ଭୁବନେଶ୍ୱର, ୮।୧(କ୍ରୀଡ଼ା ପ୍ରତିନିଧି): ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକର ବାରବାଟୀ ଷ୍ଟାଡିୟମରେ ଚାଲିଥିବା ଏମ୍ଜିଏମ୍ ଟି୨୦ କ୍ରିକେଟ ଲିଗ୍ର ଗୁରୁବାର ଅନୁଷ୍ଠିତ ପ୍ରଥମ ମ୍ୟାଚରେ ଓଡ଼ିଶା ପୁମାସକୁ ୬ ଉଇକେଟରେ ପରାସ୍ତ କରିଛି ଓଡ଼ିଶା ଲାୟନ୍ସ। ଲୋ ସ୍କୋରିଂବିଶିଷ୍ଟ ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ପୁମାସ ୮୬ ରନରେ ସୀମିତ ରହିଥିବାବେଳେ ଲାୟନ୍ସ ୧୭.୧ ଓଭରରେ ୪ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଛି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ପୁମାସ ଆଶ୍ଚର୍ଯ୍ୟଜନକଭାବେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୨୦ ଓଭରରେ ୯ ଉଇକେଟ ହରାଇ ୮୬ ରନ କରିଥିଲା। କୌଣସି ବ୍ୟାଟ୍ସମ୍ୟାନ ୨୦ ସ୍ପର୍ଶ କରିପାରି ନ ଥିଲେ। ସୌଭାଗ୍ୟ ମହାନ୍ତି ସର୍ବାଧିକ ୧୯ ରନ କରିଥିବାବେଳେ ବିପକ୍ଷ ଦଳର ଦୀପକ ରଞ୍ଜନ ବେହେରା ୩ଟି, ଶିବାଶିଷ ସାହୁ ଓ ନଉତ୍ତମ ଭଞ୍ଜ ୨ଟି ଲେଖାଏ ଏବଂ ଆଲୋକ ମଙ୍ଗରାଜ ଗୋଟିଏ ଉଇକେଟ ନେଇଥିଲେ। ଲକ୍ଷ୍ୟ ବଡ଼ ନ ଥିବାରୁ ଲାୟନ୍ସ ପାଇଁ ବିଜୟ ସହଜ ହୋଇଥିଲା। ୧୧ଟି ବଲ୍ ଏବଂ ୬ ଉଇକେଟ ସୁରକ୍ଷିତ ଥାଇ ଦଳ ଲକ୍ଷ୍ୟସ୍ଥଳରେ ପହଞ୍ଚତ୍ ଯାଇଥିଲା। ସ୍ବସ୍ତିକ ସାମଲ ସର୍ବାଧିକ ୨୮ ଓ ରାକେଶ ପଟ୍ଟନାୟକ ୨୧ ରନ ସ୍କୋର କରିଥିଲେ। ପୁମାସର ଟୁକୁନା ସାହୁ ୨ଟି ଓ ଧିରାଜ ସିଂ ଗୋଟିଏ ଉଇକେଟ ନେଇଥିଲେ। ବିଜୟୀ ଦଳର ଶିବାଶିଷ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ। ଓସିଏ ସଦସ୍ୟ ପ୍ରଭାତ ଭୋଳ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ଟୁର୍ନାମେଣ୍ଟରେ ୮ ମ୍ୟାଚରୁ ଲାୟନ୍ସର ଏହା ୪ର୍ଥ ବିଜୟ। ୧୬ ପଏଣ୍ଟ ସହ ଏହି ଦଳ ଟେବୁଲର ତୃତୀୟ ସ୍ଥାନରେ ଥିବାବେଳେ ପୁମାସ ୮ ମ୍ୟାଚରୁ ୩ୟ ପରାଜୟ ବରଣ କରିଥିଲେ ହେଁ ୨୦ ପଏଣ୍ଟରେ ସହ ଦ୍ୱିତୀୟ ସ୍ଥାନରେ ଅପରିବର୍ତ୍ତିତ ରହିଛି।
