କୁଜଙ୍ଗ,୧୩ା୧ (ଡି.ଏନ.ଏ.): ବିରୋଧ ଯୋଗୁ ଦୀର୍ଘ ୮ମାସ ହେଲା ଅଧାରେ ଅଟକି ଥିବା ପାରାଦୀପ-ହାଇଦ୍ରାବାଦ ପାଇପ ଲାଇନ କାର୍ଯ୍ୟ ବୁଧବାର ପୁଣି ଆରମ୍ଭ ହୋଇଛି। ଭାରତୀୟ ତୈଳ ନିଗମର ୧୨ଶହ ୧୨କିମି ପାରାଦୀପ-ହାଇଦ୍ରାବାଦ ପାଇପ ଲାଇନ କାର୍ଯ୍ୟ ଚାଲୁଥିବା ବେଳେ ଏରସମା ବ୍ଲକ ଅନ୍ତର୍ଗତ ଢିଙ୍କିଆ ଗଁାର ଜନସାଧାରଣ ବିରୋଧ କରିଥିଲେ। ସେମାନେ ଅଭିଯୋଗ କରିଥିଲେ, ପାଇପ ଲାଇନ ଗ୍ରାମ ଗୋଚର ଜମି ଉପରେ ଯାଉଛି, ଯାହାଦ୍ୱାରା ଗୃହପାଳିତ ପଶୁଙ୍କ ପାଇଁ ଉଦ୍ଦିଷ୍ଟ ଚାରଣ ଭୂମି ନଷ୍ଟ ହେଲେ ଗୋରୁ ଚରିବାକୁ ଅସୁବିଧା ହେବେ। ଏହାସହ ଗୋଚର ଜମି ପାଇଁ ଥିବା ଆଇନଗତ ଦିଗ ପ୍ରତି ଦୃଷ୍ଟି ଦିଆ ନ ଯାଇ ଓ ଗ୍ରାମସଭାର ମତାମତ ନିଆ ନ ଯାଇ କର୍ତ୍ତୃପକ୍ଷଙ୍କ ମନମୁଖି କାର୍ଯ୍ୟ ଯୋଗୁ ଦୀର୍ଘଦିନ ଧରି ଢିଙ୍କିଆ ଗଁାର ଲୋକଙ୍କ ପକ୍ଷରୁ ବିରୋଧ ଜାରି ରହିଥିଲା। ବର୍ତ୍ତମାନ ଢିଙ୍କିଆରେ ଜେଏସ୍ଡବ୍ଲ୍ୟୁ ବିରୋଧୀ ଆନ୍ଦୋଳନ ଚାଲିଛି। ଗୋଟେ ପଟେ ଗ୍ରାମବାସୀ ଗ୍ରାମର ପ୍ରବେଶ ପଥରେ ଫାଟକ ନିର୍ମାଣ କରି ପ୍ରଶାସନ ଓ ପୋଲିସକୁ ପ୍ରବେଶ ନିଷେଧ କରାଇଛନ୍ତି। ଅନ୍ୟପକ୍ଷେ ପୋଲିସ ଗ୍ରାମକୁ ଘେରାବନ୍ଦୀ କରି ରଖିଛି। ଗ୍ରାମବାସୀ ବାହାରକୁ ବାହାରି ପାରୁନାହାନ୍ତି। ଏହାର ସୁଯୋଗରେ କମ୍ପାନୀ କର୍ତ୍ତୃପକ୍ଷ ପାଇପ ଲାଇନ କାର୍ଯ୍ୟ କରୁଥିବା ଜଣାପଡିଛି।
