ଭୁବନେଶ୍ବର,୨୩ା୯(ବ୍ୟୁରୋ): ଓଡିଶା ସମବାୟ ସେବାବର୍ଗ ହେଉଛି ଓଡିଶା ପ୍ରଶାସନିକ ସେବାବର୍ଗର ଗୋଟିଏ ଅଂଶ। ବର୍ତ୍ତମାନ ନିବନ୍ଧକ ସମବାୟ ସମିତି ସମୂହ, ଓଡିଶାଙ୍କ କାର୍ଯ୍ୟଭାର, ଦାୟିତ୍ୱ ଓ ଉତ୍ତରଦାୟିତ୍ୱ ବହୁ ମାତ୍ରାରେ ବୃଦ୍ଧି ପାଇଛି। ଏହାର ପ୍ରତିଷ୍ଠା ହେବା ଠାରୁ ମାତ୍ର ଛୋଟିଆ ପୁନର୍ଗଠନ ୨୦୧୧ ମସିହାରେ ହୋଇଥିଲା। ପ୍ରମୋଶନରେ ବାଧକତା ହେତୁ ଏହି ବର୍ଗରେ ସେବାରତ ଅଧିକାରୀମାନେ ଚାକିରୀ କାଳ ମଧ୍ୟରେ ପ୍ରମୋଶନ ପାଇବାରୁ ବଞ୍ଚିତ ହେଉଛନ୍ତି। ଏଣୁ ଓଡିଶା ସମବାୟ ସେବାବର୍ଗର ଆବଶ୍ୟକତା ଅନୁସାରେ ପୁନର୍ଗଠନର ଆବଶ୍ୟକତା ଦେଖି ରାଜ୍ୟ ସରକାର ଗୁରୁବାର ଅନୁଷ୍ଠିତ କ୍ୟାବିନେଟ୍ ବୈଠକରେ ଗୁରୁତ୍ୱପୂର୍ଣ୍ଣ ପ୍ରସ୍ତାବ ପାରିତ କରିଛନ୍ତି। ଏହି ପୁନର୍ଗଠନ ସେବାବର୍ଗକୁ ପଦୋନ୍ନତିରେ ଗତିଶୀଳ କରି ଏହାର କାର୍ଯ୍ୟଦକ୍ଷତା ବୃଦ୍ଧିରେ ସହାୟକ ହେବ। ଏହି ପରିପ୍ରେକ୍ଷୀରେ ଓଡିଶା ସମବାୟ ସେବାବର୍ଗର ପଦବୀ ସଂଖ୍ୟା ୧୨୨ରୁ ୨୦୩କୁ ବୃଦ୍ଧି କରିବା ଦିଗରେ ନିଷ୍ପତ୍ତି ନେଇ ପ୍ରସ୍ତାବ ପାରିତ କରିଛନ୍ତି।
