ଅନୁଗୋଳ,୮ା୧: ଜମି ଚିହ୍ନଟ ପାଇଁ ଲାଞ୍ଚ ନେଉଥିବା ବେଳେ ଧାରା ପଡିଲେ ରାଜସ୍ବ ନିରୀକ୍ଷକ(RI)। ଗୁରୁବାର ଅନୁଗୋଳ ଜିଲା ଆଠମଲ୍ଲିକ ତହସିଲ ଅନ୍ତର୍ଗତ ତୁସର RI ସର୍କଲର ରାଜସ୍ୱ ନିରୀକ୍ଷକ ସୁରେନ୍ଦ୍ର କୁମାର ଦାଶଙ୍କୁ ରେଡ୍ ହ୍ୟାଣ୍ଡ ଧରିଛି ଭିଜିଲାନ୍ସ।
ଜଣେ ଜମି ମାଲିକ ନିଜ ପ୍ଲଟ୍ର ସୀମା ନିର୍ଦ୍ଧାରଣ ପାଇଁ ଗତ ନଭେମ୍ବର ୨୪ ତାରିଖରେ ଆବେଦନ କରିଥିଲେ। ଏହି କାର୍ଯ୍ୟ କରିବା ପାଇଁ RI ସୁରେନ୍ଦ୍ର ଦାଶ ୧୦,୦୦୦ ଟଙ୍କା ଲାଞ୍ଚ ଦାବି କରିଥିଲେ।
ପୂର୍ବରୁ ଜାନୁଆରୀ ୫ ତାରିଖରେ ସେ ପ୍ରଥମ କିସ୍ତି ଭାବେ ୨,୦୦୦ ଟଙ୍କା ଗ୍ରହଣ କରିଥିଲେ। ବାକି ୮,୦୦୦ ଟଙ୍କା ପାଇଁ ବାଧ୍ୟ କରିବା ପରେ, ଆଲୋଚନା ମାଧ୍ୟମରେ ଏହାକୁ ୬,୦୦୦ ଟଙ୍କାକୁ କମାଇଥିଲେ।
ଅଭିଯୋଗକାରୀ ଏ ସମ୍ପର୍କରେ ଭିଜିଲାନ୍ସକୁ ସୂଚନା ଦେଇଥିଲେ। ଗୁରୁବାର କିଆକଟା ସ୍ଥିତ RI ଅଫିସ୍ ପରିସରରେ ଦ୍ୱିତୀୟ ତଥା ଶେଷ କିସ୍ତିର ୬,୦୦୦ ଟଙ୍କା ନେଉଥିବା ବେଳେ ଭିଜିଲାନ୍ସ ଟିମ୍ ତାଙ୍କୁ ମାଡ଼ି ବସିଥିଲେ। ଭିଜିଲାନ୍ସ ଟିମ୍କୁ ଦେଖି RI ଦାଶ ଟଙ୍କାତକ ଝରକା ବାହାରକୁ ଫିଙ୍ଗି ଦେଇଥିଲେ, କିନ୍ତୁ ଅଧିକାରୀମାନେ ସମସ୍ତ ଟଙ୍କା ଜବତ କରିବାରେ ସଫଳ ହୋଇଛନ୍ତି।
ଏହି ମାମଲାରେ କଟକ ଭିଜିଲାନ୍ସ ଥାନାରେ ମାମଲା ରୁଜୁ କରାଯାଇଛି। ବର୍ତ୍ତମାନ ଆୟ ବହିର୍ଭୂତ ସମ୍ପତ୍ତି ଠାବ କରିବା ପାଇଁ RI ଦାଶଙ୍କ ୩ଟି ସ୍ଥାନରେ ଏକକାଳୀନ ଚଢ଼ାଉ ଜାରି ରହିଛି।
