ଯୋଡ଼ା,୧୧ା୩(ମାନସ ମହାନ୍ତି)- କେନ୍ଦୁଝର ଜିଲାର ଯୋଡ଼ାଠାରେ ଓଡ଼ିଶାର ଦୀର୍ଘତମ ଫ୍ଲାଏଓଭର ସୋମବାର ଲୋକାର୍ପିତ ହୋଇଯାଇଛି। ୩ କି.ମି. ଲମ୍ବ ବିଶିଷ୍ଟ ଏହି ଫ୍ଲାଏଓଭରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ମାଧ୍ୟମରେ ଲୋକାର୍ପଣ କରିଛନ୍ତି। କାର୍ଯ୍ୟକ୍ରମରେ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଉପସ୍ଥିତ ଥିଲେ।
ଏହି ଅବସରରେ ଯୋଡ଼ା ବନେଇକଳାସ୍ଥିତ ଦୁର୍ଗାପୂଜା ପଡ଼ିଆରେ ଆୟୋଜିତ ଉଦ୍ଘାଟନୀ ଉତ୍ସବରେ କେନ୍ଦୁଝର ଜିଲାପାଳ ବିଶାଲ ସିଂଙ୍କ ସମେତ ଜିଲା ପ୍ରକଳ୍ପ ନିର୍ଦ୍ଦେଶକ ବିଷ୍ଣୁପ୍ରସାଦ ଆଚାର୍ଯ୍ୟ, ଚମ୍ପୁଆ ବିଧାୟିକା ମୀନାକ୍ଷୀ ମହାନ୍ତ, ଯୋଡ଼ା ବ୍ଲକ ଅଧ୍ୟକ୍ଷ କବୀନ୍ଦ୍ର ନାଏକ, ଯୋଡ଼ା ପୌର ଅଧ୍ୟକ୍ଷ ଡା. ଜଗଦୀଶ ପ୍ରସାଦ ସାହୁ, ଉପାଧ୍ୟକ୍ଷା ସା ପାତ୍ର, ବଡ଼ବିଲ ପୌରାଧ୍ୟକ୍ଷ ଲକ୍ଷ୍ମଣ ମହାନ୍ତ, ଯୋଡ଼ା ସହରର ବିଭିନ୍ନ ୱାର୍ଡ କାଉନସିଲର, ବିଜେଡିର ଯୁବ ସଙ୍ଗଠକ, ଯୋଡ଼ା ଟ୍ରକ୍ ମାଲିକ ସଂଘ ସମ୍ପାଦକ ସୁଶାନ୍ତ କୁମାର ବାରିକ୍, ଯୋଡ଼ା ବ୍ଲକ ଅଧୀନ ବିଭିନ୍ନ ପଞ୍ଚାୟତ ସରପଞ୍ଚ, ଓଡ଼ିଶା ବ୍ରିଜ୍ କନ୍ଷ୍ଟ୍ରକ୍ସନ କର୍ପୋରେଶନର ଚିଫ୍ ଜେନେରାଲ ମ୍ୟାନେଜର ଅଜିତ ବାବୁ, ଓବିସିସିର ଜେନେରାଲ ମ୍ୟାନେଜର ନରସିଂହ ମହାନ୍ତ, ଚେଭରୋକ୍ସ ଠିକା ସଂସ୍ଥାର ମୁଖ୍ୟ ବିପୁଲ ବାରାଟ, ଚେଭରୋକ୍ସର ଅଧ୍ୟକ୍ଷ କିଶୋର ବିରଙ୍ଗାମାଙ୍କ ସମେତ ଯୋଡ଼ାର ବହୁ ମାନ୍ୟଗଣ୍ୟ ମହିଳା ଓ ବ୍ୟକ୍ତିବିଶେଷ ଉପସ୍ଥିତ ଥିଲେ।
ବହୁ ପ୍ରତୀକ୍ଷିତ ଫ୍ଲାଏଓଭର ପ୍ରକଳ୍ପର ଲୋକାର୍ପଣ ଉତ୍ସବରେ ପ୍ରାୟ ୬ ହଜାରରୁ ଅଧିକ ଜନସାଧାରଣ ଉପସ୍ଥିତ ଥିଲେ। ପ୍ରଦୂଷଣ ଓ ଅନିୟନ୍ତ୍ରିତ ଟ୍ରାଫିକ ସମସ୍ୟାରୁ ମୁକ୍ତି ପାଇଁ ଯୋଡ଼ାବାସୀଙ୍କ ବହୁଦିନର ଦାବିକୁ ରାଜ୍ୟ ସରକାର ଡିଏମ୍ଏଫ୍ ଅର୍ଥ ବିନିଯୋଗକରି ଫ୍ଲାଏଓଭର ନିର୍ମାଣ କରିଥିବାରୁ ବିଧାୟିକା ମୀନାକ୍ଷୀ ମହାନ୍ତ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଅର୍ପଣ କରିଥିଲେ।
ବିଧାୟିକା ଫଳକ ଉନ୍ମୋଚନକରି ଫ୍ଲାଏଓଭରରେ ଯାତାୟାତର ଶୁଭାରମ୍ଭ କରିଥିଲେ। ଉତ୍ସାହ ଓ ଉଦ୍ଦୀପନାର ସହ ଯୁବଗୋଷ୍ଠୀ ଓ ସାଧାରଣ ଲୋକେ ଫ୍ଲାଏଓଭର ଉପରେ ହାଲୁକା ଯାନବାହନ ଓ ଦୁଇଚକିଆ ଧରି ବୁଲିଥିଲେ। ଏପରିକି ଦୀର୍ଘତମ ଏକ ଫ୍ଲାଏଓଭରକୁ ମହିଳାମାନେ ଚାଲି ଚାଲି ବୁଲିଥିଲେ। ତେବେ ଓବିସିସିର କନିଷ୍ଠ ଯନ୍ତ୍ରୀ କହିଛନ୍ତି, କମ୍ପ୍ରେସିଭ ଷ୍ଟ୍ରେନ୍ଥ ଆସିବା ପରେ ଭାରିଯାନ ଚଳାଚଳ ପାଇଁ ଆଉ କିଛି ଦିନ ପରେ ଅନୁମତି ଦିଆଯିବ। ଅନ୍ୟପକ୍ଷରେ ଫ୍ଲାଏଓଭର ତଳେ ସହରରେ ନିର୍ମାଣ ଚାଲିଥିବା ସର୍ଭିସ୍ ରୋଡ୍ ଆଗାମୀ ୨ ମାସ ମଧ୍ୟରେ ସରିବ ବୋଲି ଚେଭରୋକ୍ସର ମାନବ ସମ୍ବଳ ଅଧିକାରୀ ଭାଗୀରଥି ପଣ୍ଡା କହିଥିଲେ।
