ଭୁବନେଶ୍ୱର,୯।୨: ରାଜଧାନୀ ଭୁବନେଶ୍ୱରରେ ଏକ ସିନେମା ଷ୍ଟାଇଲ୍ରେ ଘଟିଛି ଜଘନ୍ୟ ହତ୍ୟାକାଣ୍ଡ। ‘ଚକୋଲେଟ୍ ଡେ’ ପାଳନ ପରେ ପ୍ରେମିକର ବେକ କାଟି ହତ୍ୟା କରିବା ସହ ପ୍ରମାଣ ନଷ୍ଟ କରିବାକୁ ଯାଇ ଦୁର୍ଘଟଣାର ଶିକାର ହୋଇଛି କାର୍। ଶିଶୁ ଭବନ ଛକ ଓଭରବ୍ରିଜ୍ ଉପରୁ ଏକ କାର୍ ବ୍ରିଜ୍ ତଳ ବସ୍ତି ଉପରକୁ ଖସିପଡ଼ିବା ଘଟଣାର ତଦନ୍ତ କରିବା ପରେ ପୋଲିସ ହାତରେ ଏହି ଲୋମଟାଙ୍କୁରା ରହସ୍ୟ ଧରାପଡ଼ିଛି।
ମୃତକ ହେଉଛନ୍ତି ବ୍ରହ୍ମଗିରି ଅଞ୍ଚଳର ସତ୍ୟବ୍ରତ ପ୍ରଧାନ (ବାବୁନା)। ସେ ପେସାରେ ଜଣେ ଡ୍ରାଇଭର୍ ଥିଲେ। ମିଳିଥିବା ସୂଚନା ଅନୁଯାୟୀ ନିଳାଦ୍ରୀବିହାର ଅଞ୍ଚଳରେ ରହୁଥିବା ଲିଜା ଭୋଇ ନାମକ ଜଣେ ଯୁବତୀଙ୍କ ସହ ସତ୍ୟବ୍ରତଙ୍କ ପ୍ରେମ ସମ୍ପର୍କ ଥିଲା। କିନ୍ତୁ ଦିନେଶ କାଣ୍ଡି ନାମକ ଅନ୍ୟ ଜଣେ ଯୁବକ ସହ ମଧ୍ୟ ଲିଜାଙ୍କର ସମ୍ପର୍କ ଥିବା ଜଣାପଡ଼ିଛି।
ରବିବାର ରାତିରେ ସତ୍ୟବ୍ରତ ଓ ଲିଜା ‘ଚକୋଲେଟ୍ ଡେ’ ପାଳନ କରିଥିଲେ। ଏହା ପରେ ଲିଜାଙ୍କର ଏକ ସୋସିଆଲ ମିଡିଆ ପୋଷ୍ଟକୁ ନେଇ ବିବାଦ ବଢ଼ିଥିଲା। ଏହି ସମୟରେ ଅନ୍ୟତମ ପ୍ରେମିକ ଦିନେଶ ସେଠାରେ ପହଞ୍ଚି ଏକ ଛୁରୀରେ ସତ୍ୟବ୍ରତଙ୍କ ବେକ କାଟି ଦେଇଥିଲେ। ଗୁରୁତର ଅବସ୍ଥାରେ ସତ୍ୟବ୍ରତଙ୍କୁ ହସ୍ପିଟାଲ ନିଆଯାଇଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ଘଟିଥିଲା।
ସତ୍ୟବ୍ରତଙ୍କ ମୃତ୍ୟୁ ପରେ ଘଟଣାସ୍ଥଳରୁ କାର୍ ଗାୟବ କରିବା ପାଇଁ ଯୋଜନା ହୋଇଥିଲା। କାର୍ ମାଲିକାଣୀ ଅନ୍ୟ ଜଣେ ଡ୍ରାଇଭର ସହାୟତାରେ ଗାଡ଼ିଟିକୁ ନେଇ ଯାଉଥିବା ବେଳେ ଭୋର୍ ପ୍ରାୟ ୫ଟା ୪୦ରେ ଶିଶୁ ଭବନ ଓଭରବ୍ରିଜ୍ ଉପରେ ଦୁର୍ଘଟଣା ଘଟିଥିଲା। ଦ୍ରୁତ ଗତିରେ ଥିବା କାର୍ଟି ବ୍ରିଜ୍ ବାଡ଼ ଭାଙ୍ଗି ତଳେ ଥିବା ବସ୍ତି ଘର ଉପରେ ପଡ଼ିଥିଲା। ସୌଭାଗ୍ୟବଶତଃ ଏଥିରେ କାହାର ପ୍ରାଣହାନି ହୋଇନାହିଁ।
ପୋଲିସ ଏହି ମାମଲାରେ ମୁଖ୍ୟ ଅଭିଯୁକ୍ତ ଲିଜା ଭୋଇ ଏବଂ ଦିନେଶ କାଣ୍ଡିଙ୍କୁ ଅଟକ ରଖି ପଚରାଉଚରା କରୁଛି। ଏଥିସହ କାର୍ ମାଲିକାଣୀଙ୍କ ଭୂମିକାକୁ ନେଇ ମଧ୍ୟ ଛାନଭିନ୍ ଜାରି ରହିଛି। ପ୍ରମାଣ ନଷ୍ଟ କରିବା ପାଇଁ କାର୍ଟିକୁ ଘଟଣାସ୍ଥଳରୁ ହଟାଯାଉଥିଲା କି ନାହିଁ, ସେ ଦିଗରେ ତିନୋଟି ଟିମ୍ ଗଠନ କରି ତଦନ୍ତ କରୁଛି ଚନ୍ଦ୍ରଶେଖରପୁର ପୋଲିସ।
