ଭୁବନେଶ୍ୱର, ୧୨।୧(ବନ୍ଦନା ସେଠୀ): ଗୃହ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ ଦ୍ୱାରା ହୋଇଥିବା ସ୍ବଚ୍ଛ ସର୍ବେକ୍ଷଣ-୨୦୨୩ର ଫଳାଫଳ ଗୁରୁବାର ଘୋଷଣା କରାଯାଇଛି। ଚଳିତବର୍ଷ ପ୍ରଥମ ଥର ଲାଗି ୨ଟି ରାଜ୍ୟକୁ ପ୍ରଥମ ପୁରସ୍କାର ମିଳିଥିବାବେଳେ ଉଭୟ ୯୩୪୮.୩୯ ସ୍କୋର ପାଇଛନ୍ତି। ମଧ୍ୟପ୍ରଦେଶର ଇନ୍ଦୋର ସହର ଲଗାତାର ସପ୍ତମ ଥର ପାଇଁ ବାଜିମାତ୍ କରିଥିବାବେଳେ ଗୁଜରାଟର ସୁରଟ ପ୍ରଥମ ଥର ଲାଗି ଏହି ପୁରସ୍କାର ହାସଲ କରିଛି। ନୂଆଦିଲ୍ଲୀସ୍ଥିତ ଭାରତ ମଣ୍ଡପରେ ଆୟୋଜିତ ପୁରସ୍କାର ପ୍ରଦାନ କାର୍ଯ୍ୟକ୍ରମରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ କେନ୍ଦ୍ର ନଗର ଉନ୍ନୟନ ମନ୍ତ୍ରୀ ହରଦୀପ୍ ସିଂ ପୁରୀ ଯୋଗଦେଇ ବିଜେତା ରାଜ୍ୟ ଓ ସହରର ପ୍ରତିନିଧିମାନଙ୍କୁ ପୁରସ୍କୃତ କରିଛନ୍ତି। ଅପରପକ୍ଷେ ସ୍ବଚ୍ଛତା କ୍ଷେତ୍ରରେ ଷ୍ଟେଟ୍ ର଼୍ୟାଙ୍କିଙ୍ଗ୍ରେ ଓଡ଼ିଶାର ସ୍ଥାନ ୪ର୍ଥରେ ରହିଛି। ପ୍ରଥମ ସ୍ଥାନରେ ମହାରାଷ୍ଟ୍ର ଥିବାବେଳେ ୩୭୨୧.୫୫ ସ୍କୋର ମିଳିଛି। ଦ୍ୱିତୀୟରେ ମଧ୍ୟପ୍ରଦେଶକୁ ୩୬୫୭.୯୨, ତୃତୀୟ ସ୍ଥାନରେ ଥିବା ଛତିଶଗଡ଼କୁ ୩୪୨୫.୪୧ ଏବଂ ଚତୁର୍ଥ ସ୍ଥାନରେ ଥିବା ଓଡ଼ିଶାକୁ ୩୧୩୧.୩୮ ସ୍କୋର ମିଳିଥିବା ସୂଚନା ରହିଛି।
ସେହିପରି ଚଳିତବର୍ଷ ଭୁବନେଶ୍ୱର ମହାନଗର ନିଗମ (ବିଏମ୍ସି) ମଧ୍ୟ ଭଲ ପ୍ରଦର୍ଶନ କରିଛି। ଗତଥର ଭୁବନେଶ୍ୱରକୁ ସର୍ବଭାରତୀୟ ସ୍ତରରେ ୮୦ତମ ର଼୍ୟାଙ୍କ୍ ମିଳିଥିବାବେଳେ ଏଥର ୩୪ତମ ର଼୍ୟାଙ୍କ୍ ମିଳିଛି। ଏଥିସହ ଓ୍ବାଟର ପ୍ଲସ୍ ଏବଂ ଗାର୍ବେଜ୍ ଫ୍ରି ବା ଆବର୍ଜନାମୁକ୍ତ ସହର ଭାବେ ଥ୍ରୀ ଷ୍ଟାର ରେଟିଂ ମିଳିବା ସହ ରାଜ୍ୟରେ ପ୍ରଥମ ସହର ଭାବେ ସ୍ଥାନ ଅଧିକାର କରିଛି। ଏଥିପାଇଁ ଭୁବନେଶ୍ୱରକୁ ‘କ୍ଲିନ୍ ସିଟି ଇନ୍ ଓଡ଼ିଶା’ ପୁରସ୍କାର ମିଳିଛି। ୨୦୨୨ରେ ସ୍ବଚ୍ଛ ସର୍ବେକ୍ଷଣ ସର୍ଭେରେ ମୋଟ୍ ୭୫୦୦ ନମ୍ବର ରଖାଯାଇଥିବାବେଳେ ୨୦୨୩ରେ ଏହାକୁ ବୃଦ୍ଧି କରି ମୋଟ୍ ୯୫୦୦ ନମ୍ବର ରଖାଯାଇଥିଲା। ସେଥିରୁ ୫୧% ଅର୍ଥାତ୍ ୪୮୩୦ ମାର୍କ ସର୍ଭିସ ଲେଭଲ ପ୍ରୋଗ୍ରେସ୍ ବାବଦରେ ଥିବାବେଳେ ୨୬% ଅର୍ଥାତ୍ ୨୫୦୦ ମାର୍କ ସାର୍ଟିଫିକେଶନ୍ ଏବଂ ୨୩% ଅର୍ଥାତ୍ ୨୧୭୦ ମାର୍କ ସିଟିଜେନ୍ ଭଏସ୍ ବାବଦରେ ରହିଥିଲା। ଏହି ସବୁକୁ ମିଶାଇ ଭୁବନେଶ୍ୱରକୁ ସର୍ବେକ୍ଷଣରେ ମୋଟ୍ ୯୫୦୦ରୁ ୭୩୧୪.୯୦ ନମ୍ବର ମିଳିଛି। ଗୁରୁବାର ନୂଆଦିଲ୍ଲୀସ୍ଥିତ ଭାରତ ମଣ୍ଡପରେ ଆୟୋଜିତ ପୁରସ୍କାର ବିତରଣ କାର୍ଯ୍ୟକ୍ରମରେ ଭୁବନେଶ୍ୱର ମେୟର ସୁଲୋଚନା ଦାସ, ଡେପୁଟି ମେୟର ମଞ୍ଜୁଲତା କହଁର, କମିଶନର ବିଜୟ ଅମୃତା କୁଲାଙ୍ଗେ ଏବଂ ଅନ୍ୟ ଅଧିକାରୀମାନେ ଯୋଗଦେଇ ଏହି ପୁରସ୍କାର ଗ୍ରହଣ କରିଛନ୍ତି। ଆବର୍ଜନା ପରିଚାଳନା, ପ୍ଲାଷ୍ଟିକ୍ ଆବର୍ଜନାର ପରିଚାଳନା, ରିସାଇକେଲ, ରିୟୁଜ୍ ନୀତିର ପ୍ରୟୋଗ ଏବଂ ସଫେଇ କର୍ମଚାରୀଙ୍କ ସୁରକ୍ଷା ଆଦି ବିଭିନ୍ନ ଆଧାରରେ ର଼୍ୟାଙ୍କିଙ୍ଗ୍ କରାଯାଇଥାଏ। ୨୦୧୬ରୁ କେନ୍ଦ୍ର ସରକାର ଦେଶରେ ସ୍ବଚ୍ଛ ସର୍ବେକ୍ଷଣ କରୁଛନ୍ତି। ଚଳିତ ବର୍ଷ ୪ ହଜାର ୪୭୭ଟି ସହରକୁ ସର୍ଭେରେ ସାମିଲ କରାଯାଇଥିଲା।
ଟପ୍ ଟେନ୍ ତାଲିକାରେ ନାହିଁ ଓଡ଼ିଶାର କୌଣସି ସହର
ଏଥର ମଧ୍ୟ ଓଡ଼ିଶାର କୌଣସି ସହର ଟପ୍ ଟେନ୍ ତାଲିକାରେ ସ୍ଥାନ ପାଇନାହିଁ। ଭୁବନେଶ୍ୱର ୩୪ତମ ସ୍ଥାନରେ ରହିଥିବାବେଳେ ଏହା ପଛକୁ ୬୭୩୬.୭୦ ନମ୍ବରରେ ୬୨ତମ ସ୍ଥାନରେ ପୁରୀ ସହର ରହିଛି। ସେହିପରି ୯୯ତମ ସ୍ଥାନରେ ବାଲେଶ୍ୱର (୬୦୩୦.୧୦ ନମ୍ବର), ୧୧୧ତମ ସ୍ଥାନରେ ବ୍ରହ୍ମପୁର (୫୮୧୨.୨୦ ନମ୍ବର), ୧୧୯ତମ ସ୍ଥାନରେ ରାଉରକେଲା (୫୬୮୯.୮୦ ନମ୍ବର), ୧୬୩ତମ ସ୍ଥାନରେ ସମ୍ବଲପୁର (୪୭୬୧.୫୦ ନମ୍ବର), ୧୭୨ତମ ସ୍ଥାନରେ କଟକ (୪୬୮୧.୪୦ ନମ୍ବର) ଏବଂ ୨୨୯ତମ ସ୍ଥାନରେ ଭଦ୍ରକ ରହିଛି। ସର୍ଭେରେ ରାଜ୍ୟର ମୋଟ୍ ୧୧୪ଟି ପୌରପରିଷଦ, ବିଜ୍ଞାପିତ ଅଞ୍ଚଳ ପରିଷଦ ଏବଂ ମହାନଗର ନିଗମ ଅଂଶଗ୍ରହଣ କରିଥିବାବେଳେ ମୋଟ୍ ୨ଟି ପୁରସ୍କାର ମିଳିଛି। ସେହିପରି ୬୨ଟି ଓଡିଏଫ୍, ୧୮ଟି ଓଡିିଏଫ୍ପ୍ଲସ୍, ୩୩ଟି ଓଡିିଏଫ୍ ପ୍ଲସ୍ପ୍ଲସ୍, ଗୋଟିଏ ଓ୍ବାଟର ପ୍ଲସ୍, ୧୪ଟି ଓ୍ବାନ୍ଷ୍ଟାର, ୨ଟି ଥ୍ରୀ ଷ୍ଟାର ମିଳିଛି।
