ଭୁବନେଶ୍ୱର,୧୧।୨: ଗତ ୫ ବର୍ଷରେ ପ୍ରଥମଥର ପାଇଁ ଓଡ଼ିଶାରେ ସର୍ବାଧିକ ଡଲଫିନ ଦେଖିବକୁ ମିଳିଛି। ୨୦୨୫-୨୬ ଆର୍ଥିକ ବର୍ଷ ପାଇଁ କରାଯାଇଥିବା ଡଲଫିନ ଗଣନାରୁ ଏହା ଜଣାପଡ଼ିଛି। ରିପୋର୍ଟ ଅନୁଯାୟୀ ଓଡ଼ିଶା ଉପକୂଳ ଏବଂ ଚିଲିକା ହ୍ରଦରେ ମୋଟ ୭୬୫ଟି ଡଲଫିନ ଓ ଅନ୍ୟାନ୍ୟ ସାମୁଦ୍ରିକ ସ୍ତନ୍ୟପାୟୀ ପ୍ରାଣୀ ରହିଛନ୍ତି। ସରକାରଙ୍କ ବ୍ୟାପକ ସଂରକ୍ଷଣ ନୀତି, ପ୍ରାକୃତିକ ପରିବେଶର ସୁରକ୍ଷା ଏବଂ ସ୍ଥାନୀୟ ଜନସାଧାରଣଙ୍କ ସହଯୋଗ ଯୋଗୁଁ ଏହି ସଂଖ୍ୟା ବୃଦ୍ଧି ପାଇଛି।
ଏହି ସର୍ଭେ ଅନୁଯାୟୀ ରାଜ୍ୟରେ ୬ଟି ଭିନ୍ନ ପ୍ରଜାତିର ଡଲଫିନ ଓ ହୁଏଲ୍ ଦେଖିବାକୁ ମିଳିଛି। ଏଥିରେ ହମ୍ପବ୍ୟାକ୍ ଡଲଫିନ ସର୍ବାଧିକ ୪୯୭, ଇରାୱାଡି ଡଲଫିନ ୨୦୮, ବୋଟଲ୍-ନୋଜ୍ ଡଲଫିନ ୫୫, ସ୍ପିନର ଡଲଫିନ ୩ ଏବଂ ଫିନଲେସ୍ ପରପୋଇଜ୍ ୨ ରହିଛନ୍ତି।
ଏସିଆର ବୃହତ୍ତମ ଲବଣାକ୍ତ ହ୍ରଦ ଚିଲିକା ଏବେ ମଧ୍ୟ ଇରାୱାଡି ଡଲଫିନଙ୍କ ପାଇଁ ସବୁଠାରୁ ନିରାପଦ ସ୍ଥାନ ହୋଇ ରହିଛି। ଏଠାରେ ମୋଟ ୧୫୯ଟି ଇରାୱାଡି ଡଲଫିନ ଚିହ୍ନଟ ହୋଇଛନ୍ତି। ବାସସ୍ଥଳୀର ସୁପରିଚାଳନା ଯୋଗୁଁ ଚିଲିକା ବିଶ୍ୱସ୍ତରରେ ଏକ ସଫଳ ସଂରକ୍ଷଣ ମଡେଲ ଭାବେ ଉଭା ହୋଇଛି। ସେହିଭଳି କେନ୍ଦ୍ରାପଡ଼ା ଜିଲା ସ୍ଥିତ ଗହିରମଥା ସାମୁଦ୍ରିକ ଅଭୟାରଣ୍ୟରେ ସର୍ବାଧିକ ୪୭୪ଟି ହମ୍ପବ୍ୟାକ୍ ଡଲଫିନ ଦେଖିବାକୁ ମିଳିଛି।
ଚିଲିକା ଓ ଗହିରମଥା ବ୍ୟତୀତ ବାଲେଶ୍ୱର (୧୫), ବ୍ରହ୍ମପୁର (୧୩) ଏବଂ ପୁରୀ (୧୨) ଉପକୂଳ ଅଞ୍ଚଳରେ ମଧ୍ୟ ଇରାୱାଡି ଡଲଫିନଙ୍କ ଉପସ୍ଥିତି ରେକର୍ଡ କରାଯାଇଛି, ଯାହା ସେମାନଙ୍କର ବଂଶ ବିସ୍ତାର ଓ ନୂଆ ସ୍ଥାନକୁ ସ୍ଥାନାନ୍ତରଣର ସୂଚନା ଦେଉଛି।
