ଭୁବନେଶ୍ୱର,୨।୯(ବ୍ୟୁରୋ): ଦେଶରେ ମହିଳା ବିରୋଧୀ, ନିର୍ଯାତନା, ବଳାତ୍କାର ଆଦି ଅପରାଧ ମାମଲା ବଢ଼ୁଥିବା ବେଳେ ସାଇବର ଅଶ୍ଳୀଳତା ଓ ମର୍ଫିଂ ମାମଲା ମଧ୍ୟ ଚିନ୍ତାଜନକ ସ୍ଥିତିରେ ରହିଛି। ୨୦୨୧ରେ ଦେଶବ୍ୟାପୀ ସାଇବର ଅଶ୍ଳୀଳତା ଓ ମର୍ଫିଂ ମାମଲା ମୋଟ ୨,୫୯୭ ରୁଜୁ ହୋଇଥିବା ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି) ରିପୋର୍ଟରୁ ଜଣାପଡ଼ିଛି। ସେଥିରୁ ଓଡ଼ିଶାରେ ସର୍ବାଧିକ ୨୬% ମାମଲା ରହିଛି। ମହିଳାଙ୍କ ଅଶ୍ଳୀଳ ଫଟୋ ଓ ଭିଡ଼ିଓକୁ ଭାଇରାଲ କରିବା ଏବଂ ମହିଳାଙ୍କ ଫଟୋ ଓ ଭିଡିଓକୁ ମର୍ଫିଂ କରି ଅଶ୍ଳୀଳତାରେ ପରିଣତ କରିବା ପରେ ସେମାନଙ୍କୁ ସାଇବର ଠକ ବ୍ଲାକ୍ମେଲ କରୁଛନ୍ତି। ଦେଶର ଅନ୍ୟ ରାଜ୍ୟ ତୁଳନାରେ ୨୦୨୧ ବର୍ଷରେ ଓଡ଼ିଶାରେ ଏହି ମାମଲା ସର୍ବାଧିକ ବୋଲି ଏନ୍ସିଆର୍ବି ରିପୋର୍ଟରୁ ସ୍ପଷ୍ଟ ହୋଇଛି। ତଥ୍ୟ ଅନୁଯାୟୀ, ୨୦୨୧ରେ ଓଡ଼ିଶାରେ ୫୬୫ ସାଇବର ଅଶ୍ଳୀଳତା ଓ ମର୍ଫିଂ ମାମଲା ରୁଜୁ ହୋଇଛି। ଏହି ମାମଲା ମଧ୍ୟରୁ ୩୦୧ଟି ସାଇବର ଅଶ୍ଳୀଳତା ହୋଇଥିବାବେଳେ ୨୬୪ ଫେକ୍ ପ୍ରୋଫାଇଲ ବା ମର୍ଫିଂ ମାମଲା ରହିଛି। ୨୦୨୦ରେ ଏ ସମ୍ବନ୍ଧୀୟ ମାମଲା ଓଡ଼ିଶାରେ ୫୨୬ ରହିଥିଲା। ସେଥିରୁ ୨୯୨ସାଇବର ଅଶ୍ଳୀଳତା ଥିବାବେଳେ ୨୩୪ଟି ମର୍ଫିଂ ମାମଲା ରହିଥିଲା।
ସୂଚନା ଅନୁଯାୟୀ, ସାଇବର ଠକମାନେ ଲୋନ ଆପ୍ ପ୍ରସ୍ତୁତ କରି ଲୋନ ଦେବା ଆଳରେ ଜାଲ ବିଛାଉଛନ୍ତି। ବିଶେଷକରି ମହିଳାମାନଙ୍କୁ ସେମାନେ ଟାର୍ଗେଟ କରି ଉକ୍ତ ଆପ୍ ଜରିଆରେ ବିଭିନ୍ନ ପ୍ରଲୋଭନ ଦେଖାଉଛନ୍ତି। ପରେ ମହିଳାମାନେ ଲୋନ ନେବାବେଳେ ସାଇବର ଠକ ସେମାନଙ୍କ ବ୍ୟକ୍ତିଗତ ଗୋପନୀୟ ତଥ୍ୟ ଆଦି ରଖି ଦେଉଛନ୍ତି। ଏହାପରେ ଅଧିକ ଟଙ୍କା ଦାବି କରି ସେମାନଙ୍କ ସମ୍ପର୍କୀୟଙ୍କ ମୋବାଇଲକୁ ତାଙ୍କର ଫଟୋକୁ ଅଶ୍ଳୀଳ ଫଟୋ ସହ ଯୋଡ଼ି ବ୍ଲାକ୍ମେଲ କରୁଛନ୍ତି। ସେହିପରି ମହିଳାମାନଙ୍କ ଅନ୍ତରଙ୍ଗ ମୂହୁର୍ତ୍ତର ଫଟୋ ଓ ଭିଡିଓକୁ ପରବର୍ତ୍ତୀ ସମୟରେ ଭାଇରାଲ କରୁଛନ୍ତି। ଏଭଳି ମାମଲା ଦିନକୁ ଦିନ ବଢ଼ିବାରେ ଲାଗିଛି। ଏନେଇ ସଚେତନତା ସୃଷ୍ଟି କରାଯାଇପାରିଲେ ଏହାକୁ କମାଯାଇପାରିବ ବୋଲି ସାଇବର ବିଶେଷଜ୍ଞମାନେ ମତପ୍ରକାଶ କରିଛନ୍ତି। ଗତ ମାସରେ କଟକର ଜଣେ ଆଇନ ଛାତ୍ରୀ ଲୋନ ଆପ୍ରେ ବ୍ୟକ୍ତିଗତ ତଥ୍ୟ ଦେଇ ଲୋନ୍ ନେଇଥିଲେ। ଏହାପରେ ସେ ମର୍ଫି ଏବଂ ବ୍ଲାକମେଲର ଶିକାର ହୋଇଥିବା ଅଭିଯୋଗ ହୋଇଥିଲା।
