ଭୁବନେଶ୍ୱର,୨୪।୧୦: ଓଡ଼ିଶାକୁ ଆଳୁ ଉତ୍ପାଦନରେ ଆତ୍ମନିର୍ଭରଶୀଳ କରିବା ଅଭିଯାନରେ ରାଜ୍ୟ ସରକାର ଚଳିତ ବର୍ଷ ୫୦ ହଜାରରୁ ଉର୍ଦ୍ଧ୍ବ ଏକର ଚାଷଜମିରେ ଆଳୁଚାଷ କରିବା ପାଇଁ ଯୋଜନା କରିଛନ୍ତି।
ଗୁରୁବାର ଲୋକସେବା ଭବନରେ ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି। ସିଂହଦେଓ ଚାଷୀଙ୍କୁ ଆଗୁଆ ୩ ଲକ୍ଷ କ୍ଵିଣ୍ଟାଲ୍ ଉନ୍ନତ ମାନର ପ୍ରାମାଣିକ ଆଳୁ ବିହନ ଯୋଗାଇ ଦେବା ପାଇଁ କୃଷି ବିଭାଗକୁ ନିର୍ଦ୍ଦେଶ ଦେଇଛନ୍ତି।
ବିଭାଗ ପକ୍ଷରୁ ସୂଚନା ଦିଆଯାଇଛି ଯେ, ନଭେମ୍ବର ମାସର ପ୍ରଥମ ସପ୍ତାହରୁ ବ୍ଲକ ଆବଶ୍ୟକତା ଅନୁଯାୟୀ ଏହି ଆଳୁ ବିହନ ଯୋଗାଣ କାର୍ଯ୍ୟ ଆରମ୍ଭ କରାଯିବ। ସମସ୍ତ ଜିଲାକୁ ସେମାନଙ୍କ ଆବଶ୍ୟକ ବିହନ ପରିମାଣର ତଥ୍ୟ ତୁରନ୍ତ କୃଷି ବିଭାଗକୁ ପ୍ରେରଣ କରିବାକୁ କୁହାଯାଇଛି।
ଏହି ବୈଠକରେ କୃଷି ବିଭାଗ ପ୍ରମୁଖ ଶାସନ ସଚିବ ଅରବିନ୍ଦ କୁମାର ପାଢ଼ୀ, କୃଷି ନିର୍ଦ୍ଦେଶକ ଶୁଭମ ସକ୍ସେନା ଏବଂ ଉଦ୍ୟାନ କୃଷି ନିର୍ଦ୍ଦେଶକ କାଲୁଙ୍ଗେ ଗୋରଖ ୱାମନ ଉପସ୍ଥିତ ଥିଲେ।
ସେହିପରି ଅନ୍ୟାନ୍ୟ ଚାଷ ପାଇଁ ଯଥା, ପିଆଜ: ୬୦୦୦ ହେକ୍ଟର ଜମିରେ ୬୦୦ କ୍ଵିଣ୍ଟାଲ୍, ଲଙ୍କା: ୧୦୦୦ ହେକ୍ଟର ଜମିରେ ୧୦୦ କ୍ଵିଣ୍ଟାଲ୍, ରସୁଣ: ୩୦୦ ହେକ୍ଟର ଜମିରେ ୭୫୦୦ କ୍ଵିଣ୍ଟାଲ୍ ବିହନ ପ୍ରଦାନ କରାଯିବ।
ବିହନ ଅଭାବ କିମ୍ବା ସହାୟତା ଆବଶ୍ୟକ କରୁଥିବା ଚାଷୀମାନେ କୃଷି ବିଭାଗର ହେଲ୍ପଲାଇନ୍ ନମ୍ବର ୧୫୫୩୩୩ ରେ କିମ୍ବା ନିକଟସ୍ଥ ଉଦ୍ୟାନ କୃଷି ଅଧିକାରୀଙ୍କୁ ଯୋଗାଯୋଗ କରିବା ପାଇଁ ଅନୁରୋଧ କରାଯାଇଛି।
