ଭୁବନେଶ୍ୱର, ୨୧।୧୧: ପୁରୀ ରଥଯାତ୍ରା ୨୦୨୫ ସମୟରେ ଗୁଣ୍ଡିଚା ମନ୍ଦିର ନିକଟରେ ଘଟିଥିବା ଦଳାଚକଟା ଏବଂ ଏଥିଜନିତ ୩ ଜଣଙ୍କ ମୃତ୍ୟୁ ପ୍ରସଙ୍ଗରେ ଓଡ଼ିଶା ସରକାର କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଉନ୍ନୟନ ଆୟୁକ୍ତ ଅନୁ ଗର୍ଗଙ୍କ ତଦନ୍ତ ରିପୋର୍ଟ ଆଧାରରେ ମୋଟ ୫ ଜଣ କାର୍ଯ୍ୟନିର୍ବାହୀ ମାଜିଷ୍ଟ୍ରେଟ ଏବଂ ଅଧିକାରୀଙ୍କୁ କର୍ତ୍ତବ୍ୟରେ ଅବହେଳା ପାଇଁ ଦାୟୀ କରାଯାଇଛି।
ଘଟଣା ସମୟରେ କଣ୍ଟ୍ରୋଲ୍ ରୁମ୍ କିମ୍ବା ରଥ ନିକଟରେ ଡ୍ୟୁଟିରେ ଥିବା ନିମ୍ନଲିଖିତ ଅଧିକାରୀଙ୍କ ନାମ ଅବହେଳା ପାଇଁ ଚିହ୍ନଟ କରାଯାଇଛି।
ଅଶୋକ କୁମାର ବେହେରା(ସହକାରୀ ବନ ସଂରକ୍ଷକ (ACF), ପୁରୀ), ବିଭୂତି ଭୂଷଣ ନାୟକ (ଉପଜିଲାପାଳଙ୍କ କାର୍ଯ୍ୟାଳୟର ଉପ-ସଚିବ), ରାଜ କିଶୋର ଜେନା (ଅତିରିକ୍ତ ତହସିଲଦାର, ଶୁକୁରୁଳି, ମୟୂରଭଞ୍ଜ), ସୌଭାଗ୍ୟ କୁମାର ମହାନ୍ତି (ଅତିରିକ୍ତ ତହସିଲଦାର, ଗୋନ୍ଦିଆ, ଢେଙ୍କାନାଳ), ଦୟାନିଧି ପାତ୍ର (ସହକାରୀ କଲେକ୍ଟର, ଢେଙ୍କାନାଳ)।
ଗୁରୁତର ଅବହେଳା ପାଇଁ ପୁରୀ ଏସିଏଫ୍ ଅଶୋକ କୁମାର ବେହେରାଙ୍କୁ ମୁଖ୍ୟତଃ ଦାୟୀ କରାଯାଇଛି। ନଭେମ୍ବର ୧୮ ତାରିଖରେ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଏସିଏଫ୍ ବେହେରାଙ୍କୁ ଏକ ମେମୋରାଣ୍ଡମ ଜାରି କରାଯାଇଛି। ତାଙ୍କୁ ୩୦ ଦିନ ମଧ୍ୟରେ ଲିଖିତ ଭାବେ ତାଙ୍କର ପକ୍ଷ ରଖିବାକୁ କୁହାଯାଇଛି।
ଅତିରିକ୍ତ ମୁଖ୍ୟ ଶାସନ ସଚିବ (ACS) ସତ୍ୟବ୍ରତ ସାହୁ ପତ୍ରରେ ଦର୍ଶାଇଛନ୍ତି ଯେ ଓଡ଼ିଶା ସିଭିଲ୍ ସର୍ଭିସ (CCA) ନିୟମ-୧୯୬୨ର ଧାରା ୧୬ ଅନୁଯାୟୀ କାହିଁକି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବ, ସେନେଇ ସେ ଉତ୍ତର ରଖନ୍ତୁ।
ତଦନ୍ତରୁ ଜଣାପଡ଼ିଛି ଯେ ଜୁନ୍ ୨୯ ତାରିଖ ରାତି ପ୍ରାୟ ୩ଟା ସମୟରେ ଦଳାଚକଟା ଘଟି ୩ ଜଣଙ୍କ ମୃତ୍ୟୁ ଓ ୧୨ ଜଣ ଆହତ ହୋଇଥିଲେ। କଣ୍ଟ୍ରୋଲ୍ ରୁମ୍ରେ ନିୟୋଜିତ ଥିବା ଅଧିକାରୀମାନେ ଘଟଣା ସମୟରେ ପରିସ୍ଥିତି ସମ୍ପର୍କରେ କୌଣସି ଧାରଣା ରଖି ନ ଥିଲେ ଏବଂ ଉପଯୁକ୍ତ ସମୟରେ ଉଚ୍ଚ ଅଧିକାରୀଙ୍କୁ ଜଣାଇବାରେ ବିଫଳ ହୋଇଥିଲେ।
ଏସିଏଫ୍ ବେହେରା ଏବଂ ଅନ୍ୟ ଅଧିକାରୀମାନେ ଭିଡ଼ ନିୟନ୍ତ୍ରଣ ପାଇଁ ପୋଲିସ୍ ଓ ଶ୍ରୀମନ୍ଦିର ପ୍ରଶାସନ ସହିତ ଉଚିତ୍ ସମନ୍ୱୟ ରକ୍ଷା କରି ନ ଥିଲେ। ସେମାନେ ରଥ ନିକଟରେ ଥିବା ସେବାୟତ କିମ୍ବା କ୍ରାଉଡ୍ ମାର୍ଶାଲ୍ଙ୍କ ସହିତ ଆଲୋଚନା କରି ଜଟିଳ ପରିସ୍ଥିତିକୁ ନିୟନ୍ତ୍ରଣ କରିବାରେ ବିଫଳ ହୋଇଥିଲେ।
ଅଧିକାରୀମାନେ ବାହାର ଜିଲା କିମ୍ବା ଜଙ୍ଗଲ ଓ ସ୍ୱଳ୍ପ ସଞ୍ଚୟ ଭଳି ଅଣ-ସମ୍ପୃକ୍ତ ବିଭାଗର ହୋଇଥିବାରୁ ସ୍ଥାନୀୟ ଭିଡ଼ ଆଚରଣ ଓ ନୀତି ସମ୍ପର୍କରେ ଅଜ୍ଞ ଥିଲେ ମଧ୍ୟ ସେମାନେ ଉଚ୍ଚ ଅଧିକାରୀଙ୍କୁ ପରାମର୍ଶ କରି ନ ଥିବାରୁ ଏଭଳି ଦୁଃଖଦ ଘଟଣା ଘଟିଥିଲା ବୋଲି ରିପୋର୍ଟରେ ଦର୍ଶାଯାଇଛି।
