* ମିଳିଲାନି ସଙ୍ଗରୋଧ ସହାୟତା ଟଙ୍କା
* ମଉଳିଲା ଏମ୍ଜିଏନ୍ଆର୍ଇଜିଏସ୍ ଆଶା
ପାଟପୁର,୮ା୮- ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ପଳାସପୁର, ଇନ୍ଦ୍ରାବାସ, ଲୁଣିଲାଠୀ, ଗଙ୍ଗାପୁର, ସୁମନ୍ତପୁର ଆଦି ଅଞ୍ଚଳରୁ ୩୮ ପ୍ରବାସୀ ଶ୍ରମିକ ଶୁକ୍ରବାର ପୁଣି ସୁରଟ ଫେରିଯାଇଛନ୍ତି। କାମଧନ୍ଦା ନ ପାଇ ଏକ ଘରୋଇ ବସ୍କୁ ରିଜର୍ଭ କରି ସମସ୍ତ ଶ୍ରମିକ ପଳାସପୁର ଛକରୁ ସୁରଟ ଯାଇଛନ୍ତି।
କରୋନା ପରେ ଘରକୁ ଫେରିଥିଲୁ। ସରକାରୀ ସଙ୍ଗରୋଧରେ ରହିଲୁ। ସେଠାରୁ ଫେରିବା ପରେ ନଁା ମିଳିଲା ସଙ୍ଗରୋଧ ସହାୟତା ରାଶି ନା ମିଳିଲା ଏମ୍ଜିଏନ୍ଆର୍ଇଜିଏସ୍ ଯୋଜନାରେ କାମ। ଶେଷରେ ପେଟ ପାଇଁ କରୋନାକୁ ଖାତିର ନ କରି ପୁଣି ସ୍ତ୍ରୀ ପିଲାଙ୍କୁ ଘରେ ଛାଡି ଦାଦନ ଖଟିବାକୁ ସୁରଟ ଫେରିଯାଉଛୁ ବୋଲି କହିଥିଲେ ପ୍ରବାସୀ। ଏମାନଙ୍କୁ ଗଞ୍ଜାମରୁ ସୁରଟ ନେବାକୁ ସୁରଟର ସ୍ଥାନୀୟ ଜିଲାପାଳ ଅନୁମତି ଦେଇଥିବା ଜଣାପଡିଛି।
ବାହାର ରାଜ୍ୟରୁ ଲକ୍ଷାଧିକ ପ୍ରବାସୀ ସାନଖେମୁଣ୍ଡି ସମେତ ଗଞ୍ଜାମ ଜିଲାର ବିଭିନ୍ନ ଗ୍ରାମକୁ ଫେରିଥିଲେ। ବର୍ତ୍ତମାନ ଜିଲାରେ କରୋନା ସ୍ଥିତି ସାଙ୍ଘାତିକ। ସଂକ୍ରମିତଙ୍କ ସଂଖ୍ୟା ୧୨ ହଜାର ଟପିଥିବାବେଳେ ୧୨୩ଜଣଙ୍କ ମୃତ୍ୟୁ ହେଲାଣି। ବିଭିନ୍ନ ଗ୍ରାମ ସମେତ ସହରାଞ୍ଚଳରେ କରୋନା ରୋଗୀଙ୍କ ସଂଖ୍ୟା ହୁ ହୁ ବଢୁଛି।
ବ୍ଲକ ଅଫିସ ଠାରୁ ମାତ୍ର ଏକ କିମି ଦୂର ପଳାସପୁରରୁ ଶ୍ରମିକମାନେ ସୁରଟ ଫେରୁଥିଲେ ମଧ୍ୟ ବ୍ଲକ ପ୍ରଶାସନ ପାଖରେ ଖବର ନଥିଲା। ଏ ନେଇ ବିଡ଼ିଓ ଗାୟତ୍ରୀ ଦତ୍ତ ନାୟକ କହିଛନ୍ତି, ୩ଦିନ ପୂର୍ବରୁ ଇନ୍ଦ୍ରାବାସ ଓ ପଳାସପୁର ଗ୍ରାମର କେତେଜଣ ପ୍ରବାସୀ ସରକାରୀ ସହାୟତା ମିଳି ନ ଥିବା ଜଣାଇଥିଲେ। ଗ୍ରାମରେ କୌଣସି କାମ ନଥିବାରୁ ସୁରଟ ଫେରିଯିବୁ ବୋଲି ସେମାନେ କହିଥିବା ବିଡିଓ ସୂଚନା ଦେଇଛନ୍ତି।
