ବାସୁଦେବପୁର,୮।୫(ନାରାୟଣ ପ୍ରସାଦ ବାରିକ): ଭଦ୍ରକ ଜିଲା ବାସୁଦେବପୁର ବ୍ଲକ ଏଡ଼ତାଳ ଗ୍ରାମର ଅଜୟ ଜେନା ନାମକ ଜଣେ ବିବାହିତ ଯୁବକ ମଙ୍ଗଳବାର ଚାନ୍ଦିମାଳ ଅଞ୍ଚଳର ଜଣେ ମହିଳାଙ୍କୁ ଦ୍ୱିତୀୟ ବିବାହ କରିବାକୁ ଉଦ୍ୟମ କରି ହଟହଟା ହୋଇଛନ୍ତି। ଏହି ଘଟଣା ବାସୁଦେବପୁର ଅଞ୍ଚଳରେ ଆଲୋଡ଼ନ ଖେଳାଇ ଦେଇଛି। ଅଜୟ ଦ୍ୱିତୀୟ ବିବାହ କରିବାକୁ ଯାଉଥିବା ଜାଣିପାରି ତାଙ୍କ ବାପା ବିଷ୍ଣୁମୋହନ ଏବଂ ପତ୍ନୀ ତୁଳସୀ ଜେନା ବାସୁଦେବପୁର ଯାଦବ ପଡ଼ିଆ ନିକଟରେ ପହଞ୍ଚି ତାଙ୍କୁ ଧରି ବାସୁଦେବପୁର ଥାନାରେ ଜିମା ଦେଇଛନ୍ତି।
ପ୍ରାୟ ୧୦ ବର୍ଷ ତଳେ ଅଜୟ ଓ ତୁଳସୀ ବିବାହ କରିିଥିଲେ। ତାଙ୍କର ୮ ବର୍ଷର ପୁଅ ରହିଛି। ଏହାସତ୍ତ୍ୱେ ପରେ ଅଜୟଙ୍କ ଚାନ୍ଦିମାଳ ଅଞ୍ଚଳର ଜଣେ ମହିଳାଙ୍କ ସହ ପ୍ରେମସମ୍ପର୍କ ଗଢ଼ି ଉଠିଥିଲା। ଦୁହେଁ ବିବାହ କରିବାକୁ ଉଦ୍ୟମ କରୁଥିବା ବେଳେ ହଟହଟା ହୋଇଛନ୍ତି। ବାସୁଦେବପୁର ଥାନାରେ ଏହି ଘଟଣା ପହଞ୍ଚିବା ପରେ ତଦନ୍ତ ଚାଲିଛି। ଅଜୟ ତାଙ୍କ ପ୍ରେମିକାଙ୍କ ସହ ରହିବାକୁ ଇଚ୍ଛା ପ୍ରକାଶ କରିଛନ୍ତି। ଶେଷରେ ଅଜୟ ଏବଂ ତାଙ୍କ ପରିବାରଲୋକେ ବାପା ଏବଂ ପତ୍ନୀଙ୍କ ମଧ୍ୟରେ ଆପୋଷ ଲେଖାପଢ଼ା ହେବା ପରେ ଅଜୟ ତାଙ୍କ ପ୍ରେମିକାଙ୍କୁ ନେଇ ଯାଇଛନ୍ତି। ଅପରପକ୍ଷେ ବିଷ୍ଣୁମୋହନ ତାଙ୍କ ବୋହୂଙ୍କୁ ନେଇ ଘରକୁ ଯାଇଥିଲେ। ତେବେ ଅଜୟ ଆଉ ପୈତୃକ ଘରକୁ ଯିବେ ନାହିଁ ବୋଲି ଲିଖିତ ଭାବେ ଜଣାଇଥିବା ସୂଚନା ମିଳିଛି। ଏ ନେଇ ଏଏସ୍ଆଇ ବି କେ ଦାସ ମହାପାତ୍ରଙ୍କୁ ପଚାରିବାରୁ ଏହା ଏକ ପାରିବାରିକ ଘଟଣା। ଦୁଇ ପକ୍ଷ ଲିଖିତ ଭାବେ ଥାନାରେ ଜଣାଇ ଘରକୁ ଯାଇଥିଲେ। ଏ ବାବାଦରେ ଥାନାରେ କୌଣସି ଲିଖିତ ମାମଲା ରୁଜୁ ହୋଇ ନ ଥିବା ସେ କହିଛନ୍ତି।
