ସମ୍ବଲପୁର,୩୧ା୩(ଭବାନୀ ଶଙ୍କର ଭୋଇ): ରାଜ୍ୟ ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ସମ୍ବଲପୁର ଗଙ୍ଗାଧର ମେହେର ବିଶ୍ୱବିଦ୍ୟାଳୟ ପ୍ରେକ୍ଷାଳୟରେ ରବିବାର ଅନୁଷ୍ଠିତ ଏକ କାର୍ଯ୍ୟକ୍ରମରେ ସମ୍ବଲପୁର ବିଧାୟକ ଜୟନାରାୟଣ ମିଶ୍ରଙ୍କ ପଦାଙ୍କ ଅନୁସରଣ କରିଛନ୍ତି ତାଙ୍କ ଝିଅ ଶୁଭଶ୍ରୀ ମିଶ୍ର। ‘ବନ୍ଦେ ଉତ୍କଳ ଜନନୀ’ ଗୀତ ବାଜିବା କ୍ଷଣି ପ୍ରେକ୍ଷାଳୟରେ ଉପସ୍ଥିତ ସମସ୍ତେ ଛିଡା ହୋଇ ସମ୍ମାନ ଜଣାଇଥିଲେ। ହେଲେ ଜୟନାରାୟଣଙ୍କ ଅନୁପସ୍ଥିତିରେ ତାଙ୍କ ପ୍ରତିନିଧିଭାବେ ଯୋଗ ଦେଇଥିବା ଝିଅ ଶୁଭଶ୍ରୀ ତାଙ୍କର ଜଣେ ସମର୍ଥକଙ୍କ ସହ ଗୀତ ଚାଲିଥିବାବେଳେ ଆସନରେ ବସି ରହିଥିଲେ। ଏହି ସମୟରେ ପୂର୍ବତନ ରେଙ୍ଗାଲି ବିଧାୟକ ତଥା ସମ୍ବଲପୁର ଏମ୍ପିଙ୍କ ପ୍ରତିନିଧି ନାଉରୀ ନାୟକଙ୍କ ସମେତ ଭାଜପାର ବହୁ ନେତା ଛିଡ଼ା ହୋଇଥିବା ଦେଖିବାକୁ ମିଳିଥିଲା।
ଜୟନାରାୟଣ ପୂର୍ବରୁ ମଧ୍ୟ ‘ବନ୍ଦେ ଉତ୍କଳ ଜନନୀ’ ଗୀତକୁ ରାଜ୍ୟ ସଙ୍ଗୀତ ଭାବେ ଗ୍ରହଣ କରିବାକୁ ମନା କରିବା ସହ ଗୀତ ଗାନବେଳେ ଛିଡ଼ା ହେବାକୁ ମନା କରି ଆସିଛନ୍ତି। ତାଙ୍କୁ ଅନୁସରଣ କରି ଝିଅ ମଧ୍ୟ ସମାନ ବ୍ୟବହାର ଦେଖାଇଛନ୍ତି। ଏ ସଂକ୍ରାନ୍ତରେ ତାଙ୍କୁ ପଚାରିବାରୁ ସେ ପିତାଙ୍କ କଥାକୁ ଦୋହରାଇଛନ୍ତି ବୋଲି କହିଛନ୍ତି । ସମ୍ବଲପୁରରେ ଭାଜପାର ଅଧିକାଂଶ କର୍ମୀ ଜୟନାରାୟଣଙ୍କ ସମର୍ଥକ ହୋଇଥିବା ସତ୍ତ୍ବେ ସେମାନେ ସମସ୍ତେ ‘ବନ୍ଦେ ଉତ୍କଳ ଜନନୀ’ ବାଜିବା ସମୟରେ ଛିଡା ହେଉଛନ୍ତି। ଏହା ପଛରେ ଦଳର କାର୍ଯ୍ୟାନୁଷ୍ଠାନର ଭୟ ନା ଗୀତକୁ ସମ୍ମାନ ବୋଲି ସାମାଜିକ ଗଣମାଧ୍ୟମରେ ଚର୍ଚ୍ଚା ହେଉଛି। ରବିବାର ଜୟନାରାୟଣଙ୍କ ଅନେକ ସମର୍ଥକ ଗୀତ ବାଜିବା ସମୟରେ ଛିଡା ହୋଇ ରହିଥିଲେ।
