ଭୁବନେଶ୍ୱର, ୨୬।୩(କ୍ରୀଡ଼ା ପ୍ରତିନିଧି)-ଝାଡ଼ଖଣ୍ଡର ରାଞ୍ଚତ୍ଠାରେ ୨୧ରୁ ୨୫ ମାର୍ଚ୍ଚ ପର୍ଯ୍ୟନ୍ତ ଅନୁଷ୍ଠିତ ୨୦ତମ ଜାତୀୟ ସବ୍ଜୁନିୟର ଉସୁ ପ୍ରତିଯୋଗିତାରେ ଓଡ଼ିଶା ପ୍ରତିଯୋଗୀମାନେ ପ୍ରଭାବୀ ପ୍ରଦର୍ଶନ କରି ରାଜ୍ୟକୁ ଗର୍ବିତ କରିଛନ୍ତି। ଏଥିରୁ ଓଡ଼ିଶାକୁ ୧ ସ୍ବର୍ଣ୍ଣ, ୩ ରୌପ୍ୟ ଓ ୧ ବ୍ରୋଞ୍ଜ ପଦକ ମିଳିଛି। ଶ୍ୱେତାରାଣୀ ମହନ୍ତ ୩୨ କେଜି ବାଳିକା ସାନଶୋଉ ବିଭାଗରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ସୁମିତା ମୁଣ୍ଡା ୩୬ କେଜି ବାଳିକା ସାନଶୋଉ, ଗାର୍ଦି ମୁଣ୍ଡା ୨୦ କେଜି ବାଳକ ସାନଶୋଉ ଏବଂ ଅଖିଳ ମୁଣ୍ଡା ୨୪ କେଜି ବାଳକ ସାନଶୋଉ ବିଭାଗରେ ରୌପ୍ୟ ପଦକ ପାଇଛନ୍ତି। ସେହିପରି ମାଳିନୀ ମୁଣ୍ଡା ୨୮ କେଜି ବାଳିକା ସାନଶୋଉରେ ବ୍ରୋଞ୍ଜ ପଦକ ହାସଲ କରିଛନ୍ତି। ଦଳଗତ ସାଣ୍ଡା ବିଭାଗରେ ରାଜସ୍ଥାନ, ହରିୟାଣା, ଉତ୍ତର ପ୍ରଦେଶ, ତାଓଲୁରେ ମଣିପୁର, ମଧ୍ୟପ୍ରଦେଶ, ଆସାମ ପ୍ରଥମ ତିନି ସ୍ଥାନ ଅଧିକାର କରିଛନ୍ତି। ମଣିପୁର ଓଭରଅଲ୍ ଚାମ୍ପିୟନ ହୋଇଛି। ଉସୁ ଆସୋସିଏଶନ ଅଫ୍ ଓଡ଼ିଶା ସଭାପତି ଏସ.ଏସ. ହରିଚନ୍ଦନ, ସାଧାରଣ ସମ୍ପାଦକ ପ୍ରଦ୍ୟୁମ୍ନ ବେହେରା, ଅଲ୍ ଓଡ଼ିଶା କିକ୍ବକ୍ସିଂ ଆସୋସିଏଶନ (ଏଓକେଏ) ସମ୍ପାଦକ ବିଭୂତି ଭୂଷଣ ବେହେରା କୃତୀ ଖେଳାଳିମାନଙ୍କୁ ଅଭିନନ୍ଦନ ଜଣାଇଛନ୍ତି।
