଆରଡିଏ କୋଠା ସହ ସଂପୃକ୍ତ ଜମି ନିଜ ଅକ୍ତିଆରକୁ ନେଇ ସେଠାରେ ନିଜ କୋଠା ନିର୍ମାଣ କରିଛି। ଅନ୍ୟପକ୍ଷରେ ସେଠାରେ ରାଷ୍ଟ୍ରପତିଙ୍କ ଦ୍ବାରା ଶିଳାନ୍ୟାସ ହୋଇଥିବା ପ୍ରସ୍ତାବିତ ପାଇକ ସ୍ମାରକୀ ନିର୍ମାଣ ଲାଗି ଆବଶ୍ୟକ ୧୦ ଏକର ଜମି ଅଭାବରୁ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇ ପାରୁନାହିଁ। ବେଆଇନ ଭାବେ ସଂପୃକ୍ତ କଲେଜ ଅଧୀନରେ ପୁରୁଣା ଡିଆରଡିଏ କୋଠା ଓ ୧.୮୩୨ ଜମି ଜବରଦଖଲ ମୁକ୍ତ କରି ସ୍ମାରକୀ ନିର୍ମାଣ କାର୍ଯ୍ୟରେ ବିନିଯୋଗ ଦାବିରେ ସୋମବାର ସାମାଜିକ ଅନୁଷ୍ଠାନ ‘ନ୍ୟୁ ଥିଙ୍କିଙ୍ଗ ଫୋରମ’ ଏବଂ ଖୋର୍ଦ୍ଧା ସଚେତନ ନାଗରିକ ମଞ୍ଚ, ବୁଦ୍ଧିଜୀବୀ, ସାମାଜିକ କର୍ମୀ, ପାଇକ ସଙ୍ଗଠନର କର୍ମକର୍ତ୍ତା ଏହି ଧାରଣାରେ ସାମିଲ ହୋଇଛନ୍ତି। ଏଥିସହିତ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
